Luke 1

1:1-4

LLukuni Yesusinga Semanemo Kokele Pulu Polopa Tombando U-Pulu-Pulu Boku Torumu Semanemo

Ye paa awili Tiopillas, olio molemolo koleana Yesusi kinia ungu wendo orumuma pulu-pulu wendo orumu kinia kanoko, yandopa wendo orumuma kanoko andoko moloringi yombomane pe olio semane toko siringi mele, aku semanemo ‘Sika.’ nimbu kuru mondolemolo kanumu yombo awisilini ‘Aku semanemo bokuna kamu molopili tamili.’ ningu boku toringi.

Akumunga pe kelepo nane kepe ‘ ‘Semanemonga pulumu paa pilipu kondambo.’ nimbu u-pulu-pulu wendo orumu mele kepe yandopa ungu lupa-lupama wendo orumu mele kepe akuma pali mangilipu pilipu kondopo molorundu-na nane ‘Aku ungumando yombo marene Tiopillas nundu semane toko ungu-mane silimili mele aku sipa wendo orumu uluma nu piliani.’ nimbu, ‘Nane nundu ungumanga pali paa sika wendo orumu mele semane topo nimbu siembo.’ nimbu, boku topo nu simbú kinia peanga.’ nimbu pilipuli aku semanemo topo i bokumu tokoro.

1:5—2:52

Ellisapetene No Lindeli Jono Merimu Mele Kinia Mariane Yesusi Merimu Mele Kanu Ulutolonga Semane Mare

1:5-25

Mulu-Koleana Angello Sene No Lindeli Jono Menge Mele Kinia Molopa Semba Mele Nimba Sirimu Semanemo

Ye Nokoli Kingi Erote kolea Judia nokopa molorumu kinia Pulu Yemo popo tondorumu ye se molorumu, yunga imbi Sekaraya. Pulu Yemo popo tondoringi yombomanga talape senga imbi Apaya, Sekaraya yu kanu talapemonga ye se. Sekaraya menu ambo Ellisapete Pulu Yemo popo tondoringi yemanga talape senga ambo se. Olonga pea pulu-pulu anda-kolepamo Pulu Yemo popo tondoringi yemanga pulu-pulu ye nokoli awili Erono. Aku ambo yetolo moloringili mele Pulu Yemone kanopa ‘Yombo sumbi nilitolo.’ nimba kanorumu. Olone yunga ungu-manema kinia “Yomboma saa.” nirimu unguma pali pilku liku seko kondoko moloringili. Aku-sipa na-kolo Ellisapete we simbu perimu, bolango se naa meringili. Olo we ambu-anda leko moloringili.

Walte Sekarayanga talapemone Pulu Yemo popo toko kaloringi kongono senderingi kinia yu kepe pea Pulu Yemonga kumbikerena kanu kongonomo senderingi. Aku sendeko molkole niringimuni, Pulu Yemo popo tondoringi yemane seringi mele sengendo ononga talapena ye se Pulu Yemo popo toko kaloringi ulka-tembele akumunga kisipina sukundu ‘Nawe pumba muna tolemo paura-kekumu yombomanga nimba kalondombanje piliamili.’ ningu kou-kate seringi. Aku sekole ‘Sekaraya yu kanu kongonomo sendemba.’ ningu kanoringi-kulu yu ulka-tembele kisipina sukundu pumba muna toli paura-kekumu kalondo-purumu. 10 Aku sepa gilierimu kinia ulka-tembelena we-yomboma maku toko Pulu Yemo popo toringi koleana yombo awisili Pulu Yemo kinia ungu ningu gilieringi.

11 ⸤Sekaraya muna toli paura-kekumu kalondopa gilierimu kinia⸥ kanu paura-kekumu kalondo-pu-pu seringi polomonga ki-lomekondo Ye-Awilimunga angello se omba mona gilierimu kanorumu. 12 Akumu kanopale pungu-pungu nimba pipili awili sepa kolorumu.

13 Kanu-kinia angellomone yundu nimbale: “Sekaraya, pipili naa kolou.” nirimu. “Nu Pulu Yemo kinia mawa seleno mele Pulu Yemo yuni pilierimu. Nunga ambomo kango se kanopa limba. Yunga imbi “Jono” ningu sieni. 14 Yu molombamonga nu konopu awili seko siku kamelé akoko moloni. Yu mengele kinia yombo awisili konopu singí. 15 Ye-Awilimuni yu kanopa ye awili peangamo nimba kanomba. No-waene kinia no-tondoloma kinia waltikele kepe paa naa nopili. Anumunga olona we sukundu molomba kinia Pulu Yemonga Mini Kake Sélimu omba yunga konopuna molopa manda sembá.

16 Isirele yombomane ononga Ye-Awili Pulu Yemo liku bulu siringi yombomanga awisili Jonone sembamonga kelko konopu topele toko Ye-Awili Pulu Yemo pea kelko pilku seluna sere leko konopu seluna pupili molonge. 17 ⸤Pulu Yemone ungu-umbu tondorumuma pilipa yomboma nimba sirimu ye⸥ Illainja tondolo pepili uluma sepa molorumu mele Jono yu aku sipa tondolo pepili uluma sepa molomba. Aku sipa tondolo pepili uluma sepa molombamonga lapalini konopu topele toko bolangoma kelko konopu mondongela; Pulu Yemonga ungu-manema pilku mokoli selemele yombomane konopu topele toko, konopu sumbi nili yombomane selemele mele ‘aku sipu samili.’ ningu molongela; Jono yuni sembamonga Ye-Awilimu ombá kinia Ye-Awilimu yunga ungumu sumbi siku pilku lingí yombo talape se molongela.” nimba angellomone Sekarayando nirimu.

18 Aku nirimu kinia pilipale Sekarayane angellomondo mangilipa nimbale: “Aku nikinumu nambi sepo nane ‘Sika nikinu.’ nimbu pilimbuye?” nirimu. “Na anda lepo nanga ambomo ambu lierimu kanumu. Pe i nikinumu nambi sepa wendo ombámondo nikinuye?” nirimu.

19 Angellomone pundu topa nimbale: “Nanga imbi Geperiele. Na Pulu Yemonga kumbikerena giliu. I kiniá nundu nikiru mele Pulu Yemone “Aku siku ni-pou.” nimba lipa mundomu-na nundu ombo i semane peangamo topo sikiru. 20 Aku-sipa na-kolo nane “Kango mengele.” nikirumu ‘Kolo tokomonje?’ ningu kuru naa mondokono kene i ungumu u wendo naa opili nu ungu naa nili moloni. Pe “Wendo ombá.” nikiru mele amboma bolango olona mondokole melemelemanga walema omba pulimú mele aku sipa walema omba pumbá kinia i nikiru ungumu paa sika wendo ombá.” nirimu.

21 Aku siku ungu ningu giliangili Sekaraya ulka-tembelemonga kisipina sukundu koronga-u pumba molopa, welea wendo naa orumu-kulu yomboma ulka-tembelemonga ultukundu yu nokoko gilieringima konopu awisili kimbu siringi. 22 Kanu-kinia yu wendo ombale nirimumuni, ungu se kerena manda naa nimba kimuni mindi manda manjipa gilierimu kinia kanokole, ‘Sekaraya yu kisipina sukundu molopale melse omba gilieli none sepa kumbikere lipa pinjemu-na kanomu.’ konopu lieringi.

23 Pe ulka-tembelena yunga kongono walema pora nirimu kinia yunga ulkando purumu. 24 Ulkando pumba ⸤ambo Ellisapete kinia peko moloringili kinia⸥ pe Ellisapete bolango olona mondorumu. Mondopale oli se-pakara ‘Yombomane yu naa kanangi.’ nimba lopi sepa molorumu. 25 Yuni nimbale: “Kiniá na-kinia ungu sekemomo Ye-Awilimuni nanga nimba sendekemo. Na bolango se naa merindumunga yomboma na kanoko kiri pilieringi kinia pipili kolorundumunga Ye-Awilimu yuni na kondo kolomu lémo.” nirimu.

1:26-38

Mulu-Koleana Angello Sene Mariane Yesusi Memba Mele Nirimu Semanemo

26 ⸤Ellisapete bolango olona mondopili oli se-pakara kolopa⸥ talo-pakara sipamo ke topa gilierimu kinia Pulu Yemone mulu-koleana angello Geperiele kolea Gallilli disiriki Nasarete taonona lipa mundorumu. 27 Kanuna ambo-wenepo se, ye se kinia u naa peli we molorumu ambo-wenepomo molorumuna lipa mundorumu. Kanu ambo-wenepomo yunga pulu lierimu yombomane ‘Yu ye se pupili.’ ningu ala sinderingi yemonga imbi Josepo. Kanu yemo yunga anda-kolepa se ⸤ye nokoli kingi⸥ Depiti. Ambo-wenepomonga imbi Maria.

28 Maria molorumuna angello Geperiele omba yundu nimbale: “Ambomo, nu molonuna na okoro. Pulu Yemone nu paa sepa peanga sikimumunga nu maloya. Ye-Awilimu nu-kinia pea kopu seko molembele.” nirimu. 29 Aku-sipa na-kolo kanu ungumu pilipale yu konopu awisili kimbu sipale, ‘A! I nikimumu nambolka unguri nimba nikimunje?’ nimba pilierimu.

30 Angellomone yundu nimbale: “Maria, Pulu Yemone nu kanopa peanga pilkimu kene pipili naa koloyo. 31 Pílie. Nu pe olona kango se mondokole menimu. Mengole yunga imbimu “Yesusi” ningu sieni. 32 Yu ye nokoli molomba, yu imbi leko ‘Paa Olandopa-Ye Molemomonga Malo.’ ningíla; Ye-Awili Pulu Yemone ‘Yunga anda-kolepa Depiti Isirele yombomanga ye nokoli kingi tondolomo molorumu mele yu aku sipa molopili.’ nimbála; 33 ononga anda-kolepa Jekopone kalopa liltimu yomboma yuni supulka nokombala; Yu ye nokoli kingi awilimu molopa mindi pumbá.” nirimu.

34 Mariane angellomondo nimbale: “I nikinu ulumu nambi sepa sembamondo nikinuye? Na ye se naa purundu kanumu.” nirimu.

35 Angellomone yundu nimbale: “Nu molonina Paa Olandopa Yemonga Mini Kake Sélimu omba nunga olona kango se mondondomba. Aku sembamonga kango nuni menimu yu kango kake sélimu molomba; yu imbi lekole ‘Pulu Yemonga Malo’ ningíla. 36 ⸤Pulu Yemone nu “Sembó.” nikimu mele sika sembá. Ulu tondolo se “Sembó.” nimbale serimu mele niembo.⸥ Nunga pulu lemó ambo Ellisapetendo “Ambo simbu pelemo.” nilimili-na-kolo kiniá yu ambo-ambu liepili oli se-pakara kolopa talo-pakara sipamo ke topa giliepili yu kango se olona mondokomo kanumu. 37 Pulu Yemone ulu manda naa sembá ulu se paa naa pelemo. Yuni uluma pali manda selemo kanumu.” nirimu.

38 ⸤Angellomone yundu aku sipa nirimu kinia pilipale⸥ Mariane nimbale: “Na Ye-Awilimunga kongono kendemande ambomo molio. Nuni nikinu mele Pulu Yemo yuni na-kinia aku sipa sepili.” nirimu.

Kanu-kinia angellomone Maria mundupa kelepa yu purumu.

1:39-45

Maria Yunga Pulu Lierimu Ambo Ellisapete Pumba Kano-Purumu Semanemo

39 Mulu-koleana angellomone Mariando ungu nimba pora sipale kelepa purumu kinia pe Maria kolea Judia disiriki pumba ma-pangi senga ola taono se lierimuna purumu. 40 Pumba akuna ye Sekarayanga ulkana sukundu pumbale ambo Ellisapete kanopa “Na okoro.” nirimu kinia kanguloringili.

41 Ellisapetene Marianga ungumu pilierimu kinia Ellisapete yunga olona bolangomo pukua topa ola mania serimu pilierimu. Kanu-kinia Pulu Yemonga Mini Kake Sélimu Ellisapetenga konopuna pumba molopa manda serimu kinia “I-siku i-siku ni.” nirimu mele 42 Ellisapetene ungu tondolo sepa nimba nimbale:

“Ambo molemelemanga pali nu maloya. Ambomanga pali Pulu Yemone nu olandopa sepa peanga sirimu. Bolango nu olona mondolenomo kepe yuni sepa peanga simbala.
43 Na ambo kiri se molonduna nanga Ye-Awilimunga anumu nu onumunga na konopu awisili kimbu sikiru. Aku senumunga na-kinia seko peanga sikinu. 44 Nu ongole “Na okoro.” ninu-na komumuni piliendu kinia nanga olona molomu bolangomo paa konopu sipa pukua topa ola mania semu. 45 Ye-Awilimuni nundu nirimu ungumu pilkuli ‘Sika nikimu. Yuni “Sembó.” nikimu mele sika aku sembá.’ ningu kuru mondorunumunga yuni nu sepa peanga sikimu mele sepa peanga simba kene nu konopu siku molani.” nirimu.

1:46-56

Pulu Yemone “Ono Nokopa Kondomba Ye Se Lipu Mundumbu.” Nimba Taltorumu Ye Nokoli Karasimu Mariane Membá Mele Pilipale Konane Nimba Pulu Yemo Kape Nirimu Semanemo

46 Ellisapetene nimba pora sirimu kinia Mariane nimbale:

“Pulu Yemo nanga Lipa Tapondopa, Mindili Nombo
Molopo Kinjiliu Aulkana Wendo Lipa,
Manda Molopo Kondombo Aulkana
Lipa Mondomba Yemo kinia
na konopu paa awili sepo sikirumunga
nanga konopumuni
Ye-Awilimu kape nimba
imbi ambolopa paka tondokomo.
48 Pulu Yemo yuni yunga we-ambo-kendemande kirimu
siye naa kolopa konopu kimbu sirimumunga
nanga konopumuni aku sipa yu kape nikimu.
Yombomane pe pe kepe kalko lingí yombomane nando
“Pulu Yemone nu sepa peanga sikimu.
Nu maloya.” ningí.
49 ⸤Ye⸥ Tondolo Pulimuni na ulu tondoloma senderimumunga
nando aku siku ningí.
⸤Ye⸥ Tondolo Pulimu yu ye kake sélimu.
50 Yu-kinia pipili kolko pilku limili yomboma
yuni kondo kolopa molemo.
Onone pe pe kepe kalko lingíma kepe
kondo kolopa molopa mindi pumbá.
51 Yuni yuyu ulu tondoloma serimu.
Yombo kara pungu ononga konopuna
onono kape ningu molemele yomboma
yuni anju anju topa makoropa mundulimú.
52 Yomboma yombo-kamako molko
koleama nokoko molemelema
yuni topa mania mundupa,
yomboma ononga imbima
ono onono topa mania mundumbama
yuni ononga imbima ambolopa paka tondolemo.
53 Gelene kololemele yomboma yuni
‘Olo sepili.’ nimba kere-langi peangama sipa,
yombo kamakoma méle seluri kepe naa sipa
“We paa.” nimba makorolemo.
54 Yuni olionga pulu-pulu anda-kolepalimando
“Sembó.” nimba, nimba panjerimu ungumu
komu naa sipa pilipa molopale
anda-kolepa Eporayamo kinia,
Eporayamo yuni
yandopa yandopa kalopa liltimu yomboma kinia,
onondo “Sembó.” nimba,
nimba panjerimu mele sembando
olio Pulu Yemo yunga kendemande
Isirele yombo molemolo akuma yuni
kondo kolopa lipa tapondomba sepa molemo.”
nirimu.

56 Maria Ellisapete kinia pea molangili oli yopoko omba purumu kinia pe Maria yu yunga ulka-koleando kelepa purumu.

1:57-66

Ellisapetene Kango Jono Merimu Semanemo

57 Ellisapete bolango membá walemo wendo orumu kinia yuni kango se kanopa liltimu. 58 Yunga ulka kere pongolo yomboma kinia yunga pulu lierimu yomboma kinia Ye-Awilimuni yu kondo awili sepa kolorumu mele pilkuli ono yu pea konopu siku moloringi.

59 Wale yopoko-pakara kangomo kanopa lipa taltopa molorumu kinia wale engaki-sipamonga yomboma sukundu sukundu ongo maku tokole yunga kangi se kopisiku makaye seko wendo liku eltokole niringimuni, yunga imbimu yunga lapanga imbi manda manjiku “‘Sekaraya’ niemili.” niringi.

60 Aku-na-kolo kangomonga anumuni “Mólo.” nimbale “Yunga imbi ‘Jono’ nimulú.” nirimu.

61 Onone yundu ninguli: “Olonga pulu lemó yombo senga imbi aku sipa naa molemo.” niringi.

62 Kanu-kinia onone “Lapane nambolka konopu lekemone, yunga imbi lepa nawe nimbáne, mangilipu piliamili.” ningu lapando kimuni manda manjeringi kinia 63 yuni pundu topa kimuni manda manjipa “Boku se siee.” nimbale, yuni bokuna topa nimbale: “Yunga imbi Jono.” nirimu. Akumu kanokole yombomane paa konopu awisili lieringi. 64 Kanu-kinia waltikele Sekaraya yunga kerena kelepa ungu nimbale Pulu Yemo kape nirimu.

65 Aku serimu-na kanokole yunga ulka kere pongolo yombomane pipili paa koloringi. Kolea Judia disiriki ma-pangima polorumu koleamanga pali aku semanemo mindi tolko puringi. 66 Aku ungumu pilieringi kinia yombomane pali konopu kimbu siku ninguli: “Ungu akumu we naa selemo. Ye-Awilimu i kangomo-kinia molombamonga aku sekemo lémo.” ningu pilkuli “I kangomo pe nambi sepa molombanje?” niringi.

1:67-80

Sekarayane Nirimu Konanemo

67 Mini Kake Sélimu Jono lapa Sekarayanga konopuna omba molopa manda serimu kinia Sekaraya yuni Pulu Yemone ungu-umbu tondorumu ungu se pilipa, pe wendo ombá mele yomboma nimba sipa nimbale:

68 “Ye-Awilimu, Isirele yombomanga Pulu Yemo,
yu kape nimbu imbi ambolopo paka tondamili.
Yu omba yunga yomboma lipa tapondopa
umbuna sene ono ambolorumu-na
mindili nongo moloringi kanu umbunamonga
wendo límu-na pilipuli
yu kape nimbu imbi ambolopo paka tondamili.
69 Pulu Yemo yuni yunga kendemande-ye
⸤olionga ye nokoli kingi⸥ Depitini
kalopa liltimu yombomanga ye tondolo peli se
olio ‘Lipa tapondopa mindili nombo
molopo kinjilimulu aulkana wendo lipa,
manda molopo kondomolo aulkana
lipa mondopili.’ nimba simu.
70 (Yuni ungu-umbu tondorumuma pilku
yando ningu siringi yemane pe sembamondo
koronga-u ninguli:)
71 “Yuni olio lipa tapondopa
olionga opa-touma topa mundundupa,
olio kanoko kiri pilku mindili silimili yomboma
‘Aku siku naa sangi.
Wendo ongo manda molangi.’ nimba
aku siku selemele aulkana wendo limba.”
niringi mele
kiniá aku sembá sekemo.
72 Olionga anda-kolepalima kondo kolopa,
olionga pulu-pulu anda-kolepa Eporayamo-kinia
“Sembó.” nimba, nimba panjipa mi lierimu mele
“komu naa sipu, nirindu mele sambo.” nimbale
aku sembá sekemo.
74 ‘Pipili naa kolko, nanga kongonomo
tondolo munduku sendeko, konopu kake sepili molko
nane kanopo peanga pilkiru unguma mindi
mana seko mololko pangi.’ nimbale
olionga opa-toumane olio toko mindili silimilima
‘Naa sangi. Olio we molamili.
Lipu tapondopo tokomele aulkana wendo limbu.’
nimba, nimba panjipa mi lierimu mele
‘Sambo.’ nimbale aku sekemo.”
⸤nirimu.⸥

76 “Nanga kango ⸤Jono⸥,
nu kumbi leko pungu Ye-Awilimu ombá aulkamo
akisindenímunga pilkuli ningímuni,
yombomane pe nundu ‘Olandopa Molemo ⸤Ye⸥monga
ungu-umbu tondolima pilipa
yando nimba sili yemo.’ ningí.
77 ‘Ye-Awilimu yunga aulkamo akisindambo.’ ninguli
nuni yunga yombomando i-siku ningu sini:
“Ye-Awilimu yuni ononga ulu-pulu-kiri selemelema
‘Mania pupili.’ nimba siye kolopale
ono lipa tapondopa
mindili nolemolá aulkana wendo lipa,
yu-kinia pea molko kondonge aulkana lipa mondomba.”
ningu, aku ungumu onondo ningu sini.
78 Pulu Yemone olio kondo awili sepa kolopale
olio simbulu tolina molopo kololi aulkana molomoloma
konopu pe nipili molomolo aulkana
‘Manda kanoko pangi.’ nimba
‘Pa sendepili.’ nimba olio molemolona
pa sendélimu lipa mundukumu.”
nimba Sekarayane nirimu.

80 Kango Jono yu akopa konopu tondolo pumba manda molorumu. Yu pe Isirele yombomanga kumbikerena kongono sepa molombando u kolea ku lielina pumba molorumu.

Copyright information for `UBUANDELALE