Luke 2

2:1-7

Mariane Yesusi Merimu Semanemo

⸤Jono pamemo molopili⸥ Romo Gapomano Ye Paa Awili Kumbina ‘Sisa Okasitasi’ nílimuni ungu-mane se nimba panjipale “Romo gapomanomone nokolemo koleamanga molemele yomboma pali imbi liemili.” nirimu. (Kiriniasi kolea Siria poropinji nokorumu yemo molopili Romo gapomanomone yombomanga imbima pulu-pulu liltimu.) ⸤Ungu-mane akumu Okasitasini nimba panjerimu kinia⸥ yomboma pali ononga anda-kolepalimane kalko liltingi koleamanga yu-mele-mele ono puringi.

Ye Josepo kolea Gallilli disiriki Nasarete taonona molopa, ⸤Romo ye nokolimuni ‘Yomboma imbi liemili.’ nirimu⸥ pilipale nirimumuni, Nasarete mundupa kelepa, yu kalopa liltimu anda-kolepa Depiti u perimu kolea Judia disiriki pumba Betellieme taonona purumu. Akuna “Oltonga imbitolo liengi pambili.” ningu yu nondopa limba ambo Maria kinia olo akuna puringili. Maria ulka pélimu pea puringili. Betellieme sukundu punguli, yombo ponenge ongo pe-pu-pu seringi ulkamo sengepea serimu-kulu ⸤olo kongi dongi kinia kaoma panjeringi ulkana pungu peringili. Akuna peringili kinia⸥ Maria bolango mini torumu. Pe kango se kanopa liltimu. Aku kangomo yunga komolayemo. Kanopa lipale mulu-wambale marene lipa kangomo okopa, kongimanga langi noringi okolo senga suku taltorumu.

2:8-15

Mulu-Koleana Angello Se Mania Omba Kongi Sipisipi Tapu-Ye Mare Ye Nokoli Karasimu Meringi Mele Nimba Sirimu Semanemo

⸤Betellieme⸥ ultukundu kongi sipisipi tapu-ye mare era kaliamanga ipulieli ononga sipisipima tapu seko moloringi. Kanu-kinia ono moloringina Ye-Awilimunga angello se omba mona gilierimu kanoko, Ye-Awilimunga pa tondolo-sepa sélimu omba ono moloringi koleana pa serimu kanokole, ono mini-wale awili seko mundoringi.

10 Aku-na-kolo angellomone nimbale: “Nane ono semane peanga se topo simbú okoro kene pipili naa kolayo. I semanemo yomboma pali konopu singí semanemo. 11 Kiniá ⸤u molorumu ye nokoli kingi⸥ Depitinga taonona ambo sene kango se memu. Yu Yomboma Lipa Tapondopa Mindili Nongo Molko Kinjilimili Aulkana Wendo Lipa, Manda Molko Kondonge Aulkana Lipa Mondomba Kangomo; yu Pulu Yemone “Ono nokopa kondomba ye se lipu mundumbu.” u nimba taltorumu ye nokoli Karasimu; yu Ye-Awilimu. 12 Sika nikiru molo kolo tokoronje ono pungu kanangi mele nimbu siembo. Bolango kiki se mulu-maminiane okoko, kongimanga langi noringi okolo senga taltongemo pungu kanoko lendenge. Aku siku kanoko lendekole nane ‘Sika nimu lémo.’ ningu pilingí.” nirimu.

13 Aku nirimu kinia popenge seko mulu-koleana angello paa awisili u orumu angellomo gilierimuna ongo mona gilkuli niringimuni, Pulu Yemonga imbi ambolko paka tondoko yu kape ningu ninguli:

14 “Mulu-Koleana Paa Olandopa Pulu Yemonga imbi
paa ola molopili.
Mana-yombo yuni kanopa peanga pilielemo yomboma,
konopu peanga pepili molangi.” niringi.
15 Aku ninguli ono kongi sipisipi tapu-yema munduku kelko mulu-koleana kelko olando puringi.

2:15-21

Kongi Sipisipi Tapu-Yema Yesusi Mengo Taltoko Moloringi Mele Pungu Kano-Puringi Semanemo

Angelloma kelko mulu-koleana olando puringi kinia sipisipi tapu-yemane anju yando ninguli: “Olio Betellieme pumbu i ungu kiniá wendo okomo mele Ye-Awilimuni nimba simu ungu kanumu kano-pamolo.” niringi.
16 Aku ninguli popenge seko punguli niringimuni, Maria Josepotolo moloringili kanoko, bolango kikimu kongimanga langi noringi okolona suku lierimu kanoko lenderingi. 17 Yu kanokole, u angellomone ono aku bolangomondo nimba sirimu mele yomboma ningu siringi.

18 Kanu-kinia sipisipi tapu-yemane ningu siringi mele pilkuli yombomane konopu awisili kimbu siringi. 19 Aku-sipa na-kolo Maria i unguma kinia ulu wendo orumuma pali konopuna panjipale, pe kepe konopu kimbu sipa molorumu.

20 Sipisipi tapu-yema kelko yando ongole niringimuni, angellomone nimba sirimu mele pali pilku kanoringimunga Pulu Yemo kape niliku yunga imbi ambolko paka tondoleko yando oringi.

2:21

Yesusi Imbi Siringi Semanemo

21 Kangomo kanoko liku taltoko molangi wale yopoko-pakara omba purumu kinia wale engaki-sipamonga yunga kangi se kopisiku makaye seko wendo likuli, anumuni yu olona naa mondopili angellomone nirimu mele pilkuli yunga imbi “Yesusi” ningu siringi.

2:22-38

Josepo Kinia Mariatolo Kango Yesusi Mengo Jerusallemendo Pungu Ulka-Tembelena Sukundu Puringili Kinia Ulu Mare Wendo Orumu Semanemo

22 Maria ⸤bolango merimumunga⸥ “Yu kalaro molemo.” niringimunga walema pora nimba, yu kamu kake sepili molomba walemo wendo orumu kinia, Mosisini ungu-mane sirimu se pilku liku sengelendo Josepo kinia olo kolea-awili Jerusalleme punguli niringilimuni, kake sepili molongelendo Pulu Yemo popo toko kalo-puringili. Ye-Awilimunga ungu-mane se u sirimu perimu akumu i-sipa:

⸤ ‘Ambo sene bolango kanopa lipale
ambomo yu pena pemba mele molomba.
Pena pemba walema pora nimbá kinia
kake sepili molombando⸥
kera waembono mele talo molo kera imili mele talo
Pulu Yemo popo topa kalopa sipili.’
nimba ungu-mane aku sipa nimba perimu kanumu pilkuli sengelendo puringili. Ye-Awilimunga ungu-mane nimba perimu se pea pilku liku sengelendo puringilila. Aku ungu-manemo i-sipa:

‘Kango komo kanoko lingíma pali
“Ye-Awilimunga” ningu yu siengi.’
nimba perimu kanumu. Aku ungu-manemo nimba perimu-kulu pilkuli ‘Oltonga kango komomo Pulu Ye Awilimu siembili.’ ninguli Jerusalleme pungilíndu Yesusi mengo puringilila.

25 Ye-anda se Jerusalleme molopili olo puringili, yunga imbi Simiono. Yu sumbi nirimu yemo; yu Pulu Yemonga ungumu pilipa alieli Pulu Yemo kinia ungu nirimu yemo; yu Isirele yomboma konopu seluna pupili molangi omba sendemba yemo kanombando nokopa molorumu; Mini Kake Sélimu yunga konopuna sukundu molorumu. 26 Mini Kake Sélimuni yundu ungu se u nimbale: “Nu u we naa koloni. Nu u Ye-Awilimuni “Ono nokopa kondomba ye se lipu mundumbu.” nimba taltorumu ye nokoli Karasimu kanokole pe koloni.” nirimu. 27 Mini Kake Sélimuni Simiono yu lipa mundorumu-kulu yu Pulu Yemo popo toko kaloringi ulka-tembelena purumu.

Kanu-kinia Yesusi anumu lapatolo ungu-manemone kangomando “Saa.” nimba sirimu mele sengelendo kango Yesusi mengo ulka-tembelena sukundu puringili kinia
28 Simionone omba kangomo kangulupa lipa Pulu Yemonga imbi ambolopa paka tondopa nimbale:

29 “Ye Awili Tondolo Olandopamo,
yomboma lipa tapondopa
mindili nolemolá aulkana wendo lipa
nu-kinia pea molko kondonge aulkana
lipa mondomba ye sikinumu
na kiniá nanga mongone kanokoro kinia
u nando ningu panjerinu mele wendo okomo kene
kiniá na nunga kendemande-yemo
konopu pe nipili kolombo.” nirimu.
31 “‘Kanu lipa tapondopa wendo lili ulumu
koleamanga pali yombomane kanangi.’ ningu sekeno.
32 Yu Isirele yombomanga ultu
molemele yombomanga pa sendepa,
nunga Isirele yombomanga imbi
ambolopa paka tondombando
pa sendeli mélemo molemo.”
nirimu.

33 Anumu lapatolo Simionone kango Yesusindu nirimu mele pilkuli konopu awisili kimbu siringili.

34 Simionone “Pulu Yemone ono sepa kondopili.” nimba Yesusi anumu Mariando nimbale: “Pílie. I kangomo molombamonga Isirele yombo awisili imbi u molorumuma pe mania pungíla; awisili imbi u naa molorumuma pe kiniá imbi molombala. Yu molomba kinia yombomane kanokole bulu siku ungu-taka tondonge. 35 Ambomo, nu kepe ulu se wendo ombá. Nunga kameléna mindili awili-sepa sembá kinia yombo awisili konopu lenge mele mona lemba.” nirimu.

36 Pulu Yemone ungu-umbu tondorumuma pilipa yomboma nimba sirimu ambo se, yunga imbi Ana, yu Juda yombomanga talape kanga Asa, ye Panuelenga lemenu; yu paa ambo-ambu lierimu; yunga menu yemo pea molangili kalia-ingi yopoko-pakara omba purumu, pe yunga menu kolorumu kinia yu ambo-wayamo molorumu. 37 Yu mana molopili yunga kalia-ingi paono kise kelepa yopoko omba pumba paono kise kelepa kise sipamonga yu we molorumu. Yu ulka-tembelemo mundupa naa kelepale alieli kanuna mindi molopa ipulieli kepe tangoli kepe Pulu Yemo popo topa imbi ambolopa paka tondombando alieli kere-langi naa nomba Pulu Yemo kinia ungu nimba mawa sepa mindi molorumu. 38 Simionone Yesusindu ungu nimba molopili ono moloringina kanu ambomo yu ombale ⸤Pulu Yemone kanu kangomo Juda yomboma sirimumunga⸥ Pulu Yemo kinia “Ange, papu sekeno.” nirimu. Kanu-kinia pe Jerusalleme yomboma lipa tapondopa, umbuna sene ono ambolorumu-na mindili nongo moloringi kanu umbunamonga wendo limbando ombá yemo ‘Ombá.’ ningu nokoko moloringi yombomando Ana yuni kango akumu orumu mele kinia sembá mele kinia nimba sirimu.

2:39-40

Josepone Yesusi Anungulu Memba Kelepa Nasaretendo Purumu Semanemo

39 Josepo Mariatolo olone Ye-Awilimunga ungu-manetolo nimba perimu mele pali pilku liku sekole niringilimuni, olo Yesusi kinia kelko kolea Gallilli disiriki pungu olonga kolea kanga Nasarete yando oringili.

40 Kangomo akopa enge nimba molopa yunga konopuna pilipa kondoli awisili omba pepili molorumu, Pulu Yemone yu kanopa peanga pilipa yu sepa kondorumu.

2:41-52

Kango Yesusi Ulka-Tembelena Pumba Serimu Semanemo

41 Juda yombomane kalia-ingi senga senga kolea-awili Jerusalleme ongo akuna sukundu Pulu Yemone ononga anda-kolepalima Naa Topa Ola We Omba Purumu mele pilku ulu mare seringi kanu walema Yesusi anumu lapatolo kepe ‘Kanu walemo piliambili.’ ningu kalia-ingi senga senga Jerusalleme olando puringili. 42 Kango Yesusi molopili yu kalia-ingi engaki rurepo omba purumu kinia kanu walemo ‘Pulu Yemonga wale.’ ningu koro moloringi walemo kelepa wendo orumu kinia alieli Juda yomboma Jerusalleme puringi mele Yesusi anumu lapatolo kinia yu kinia pea olando puringi.

43 ⸤Jerusalleme pungu⸥ kanu ulumu pilieringi walema pali pora nirimu kinia anumu lapatolo ulka-koleando pungilí puringili kinia kango Yesusi anju molorumu olo naa kanoringili. 44 ‘Olionga yombo mare kinia okomo.’ konopu leko wale selumunga we punguli niringilimuni, pe ipupini kolea kalá torumu kinia pungu aulkana pengendo olonga pulu lierimu yomboma kinia we-yomboma kinia pea pungu moloringimando mangilku piliku andoko kororingili. 45 Yu naa kanoko lendekole Jerusalleme kelko pungu koro-puringili.

46 Wale talo koroko kelkole niringilimuni, pe wale yopoko-sipamonga ⸤Pulu Yemo popo toko kaloringi⸥ ulka-tembelena pungu kanoringili kinia yu akuna sukundu molorumu kanoko lenderingili. Yu ungu-manemanga puluma pilku mane siringi yema kinia pea moloringi, yuni ononga ungu niringima pilipale, anju onondo ungu mare mangilipa pilierimula. 47 Yu onone niringima mimi sipa pilierimu mele kepe, pundu topa nimba kondorumu mele kepe, yombo moloringimane pilkuli onone ‘Yunga pilipa kondoli paa pepamo.’ ningu pilku konopu kimbu siku mini-wale mundoringi.

48 Olone yu kanu ulkana molorumu pungu kanokole pungu-pungu ningu anumuni yundu nimbale: “Kangomo, olto kinia pea pamili ou naa oli, nambi semu-na senuye? Lanie olto mini-wale mundulipu nu andopo koropo keliembulu.” nirimu.

49 Aku nirimu kinia yuni anumu lapatolondo nimbale: “Olo ⸤koleamanga pali⸥ nambi semu-na na andoko korongiliye? ‘Na ya Tatanga ulkana molemo.’ konopu naa liengiliye?” nirimu. 50 Aku-na-kolo yuni nirimu ungu-pulumu olone naa pilieringili.

51 Yu olo kinia Nasarete taono maniando pumbale nirimumuni, olonga unguma pilipa sengena panjipa molorumu. Yunga anumuni kanu uluma konopuna panjipa pilipa mindi molorumu.

Yesusi yu akomba akorumu kinia yu pilipa kondoli olandopa olandopa pemba perimu; Pulu Yemo kinia yomboma kinia yu kanoko paa peanga pilku moloringila.

52 

3:1—4:13

Yesusini Yunga Kongonomo Sembá Aulkamo Wendo Ombándo Ulu Mare Wendo Orumu Mele Semanema

Copyright information for `UBUANDELALE