Titus 1

Yau Paul on God an agirotin a Iesu Keriso an baiyoyobotin. Yau on God irubineu ato iyafareu On an sabu irubinis auris on dura maiauinai wat ati baisis ati bebeyes a ati netewaris mamaba God egogoi on nanaba sinama, ato baitutum a sagob on dura bagai tamomousin on yawas mama wantoanin tanboai. God on men ebisigo, On ainau anai bag on yawas aurin on iyaumatanit. On an werai bag weie, On an agirotis iyafares an wasagobin sikurereb sabu engon auris. Atonio boboai on yau itutumeu, ato God ati Baiyawasotin on dura wawaninai iyawureu an dura aurin on an sabu auris akurereb. Titus, yau atonio fef agagayam om aurim yabin atonio baibebe aurin on om yau rut ati baitutum kaita, on mes anonosim om on yau natu ba.

Yau on Tamat God a Keriso Iesu ati Baiyawasotin aurin ababayoi On an kaber a an tuf initem.

Titus Crete Nuai nan Bobo Ibobo

Yau Crete nuai nan aikirirem kafakakai unama yabin agogoi ato bobo fetag fetag sen on engon unitotoren unyabunagen tiwag, ato agogoi on om mafam gagamis kakaita kakaita amosi nan ekalesia asi sabu kwatus unrubinis. Au dura aifan ainau nan rut tamama awurem on ari awurem men. On orot kwatun unrurubin on an yawas amonai erutotor tiwag, on men an komasin auman mes. On orot on awan kaitamom wat, a on nanatun on baitutumotis ato men wasai nan sinirasfafairis mes, osi ayos tamas sinkakafes tiwag, onai sabu sinites on osi men fonaseirotis on. Yabin orot kwatun on God an bobo engon initai inkaifarai tiwag. On mes ekalesia asi orot kwatun on men an komasin tani auman mes. On orot on men toun ingimemenai o sasasan wat iniyatatab mes, a wine intoman kwakwan inikokok mes, a on men baigagamotin a on men sawar bo auris on ingogoien kwakwan mes. On orot kwatun on inbotitiwagai sabu inibaisis, on sabu inboes an goai iniwanis, on yawas obin aurin wat on ininuabo. On an yawas on toun inrutotorai, on an yawas on totorin wat, on an yawas on toun inkutetai Bada an bobo aurin, a on an yawas on toun initotorai. On orot kwatun on dura maiauin aurin on initutum, mamaba om yau rut osi sabu auris tabibebeyes ba, On orot on bobo atonio nanaba inafour ato dura maiauin on sabu baitutumotis auris inibebeyes, on arimon an dura on an faiwar auman ingat, ato osi sabu iyabon dura maiauin aurin sebiragit on arimon iniyoboes sinitai osi on eta sisarar.

10 Sabu fonaseirotis sigaraba nan semama, osi on duraotis a baisigogo'otis, osi on askibubu auris wat on sabu sebibebeyis, osi auris on abikakafun. 11 Osi sabu on totor unrufotes men nanaba sabu sinibebeyes mes. Yabin osi on bobo nanaba sebiyamai sabu awawas nanatus mat asi goa amosi serur auris ato asi baibebe men on nanaba sitbibebeyis on fetag sebibebeyes sebikomasis. Osi atonio bobo nanaba sefofour sabu sebisigoes ato asi agim sekakabainauis. 12 Osi tous asi orot aubairuruotin tani on Crete nua emon on iyau, “Crete sabu nan semama on baisigogo'otis, osi sabu komasis, rega foro ba. Osi on nokonokois, asi gogoi on bayu wat si’nam sinmama.” 13 Atonio dura aifan Crete an aubairuruotin iyau on dura bag. On yabinai om on dura wawaninai nan Crete sabu unawures onai osi asi not on unikitabiren dura maiauin aurin on sinfaskikin sinitutum. 14 Osi sabu nan on men Jew yangan asi baisigogo dudur on sintatam mes a mat Jew yangan men osi sabu sinawures nanaba sinafour mes. Osi Jew yangan on bobo nanaba sefofour ato dura maiauin an baibebe aurin on sisisiwei. 15 Sabu matafis auris God matanai abiabi engon on obis wat, ato sabu komasis auris God matanai on abiabi engon auris on komasis wat, yabin osi moas a asi not engon on dumais wat. 16 Osi sebikakafun sau on God sisagobai, baise asi yawasai bobo komasis sefofour, nan on osi totor wat God men sisagobai. God matanai ato osi bobo sefofour on komasin bag, ato osi God aurin mat on men sebifonabo. Ato osi sabu nanaba on men fofonin arimon bobo obin tani siniyamai on.

Copyright information for `UBR