John 19

Namon Pilate on Iesu ibo ato dura wawaninai wou yangan iyawures urouwawanai nan siyaswabirai. Wou yangan on wengar aisikis fafames on siboen nigir siyamai uninai siyein; namon osi beber mururin on sibo siyotai; osi sinai aurin ato sikoboai siyau, “Jew yangan asi Aiwab, mama wantoanin!” Ato osi Iesu rereban siyasfarai.

Pilate imatabir men igat au koun ato sabu kuayo auris iyau, “Omi woit, On nin anboai angat aurim wonitai, ato yau on men an yabin tani agaturai on animakiai.” On mes Iesu on igat au koun, On uninai on nigir siyein a beber mururin siyotai auman. Pilate on osi sabu auris iyau, “Omi woit! Orot atonio!” Priest Ainauis a tafaror goa ankaifarotis on Iesu sit on siyoku siyau, “Nabai ekubarai! Nabai ekubarai!” Pilate on osi auris iyau, “Omi toum wobo ato nabai wokubarai. Yau on men an yabin tani agaturai on animakiai.”

Jew sabu kuayo on siyafotai men siyau, “Wei ai baifafaro iyau on asir inarab mom, yabin On Toun eyoyorai God Natun.” Pilate atonio dura itatam on iber kwakwan. On imatabir men irui goa ann weromin amonai ato on Iesu itetemai iyau, “Om men emon ne unat i?” Baise Iesu men abi dura tani iyafotai on. 10 Pilate on Iesu aurin iyau, “Om aibo mes men auriu dura ebikakafun i? Om unsagob, Yau au baibad yen anau Om sinrufanim a mat anau Om sinboem nabai sinkubarem.” 11 Iesu iyafotai iyau, “Om am baibad Yau auriu yen yabin atonio on God om item. On mes orot iyafan Yau iboeu om imamui iyayagai on an bokomas on irat kwakwan, komasin bag yen.”

12 Pilate atonio dura itatam on, ifourtobon eta inuen Iesu itrufanai mes. Baise sabu kuayo siyoku men siyau, “Om On unrurufanai on, om on men Caesar turan on! Iyai iyafan toun eyoyorai Aiwab on, Caesar aurin ebiragit!” 13 Pilate atonio dura itatam mom on, Iesu ibo igat au koun ato Pilate on baigurubaban an mamageai imair, on efan seyoyorai, “Baigurubabanotis asi mamage.” (Hebrew yangan fonasi on seyoyorai, “Gabbatha.”) 14 On ra itatom on Baisobon an ra ato wera kafakakai mom aiyet itboai. Pilate sabu auris iyau, “Omi ami Aiwab ato!”

15 Osi siyoku men siyau, “Yasubun! Yasubun! Nabai ekubarai!” Pilate itetemis iyau, “Omi wogogoi yau ami Aiwab nabai ankubarai i?” Priest aiwabis siyafotai siyau, “Wei ai aiwab on Caesar ekesin mom!” 16 Namon Pilate on Iesu osi imasi iyagai nabai sitkubarai mes.

Iesu Nabai Sikubarai

(Matthew 27.32-44; Mark 15.21-32; Luke 23.26-43)

On mes osi Iesu sibo sibonanawai sinai.
17 On igat Toun an nab iyabar ato sinat efan wabin seyoyorai, “Tekwakwan an Efan,” (Hebrew yangan fonasi on seyoyorai, “Golgotha.”) 18 Osi nan nabai sikubarai; mat osi orot ruam on eb nabai sikubares, orot tani rebanai a orot tani rebanai ato Iesu on basunai. 19 Pilate atonio baiyoboen dura on wengarai igayam ato an wou yangan iyawures nab tefanai sidudun. On dura atonio nanaba igayam, “Iesu Nazareth emon, Jew yangan asi Aiwab.” 20 Sabu sigaraba on atonio dura siyab yabin efan menan Iesu nabai sikukubarai on mafam gagamin bisinai bag. Atonio baiyoboen dura on Hebrew, Latin a Greek yangan fonasi sigayam. 21 Priest aiwabis on Pilate aurin siyau, “Om men ungayam unau, ‘Jew yangan asi Aiwab,’ baise om ungayam, “Atonio orot iyau, Yau on Jew yangan asi Aiwab.’”

22 Pilate iyafotes iyau, “Dura aifan agayam on agayam, nana inen.” 23 Wou yangan Iesu nabai sikubarai isawar weie, osi On an beber on siboen ato sikuseseb matas bat simatar, wou orot kakaita on beber matas kakaita kakaita siboen. Mat osi On an beber ato amonai ibitakwakwarai on sibo, on beber on kaitamom weromin tefanai isur inai babanai igat on nanaba sisagir. 24 Wou yangan on tous wat siyau bonen, “Ot beber men tansafef mes; ot barom tanyoai nan tansagob iyafan on inboai.” Atonio bobo imatar onai God an dura buk amonai sigagayam on inat itidura bag: Dura ato nanaba sigayam siyau,

“Osi tous sanasi nan Yau au beber on sikuseseb a au beber amonai abitakwakwariu on sibo asi kwarer siyamai onai barom siyo.”
Ato wou yangan min on bobo nanaba sifour.
25 Iesu ayon giya, Mary, orot Cleopas awan, a Mary Magdalene, on Iesu an nab bisinai sitatawar. 26 Iesu iyeit ayon a baigibubunuotin On an nuabo on nan sitatawar ites; on mes On ayon aurin iyau, “Jever, atonio on om natum orot.”

27 Namon On an baigibubunuotin aurin iyau. “Atonio on om ayom.” On gibunai on jever ibo inai an goai nan ikaifarai.

Iesu Irabob

(Matthew 27.45-56; Mark 15.33-41; Luke 23.44-49)

28 Iesu isagob ari on bobo engon tutufin isawarai; onai itiyamai God an dura buk amonai sigagayam on itnat itidura bag. On iyau, “Yau anjou eteteinin.”

29 Ramo amonai on sareu wine riribin awan bonuin nan i’yen; ato osi beber samisamin on sibo nan sareu wine amonai sikutub ato wengar wabin hyssop on famenai nan siyein ato siyotogai giburunai nan siyein. 30 Iesu sareu wine itoman ato iyau, “Itutufin nono!” Namon On uson itur ato irabob.

Iesu Sesebin Iyoai Siyo

31 Namon Jew babadis on Pilate sifefeyanai on itibasit ato sabu nabai sikukubares on ass sitastoben gariwat sitarab ato usis on nab emon sityeires sitsur. Osi atonio bobo aurin on sifefeyan yabin friday on botitiwag an ra on mes ato osi men sigogoi usis on Sabat ra nan nana nabai sitroror yabin ra itatom on Sabat Kakafotin an ra gagamin. 32 On mes wou yangan sinai orot ainau on ann siyasotoben a orot tani aurin ba sinai ann siyasotoben ato Iesu mat sikukubares on. 33 Baise osi sinat Iesu aurin on sit On irabob nono, on mes osi men ann siyasotoben on. 34 Baise wou orot tani on iyo ibo Iesu sesebinai iyo ato ra kaita tara a sareu iyawadebur isur. 35 (Orot iyafan atonio bobo imamatar matanai i’tai on aurin ikakafun, onai omi mat wonitutum. On dura aifan i’yau on dura bag ato on isagob on dura maiauin wat ebikakafun.) 36 Atonio bobo imatar itiyamai God an dura buk amonai sigagayam on itnat itidura bag: “On men arimon an rarik tani arimon inturutob on.” 37 Ato God an dura tani buk amonai sigayam siyau, “Orot iyoai siyoyoai on sabu arimon matas On aurin sineit.”

Iesu Sigarobai

(Matthew 27.57-61; Mark 15.42-47; Luke 23.50-56)

38 On gibunai, Joseph on Arimathea mafam gagamin emon, on Pilate ifefeyanai fofonin arimon Iesu usin itboai. (Joseph on Iesu an baigibubunuotin tani, baise on bubuniai nan ibobo yabin on Jew babadis auris ibeber on mes.) Pilate on Joseph iyawur usin itboai mes, on mes on inai ato usin ibo inai. 39 Nicodemus, on orot on ainau fom tani inai Iesu ititai mes, on Joseph rus sinai, on fio yanden ninibin on ibo a fio fani keris on mat sikaita sisutatabir, on fio kiman an bit on orot kaitamom auyotoat nanaba on iboen mat sinai. 40 Osi orot ruam on Iesu usin sibo ato garob an beberai nan fio yanden ninibin on usinai sidebur ato sikiman, Jew asi kik iyau nanaba, rabobis usis on nanaba sebotitiwagis weie segagarobis. 41 Iesu nabai sikubarai an efanai nan on masau i’yen ato on amonai nan on rasi dogu i’yen, ato on rasi dogu on men iyafan tani ainau nan sigarobai on. 42 Ra itatom on Sabat ra a yabin on rasi dogu on auwatin on mes Iesu usin on nan siyein.

Copyright information for `UBR