Hebrews 8

8:1-13

Pulu Yemone Ungu Konde Se Nimba Panjipa Mi Lierimumunga Yesusi Mulu-Koleana Popo Tondoli Ye Awili Olandopamo Molemomonga Ungu Se

Nane ‘⸤Pulu Yemone nimba taltopa⸥ ‘Olionga popo tondoli yemo molopili.’ nirimu.’ nikiru akumunga ungu-pulumu i-sipa: Ye nindu kanu-sili ye se olionga popo tondoli ye awili olandopamo molemo kanumu ⸤mélema pali nokombando⸥ mulu-koleana Ye Nokoli Kingi Awili Olandopamo kolea nokopa molemo polomonga ki-lomekondo pumba molemo. Akuna molopa yu mulu-koleana gilimú ⸤serele-ulkamonga⸥ suluminia paa kake sélimunga olionga nimba Pulu Yemo popo tondopa molemo. ⸤Yu aku kongonomo sendepa molemo⸥ serele-ulka akumu Pulu Yemo molemo serele-ulka sikamo. Akumu ye sene naa takorumu, Ye-Awilimu yuyu takorumu.

⸤Yu mulu-koleana gilimú serele-ulkamonga suluminia akuna selemomonga pulumu i-sipa:⸥ Pulu Yemo popo tondoli ye awili olandopamane ⸤Mosisini sirimu ungu-manemone nirimu mele pilkuli sengendo⸥ Pulu Yemo popo toko we-mélema kinia kongi méle kalolima kinia mengo ongo siringi, akumunga, ye Pulu Yemo popo tondoli ye nokoli awili olandopa ⸤pe orumu ye Yesusi⸥ nikiru akumuni Pulu Yemo popo topa ⸤meme peli⸥ mélse naa silkanje manda naa selka akumunga yuni kepe mélse popo topa sirimula. Aku-na-kolo ma-koleana Pulu Yemo popo tondoli ye ungu-manemone nilimú mele pilkuli Pulu Yemo popo toko kongi mélema kalko silimili yema molemelemonga kanu yemo yu ma-koleana molkanje Pulu Yemo popo tondoli ye se naa molka. Kanu yemane popo tondoli kongono selemele akumu Pulu Yemo molemo mulu-koleana selemo kongonoma none sepa, mulu-koleamonga minimu mele none seko molemele. Akumunga, Pulu Yemo mana molomba serele-ulkamo Mosisini kokele takomba serimu kinia Pulu Yemone yu mane sipa nimbale:

“Nane mulú Sainai ola
Mosisi nu lipu ora sindu aku sipa mele
mélema pali paa sumbi siku manda manjiku sani.”
nirimu.
⸤Akumu sika na-kolo⸥ kanu yemanga Pulu Yemo popo tondoli kongonomo paa maniandopa. Pulu Yemone Yesusindu ‘Sei.’ nimba sirimu popo tondoli kongonomo paa peanga olandopa. Yunga kongonomo olandopa selemomonga pulumu i-sipa: Pulu Yemone olio-kinia ungu konde nimba panjipa mi lierimumu Yesusi awi-suku-singina gilipa ‘Pulu Yemo-kinia olio-kinia konopu seluna pupili molangi.’ nimba lipa tapondolemo yemone ‘kamu wendo opili.’ nimba senderimu, aku ungu kondemo olandopala. Ungu kondemone ‘olio simbú.’ nimba panjilimú aku mélema olandopa, ungu umuni ‘simbú.’ nirimu aku mélema maniandopa, akumunga, ungu kondemo olandopa.

8:7-13

Pulu Yemone Ungu Konde Nimba Panjipa Mi Lierimu Ungumu Olandopa, Ungu U Nimba Panjipa Mi Lierimu Ungumu Maniandopamonga Ungu Se (8:1-13 pali)

Piliame! Pulu Yemone nimba panjipa mi lierimu ungu-umunga tondolomo pelkanje Pulu Yemone kelepa ungu se naa nimba panjilka. ⸤Ungu-umunga tondolomo pelkanje Pulu Yemone yomboma seringi mele kanopa kiri naa pilka.⸥ Aku-na-kolo yombomane seringi mele Pulu Yemone kanopa kiri pilipa nimbale:

“Na Ye-Awili ⸤Yawe⸥ne ⸤onondo⸥ nimbuli:
“⸤Piliaa!⸥ Nane Isirele yomboma-kinia
Juda yomboma-kinia ungu konde se
nimbu panjipu mi lembo walemo wendo ombá.
I ungu konde nikiru akumu
u ononga anda-kolepalima kolea Isipi wendo lipu
ultu membo orundu walemonga
kanu yomboma-kinia
nimbu panjipu mi lierindu mele selu-sipa mólo.
Nane ono-kinia ungu nimbu panjipu
mi lierindu ungumu naa pilieringimunga
nane ‘Ono molko kinjangi.’ nimbu lipu bulu sirindu.
10 Isirelene kalopa liltimu yomboma-kinia
kelepo sembó mele pe ungu konde se
nimbu panjipu mi lembo, akumu i-sipa:
⸤‘Ono seko molonge kinia
nane ono kanopo peanga pilimbu.’ nirindu mele
‘konopumuni pilku kondangi.’ nimbu⸥
nanga ungu-manema ononga konopuna pepili panjindipu,
‘Nanga ungu-manema konopu mondoko ‘Pilipu samili.’
ningu molangi.’ nimbu nane kanu ungu-manema
boku mele ononga konopuna imbi tombo.
Na mindi ono pilku popo tonge Pulu Yemo molombo,
ono nane nokombo yomboma molonge.
11 Aku walema wendo ombá kinia
yombo kamako imbi molombama kepe,
koropa imbi naa molombama kepe, akumane pali
⸤‘Na Ye-Awilimu.’ ningu⸥ kanoko imbi singímunga
yombomane ononga kandi pulu lemó yomboma kepe
ulka kere-pongolo penge yomboma kepe
‘Ye-Awilimu molemo mele piliangi.’ naa nimulú.
Ono pali na pilku pora singímunga kelko ningu naa singí.
12 Nane ono kondo kolopo
onone seko kinjingí uluma mundupu kelendepo
ononga ulu-pulu-kirima
kelepo paa naa pilimbu.” nimbu
na Pulu Ye Awilimuni nikiru.”
nirimu.

13 Pulu Yemone pe olio-kinia nimba panjipa mi lierimu ungu akumu “Ungu kondemo” nirimu ungu akumuni u Isirele yomboma-kinia nimba panjipa mi lierimu ungu u akumu yuni ‘Kamu nondopa mania pumbá sekemo.’ nimba nirimu. Pe kiniá olio pilielemolo, méle u se kamu nondopa mania pumbá sekemo mele, akumu sika nondopa kamu pora nimbá.

Copyright information for `UBUANDELALE