Genesis 35

Jacob An Dam Warar Mat Sinai Au Bethel

Namon God on Jacob aurin iyau, “Om egai au Bethel ato nan unama. Om sirifu agim kema Yau am God auriu unyon. Yau min on efanai nan aurim arobotet, on an rai tuam Esau u yai kirir nan.”

On mes Jacob an dam warar, awawan, nanatun a sabu iyabon nan mat simama on iyawures iyau, “Omi sabu touman asi god ta ta ato bisimui sen on won rebenen. Omi toum won yamuyarim ato beber gumidaris wonoten. Namon ot tani wabunag ato tan misir tanag au Bethel, on nan yau arimon God aurin sirifu agim kema an yon. On God min yau au yababan an rai on i baisiu a menan menan a nan on yau bisiwui ima.” On mes osi sabu touman asi god ta ta a tainas buwor si yoten on engon tutufin Jacob sitai. Ato on Shechem nan wengar Dunar gagamin babanai isar i tounen.

On an werai Jacob nanatun mat sibosuruf sibib, God an beruber gagamin on ato mafam gagamis bisisi si yen on engon i taragabues, on mes osi mafam sabu on men fofonis gibusi sit faitanis sitan on. Jacob an sabu engon mat sinat mafam Luz nan sigat, on min ari seyoyorai Bethel, Canaan tafanam amonai nan. On sirifu agim kema iyon ato efan wabin iyor, “Bethel an God”,
35.7Hebrew dura wab El Bethel an yabin min, Bethel an God.
yabin on an werai Jacob on tuan orot i yayai kirir i nan ato God Toun on nan aurin irobotet.
Rebecca an fio jever Deborah on nan irabob ato wengar Dunar gagamin babanai sigarob, Bethel bisinai. On mes wabin siyor, ‘Tou an Dunar’.

On an werai Jacob Mesopotamia emon imatabir i nat men, ato God on nan aurin iroboet men ato imomoginai. 10 God iyawur iyau, “Om wabim on Jacob ato men gibui sin yorem men Jacob, ab om wabim on sin yorai Israel.” Om mes God i wabai Israel. 11 Ato God iyawur iyau, “Yau on God Faiwariu Bag! Om fifirig sigaraba unitu ato tafanamai sabu on arimon inison kwakwan, ato om nanatum wawam agirim fani on arimon aiwab sin matar. 12 Yau tafanam ato Abraham a Isaac abites on arimon anitem, ato on motob min nanatum wawam agirim mat anites.” 13 Namon God on efan menan Jacob aurin ibi kakafun on ikirir ato igai. 14 On nan Jacob matair agim menan God aurin ibi kakafun nan irou ato sareu wine a rura momon an kerin on tefanai ideburen ikutetai God aurin. 15 On mes Jacob on efan iyor Bethel menan God on aurin ibi kakafun nan.

Rachel Itoub Rabob

16 Namon Jacob an dam warar mat Bethel sikirir sinai. On an werai osi sinat Ephrath mafam aurin sibi ufin ato Rachel on fifi itarat aurin on koun igigiai ato usi baban gagamin i boai. 17 On usi baban gagamin bag i boai an werai, on an bai totoubis jever iyawur iyau, “Rachel, om men unaber mes, om fifi orot tani ba uni tuai.” 18 Baise Rachel on irarabob, ato an aratein kanfoun ibi sawarai on fifi i wabai Ben-Oni.
35.18Hebrew dura wab Ben-Oni on atonio dura an yabin tani bisinai on, yau fifi orot on usi baban auman ai tuai.
Baise taman on i wabai Benjamin.
35.18Hebrew dura wab Benjiman an yabin on, fifi arimon wabin duran gagamin.


19 Ato Rachel irabob ato Ephrath eta rewanai nan sigarobai, on min Bethlehem. 20 Jacob matair agim nan Rachel an budi tefanai irou, ato ari ra agim min nan nana yen. 21 Jacob i nanawan inai Midgal Eder ikirir inai rebanai nan an guwi iyon. (Midgal Eder an yabin min kaifarotin bobaitu ekakaifares an goa ann weromin.)

Jacob Nanatun

1 Chronicles 2:1,2

22 Jacob on nana on tafanamai imama ato natun Reuben on inai taman awan ufuigeg jever wabin Bilhah on rus siyen; Jacob on dura itatam on i yatatab kwakwan.

Jacob nanatun orot wat engon auyotoat an yayatan ruam.
23 Leah nanatun orot, osi wabis min Reuben, (Jacob natun ainau orot), Simeon, Levi, Judah, Issachar a Zebulun. 24 Rachel nanatun orot, osi wabis min Joseph a Benjamin. 25 Rachel an bobo jever Bilhah nanatun orot, osi wabis min Dan a Naphtali. 26 Leah an bobo jever Zilpah nanatun orot, osi wabis min Gad a Asher. Atonio osi fifirig orot engon on Jacob nanatun ato osi Mesopotamia nan sirat.

Isaac An Rabob

27 Jacob inat au go taman Isaac aurin Mamre mafamai nan, Hebron bisinai menan Abraham a Isaac rus simama nan. 28 Isaac ima an kwanda 180 29 ato on iorokwar bag weie irabob, ato nanatun Esau a Jacob rus sigarobai.

Copyright information for `UBR