Ruth 4

Boas Nggur Rut Be Atou Nan

E makoe ak, Boas ba dotan e von totanen xa de sangas visal puiteh te vioh te metimal tahal Betlehem. Di, Boas pus moletin xa di tesep usili bit xi be sagas mu ni tiramue na Rut. Melele xa Boas pusi xa di mikakao tengan vali, mikesi bit, “Tua navan, amei mu, totan ti inggaxalei.” Ma moletin ak bemei dotan visali. Di, Boas ba mikamet eilep xil labe hexalu (10) tengan limei liteong ni rin nalu. Melele xa xil vus lamei vituei, Boas biteni mi tua nan ak bit, “Noume xa dilomun nggo kantri tahal Moab bemei, xi ien bei vapos ni tan xil na tiramue nan Elimelek xa tehe vatimol tei naralu. E inou nanemi momal xa nisep kila minuk. Ma xosxa xouk iem ihei, ma ukila uxale pe met ngan xil xa ladotan ladi xiak. E xosxa iem ti navei, ma uhiteni, vengan xa xouk obe sangas mu mi tiramue na Noume mili nou e ukila uxal rat tan ak itiamu. E xosxa onaxale ti, ma inou sung nixale.”

E moletin ak bit, “E-e, inou nixale.”

Di, Boas biteni mini bit, “Bos pupu. E melengien xa uxal rat tan ak ra Noume, uhur tunau Rut mun xa be ate-Moab. Imak, ma muimol namil ikila ihur tan e holesok sav xil na tiramue na Rut xa mat tuei tengan vatimol nan navop ti.”

Melele xa moletin ak milonge mak, bit rilomun ni mini bitene, “Ve rin ak, inou ninaxal ti tan ak, vengan xa inou nasakras nasa rati mi horamue xati navan xil vahe nae. Itep, ma xouk tang uxale, inou ieok ti tavei mun.”

(E melele nen ak, sexien na moletin xil mak: melele xa labit lapos ni tan tei mu neta sav tova, ma moletin xa tan nan ileh rerat sandel tei nan, e isa ni mi ngan xa ixale. Sexien ak ipisen ni xa lasep maen ni ngamu tengan lixal rat tan ak.)

Ma melele xa moletin ak maen tan ak mi Boas tengan vaxale, xi mileh rat sandel nan e misa ni mini. Di, Boas di bithiteni mi eilep xil e ngan teisav xil mun bitene, “Xamim vus mupus rin xa mistal xosali xa inou nanggal rat holesok xil vus ra he Noume xa tehe na Elimelek del horamue nan xalu xa hisealu tehe Kilion e Malon. 10 E rin tei mun, nihur Rut mun, ate-Moab xa teteli tetel Malon tetiamu, mei ihe atou navan. Nggoni sexien nar, muimol namel xa ihe malahos ikila ihur xat holesok xil vus xa vahe na Malon. Ngan ak isak ni vatimol xil na Elimelek navop ti, xil lixulehi liti visal xir e melengien xil xa ti imei. Xamim vus mupus naha xa mistal taxeak.”

11 Eilep xil e moletin sav xil mun labiteni mini labitene, “Io, xamem mapus holesok xil xa mistal xosali. Xamem musis mi Iahova tengan ipol ni atou ak xa mei iti e tim sam mei ixoni Resel xal Leah, xa lutpes horamue xil holu na Siekob xa mei labe vatimol xil xa eilep tahal Isrel. E musis mun tengan Iahova ipol ni xouk uhe eilep tei xa moletin xil xa langgo vatimol na Efrat limerere ni. Reitin, xi isa his tei minuk xa ihe eilep e metimal nar tahal Betlehem. 12 Horamue xil xa Iahova isa ni minuk ixo ate maxoe ak lipol ni vatimol nam ixoni vatimol na Peres, nat Sudah xa Tamar telingi.”

Ngan Xil xa Lastal Langgo Vatimol Na Boas

13 Ma Boas nggur Rut mei be atou nan e Iahova duxol xati. Ma xi di ni tuvava tei, e ngguri be malahos. 14 Atou xil labiteni mi Noume labit, “!Rapet rat his Iahova! Xosali, xi misa havmali tei tengan ti ilaxatuk melele xa mei uhe tovolih. Horamue ak imei ihe eilep tei e Isrel. 15 Havmahin, eheien nan eilep pupu e xouk. Holesok xil vus xa pol ni minuk bos mak mu mili naha natumali xil lakila lapol ni minuk, neta sav xa xil lave lu e he sav (7). Horamue xa tehuri isak ni meulien nam ihe neta hu rilomun, vengan xa melele xa umei uhe tovolih kuhi, xi ikila ilaxatuk.” 16 Ma Noume po rat tuvava ak, bulu xati e di milaxati.

17 Atou xil xa ladi sangas mi xil lamei laling his tuvava ak be 'Ovet'. Labiteni mi moletin xil vus labit, “Tutut horamue tei, lapesi ve Noume.”

Melele xa Ovet ak mei matu, xi mei be tame Tiese, xa mei be tame suv toto Deved.

18 E ngan ak be vatimol xa testal texo Peres:

  • Peres tehe tame Hesron.
19 
  • Hesron tehe tame Ram xa tehe tame Aminatap.
20 
  • Aminatap tehe tame Nason xa tehe tame Salmon.
21 
  • Salmon tehe tame Boas xa tehe tame Ovet.
22 
  • E Ovet tehe tame Tiese xa tehe tame suv toto Deved.
Copyright information for `TVK