Matthew 2

Nanawanotis Wera Matan emon Sinat

Iesu on Bethlehem mafam gagamin Judea tafanam amonai on nan irat, on an werai min Herod on aiwab orot imama. Wera men weromin gibunai sabu fani siribod an sagob gigiboanotis on wera matan emon sinat au Jerusalem ato osi sitetem siyau, “Fifi irat Jew yangan asi Aiwab mes on menan nan emama i? Wei On an siribod wait wera matan emon igai ato wei wanat On wankwafirai mes.”

Aiwab Herod on dura itatam mom on inonotai kwakwan a sabu engon tutufin Jerusalem simama osi mat on eb sinonotis kwakwan. On an priest aiwabis a an Baifafaro an baibebeotis engon tutufin iyores siruayo ato itetemis iyau, “Keriso min arimon menan nan inarat?”

Osi siyafotai siyau, “On arimon Bethlehem mafam gagamin Judea tafanam amonai nan inarat. Yabin aubairuruotin on dura ato nanaba igayam iyau:

‘Om Bethlehem mafam gagamim Judea tafanam amonai, om on dura bag gagamim bag Judah tafanam an bainetewarotis engon tefasi, om emon on arimon bainetewarotin tani innat, On arimon innat au sabu Israel yangan asi kaifarotin mes inmatar.’”
On mes Herod on nanawanotis wera matan emon si’nat on bubuniai nan iyores sinat bisinai siruayo ato on nan itetemis, sikasonai isagob abi werai bag nan on siribod irobotet. Namon on atonio duraiai nan iyafares sinai au Bethlehem, on iyau, “Omi wonan ato fifi on wonnuen tiwag: ato wongagaturai on wonkasoneu ansagob ato yau mat anan an kwafirai.”

Ato osi sinai, osi eta nenenai si’nan nan siribod kaitamom ato wera matan nan si’tai on sit men. On siribod on ainau nasi i’nan ato fifi menan i’yen on tefanai nan itawar. Osi on siribod si’tai on men sunub siyasisir on! 11 Osi sinai goa amonai sirui ato osi fifi sit ayon Mary rus simama on, sindas sirou ato sikwafirai. Osi asi kekes amonai siwar agim gold, wengar tawai yanden ninibin a fifiu seteterai bakur egeg yanden eninib on siboseseiren sisiwarai.

12 Namon osi eta taniai simatabir men sinai asi tafanam aurin yabin God on bomomoutai nan iyawures men sinmatabir men Herod aurin.

Mary a Joseph Rus Siyayai au Egypt

13 Nanawanotis sinai gibunai, Bada an anea on bomomoutai nan irobotet Joseph aurin ato iyau, “Herod on arimon fifi innuen ato inasubun. On mes om emisir fifi ayon rus eboes ato wonayai wonan au Egypt ato nan wonama weie Yau anawurem on nanaba tafanam wonikirir.”

14 Joseph imisir fifi ayon rus iboes ato fom amonai sinai au Egypt. 15 Osi nan nana simama weie Herod irabob. Atonio bobo imatar onai itnat itidura bag mamaba Bada an aubairuruotin awanai i’yau on. On iyau, “Yau Natu ayor Egypt emon igat.”

Fifirig Gugudis Siyasububunues

16 On an werai Herod isagob nanawanotis wera matan emon si’nat on sisigoai, on mes on yan men sunub itatab. On dura wawaninai iyau wou yangan on fifirig orot gugudis Bethlehem mafam gagamin amonai a on mafam gagamin bisinai mafam gugudis amonai semama osi iyabon asi kwanda ruam a on babanai on sitasububunues mes- on atonio bobo ifour mamaba nanawanotis bisisi emon isasagob on, on an rai siribod irorobotet nan. 17 On etaiai mamaba aubairuruotin Jeremaiah i’yau on inat idura bag: On dura ato nanaba iyau,

18 “Fonas on Ramah mafam gagaminai sitatam, fonas on tou wawaninai bag setotou. Rachel on nanatun auris etotou; on men egogoi sabu sinkubainunubai yabin osi engon tutufin sirabob on mes.”

Mary on Joseph Rus Egypt emon Simatabir

19 Herod irabob gibunai, Bada an anea on Egypt nan bomomoutai irobotet Joseph aurin 20 ato iyau, “Om emisir fifi ayon rus eboes, ato unmatabir men unan au Israel tafanam, yabin osi iyabon sifofourtobon fifi sitasubun mes on sirabob.” 21 On mes Joseph imisir fifi ayon rus iboes ato simatabir men sinai au Israel.

22 Baise Joseph dura itatam on Archelaus on taman Herod an efan ibo inat Judea yangan asi aiwab orot imatar on, Joseph iber men fofonin nan itan. God on bomomoutai nan Joseph iyaubaiyatai, on mes Joseph inai Galilee tafanamai nan 23 ato on inai mafam gagamin wabin Nazareth on nan an goa iyon ima. Ato aubairuruotis dura aifan awasi si’yau on inat idura bag: “On arimon sinyorai Keriso on Nazareth mafam gagamin an Orot.”

Copyright information for `UBR