Ruth 2

Rut Ba Pol e Naho sa Boas

E Betlehem, eilep tei da en xa holesok nan holu, hisen Boas. Xi nggo vatimol xati na Elimelek, tiramue na Noume. Vatei, Rut misis Noume bit, “Umaen nou nihe naho tova tengan nileh viton bale xil xa moletin te polien xil laki rasi di nga tengan mei ihe anien aralu. Xos nikila nikamet moletin tova xa imaen nou nipol ni e naho san.”

Ma Noume maen ni bit, “Havuxahin, bos tang, ha upol ni.”

Ma Rut ba be naho tei e di pol dutou ni moletin te polien xil e di mileh viton bale xil xa xil laki rasi di nga. E Rut, xi takil ti xa naho xa di pol en sa Boas xa nggo vatimol xati na Elimelek, tiramue na Noume. Tavehi, Boas nggo metimal tahal Betlehem e mei mistal mi moletin te polien nan xil e mikei ba ni xil bit, “!Iahova iti mi xamim!”

Ma xil labit rilomun ni mini labit, “!Iahova ituxol xatuk mun!”

Di, Boas misis vat te polien nan bit, “?Atul maxoe xai na visi?”

Ma vat ak bit rilomun ni mini bit, “Atou xai tahal Moab, e be xal Noume iaxa lumei. Xi misis nou tengan nimaen ni ha ti ihusil moletin te polien xil e ti ileh viton bale xil xa laki rasi di nga. Xi temei makoe roroh tamu e di ni polien duxoh taxeak. Xi ba mingel vuteili tang pe horao.”

Di, Boas ba misepin del Rut bit, “Ei, atuli. Uteong ni nou, ieok bei tengan upol e naho savan sangas visal atou te polien xil navan. Onaha ti mun naho na mosav tengan oleh viton bale en. Rute xave xa xil ti lipol en, xouk mun utat visal xil. Nasep xol moletin navan xil tuei tengan linapol ti nasa minuk. E xosxa meruru iatuk, ma uha umu ti oei e valoei xa langgutihi tuei di.”

10 Melele xa Rut milonge mak, mitingeiril be tan e valnaon duxoh tan. Xi bit rilomun ni mi bit, “?Veneh ma di onem pupu usil nou? ?Veneh ma di osak kuh moletin tei xa nggo kantri sav?”

11 Boas bit rilomun ni mini bitene, “Inou nalongeong ni sexien hos xil xa otepisen ni mi avu sasa nam melele xa tiramue nam temat. Nakila xa xouk oteheling tamom e ninom e kantri xati nam tengan mei odi mi moletin xil xa otnakil ti xil tetiamu. 12 Nasis mi Iahova tengan isa xoles hosien xa otepisen ni mini. Reitin, Iahova, Hi na mol-Isrel xil, isa sanien tei xa ihos pupu minuk, vengan xa xouk oteling nenesien nam en tengan ilaxatuk e isikoe xol meulien nam.”

13 Di, Rut bit rilomun ni mini bitene, “O eilep navan, xouk obos pupu minou. Neta sav xa inou natapin ti tengan name atou te polien tei nam, xouk osepin kuhi minou e odal rat nenemien navan.”

14 E piniae, melele xa di langganien, Boas biteni mi Rut bitene, “Amei visali xamem, a ti beret e usa ni ihe sup ak.” Ma xi dotan del moletin te polien xil, e Boas misa rut bale xa ladin ni meses mini. Xi ngganien pipin, di miserep kuh anien an xa ngga lingi ba di. 15 Melele xa Rut dilomun ba tengan vapol, Boas misel xat moletin te polien nan xil bitene, “Mumaen ni ileh viton bale e rute xil vus xa ien bei. Tave ti neta xosxa ileh rerati ra vanute xil xa mubar vitoni ngamu di, munasep xole ti. 16 E tei mun, bos xa muleh rerat ti bale ra vanute xil e muson ni ihe tan tengan atou ak mei ti ilehi.”

17 Ma Rut mileh viton bale e naho ak ba duxoh mahis. E melele xa bas rerat utute, mikameti xa utute xil vus xa miso vitoni, kilo nen be lu e le (12 kg). 18 Mileh utut bale xil ak dilomun be tim e ba pisen ni mi avu sasa nan. Di, rut anien xa teserep kuhi, ngan ak mun, Rut misa ni mini.

19 Melele xa Noume pusi, mitemanin e misisi bitene, “?Xosali, oleh viton utut bale xil ak ingga xave? ?Naho sasi vari iaxa xouk otepol en? Tuxolxatien na Hi iti mi moletin xa pusuk e pol bos minuk mak.”

Ma Rut biteni mi Noume bit, “Natepol e naho sa moletin tei xa hisen Boas.”

20 Noume mikei nggeih bitene, “!Tuxolxatien na Iahova iti mini! Iahova di pisen hosien nan mi ralu xa rumeul rudi e mi tiramue naralu xalu xa lulel ngamu. Moletin xai nggo vatimol xati na tiramue naralu xalu. E nggusil sexien na mol-Isrel xil, xi iaxa ilaxat kuh rin xil naralu.”

21 Ma Rut bitene, “E ngan bos mak mu, xi biteni minou bit tit nileh viton bale itel moletin te polien nan xil ha ituxoh melele xa lileh vuol ni bale ra naho san xil.”

22 Noume biteni mi Rut bitene, “O havuxahin, bos mak mu xa xouk tit upol itel atou xil xa di lapol e naho sa Boas. Vengan xa xosxa upol e naho sa mosav, moletin tova ipol isa minuk.”

23 Ma Rut pol del xat atou te polien xil na Boas ba vuma ... duxoh melele xa laleh vuol ni bale, e dutou, laleh uit mun ra naho xil vus san. E Rut nggulehi dat visal tova nan.

Copyright information for `TVK