Revelation of John 7

7:1-8

Isirele Yombo Wane Anderete Poti Po Tausini Pulu Yemone Ononga Mambelena Kongilina Serimu Semanemo

Akumu kanopole pe kelepo kanorundu kinia ma-kolea pundu kisenga angello kise gilku, mana tolemo poporome kise ‘Ma kinia nomu-kusa kinia unju kinia akumanga poporome naa topili.’ ningu ambolko gilieringi. Kanu-kinia kelepo angello se kanorundu, yu ena mundi olemokondo Konde Molopa Mindi Puli Pulu Yemone yunga yomboma kongilina semba mele yunga imbi molemomo memba orumu. Kanu angellomone angello kise ‘Ma kinia nomu-kusa kinia seko kinjangi.’ nimba engemo sirimu angellomando tondolo ru nimba nimbale: Mamo kepe nomu-kusamo kepe unjuma kepe u mélse seko naa kinjangi. U olionga Pulu Yemonga kendemande-yombo molemelemanga mambelena olio andopo ⸤‘Ono Pulu Yemonga yomboma ningu kanangi.’ nimbu⸥ kongilina samili. ⸤Pe kolea seko kinjangi.⸥” nirimu. Kanu-kinia yombo kongilina seringimanga kambu toringimu pilierindu. Isirelene kalopa liltimu yombo talape rureponga pali wane anderete poti po tausini kongilina seringi.

Judane kalopa liltimu yombo talapemonga
tuwellepo tausini kongilina seko,
Rumbenene kalopa liltimu yombo talapemonga
tuwellepo tausini kongilina seko,
Getene kalopa liltimu yombo talapemonga
tuwellepo tausini kongilina seko,
Asane kalopa liltimu yombo talapemonga
tuwellepo tausini kongilina seko,
Napatallaini kalopa liltimu yombo talapemonga
tuwellepo tausini kongilina seko,
Manasane kalopa liltimu yombo talapemonga
tuwellepo tausini kongilina seko,
Simionone kalopa liltimu yombo talapemonga
tuwellepo tausini kongilina seko,
LLipaini kalopa liltimu yombo talapemonga
tuwellepo tausini kongilina seko,
Isakane kalopa liltimu yombo talapemonga
tuwellepo tausini kongilina seko,
Sepullanone kalopa liltimu yombo talapemonga
tuwellepo tausini kongilina seko,
Josepone kalopa liltimu yombo talapemonga
tuwellepo tausini kongilina seko,
Benjaminini kalopa liltimu yombo talapemonga
tuwellepo tausini kongilina seringi.
⸤Yombo talape ima Pulu Yemonga kongilinamo liltingi yomboma.⸥

7:9-17

Yombo Paa Awisili Wale-Pakoli Kake Seli Suluma Pakoko Pulu Yemonga Imbi Ambolko Paka Tondoko Kape Niringi Semanemo

Akumu kanopole, pe kelepo kanorundu mele i-sipa: Yombo paa awisili, yombo sene paa manda kambu naa tomba mele, moloringi kanorundu. Aku yomboma ono kolea lupa-lupa yomboma, talape lupa-lupa yomboma, kangi lupa-lupa gilieli yomboma, umbu-ungu lupa-lupa lieli yomboma moloringi. Ye nokoli kingi polona yakondo gilku, Sipisipi Walomonga kumbikerena gilieringi. Ono wale-pakoli kake seli suluma pakoko kipi-gomo ambolkole niringimuni, 10 tondolo munduku ninguli:

“Olione Pulu Yemo
ye nokoli kingi polona molemo yemo yu kinia
Sipisipi Walomo kinia olone
olio liku tapondoringilimunga
mindili naa nombo molopo kondolemolo.”
niringi.

11 Ye nokoli kingi polomo kinia, ye nokoli towapu kinia, méle konde mololi méle kise kinia, akuma sukuna molangi angelloma pali gilku liku makapu sekole ye nokoli kingi polona kumbikundu tamalu peko Pulu Yemo kape ningu 12 ninguli:

“Paa sika aku serimu.
Kape nili ulumu kinia,
tondolo pa seli ulumu kinia,
pilipa kondoli pelemo ulumu kinia,
ange nili ulumu kinia,
imbimu paa olandopa mololi ulumu kinia,
yu mélema pali nokomba tondolomo kinia,
yu paa enge olandopa pelemo ulumu kinia,
aku uluma pali yu-kinia mindi
kamu pepa mindi pupili.
Paa sika aku sipa sepili.”
niringi.

7:13-17

Kanu Yombomanga Mindili Noringi Uluma Pora Nirimu Semanemo (7:9-17 pali kana)

13 Kanu-kinia ye nokoli towapu selu kanumanga sene na mangilipa nimbale: “I yombo wale-pakoli kake seli sulu pakokomelema nameleye? Kolea sena molkole oringiye?” nirimu.

14 Nane pundu topo yundu nimbuli: “Nanga awilimu, na naa pilkiru. Nu pilkinu.” nirindu.

Yuni nimbale: “I yomboma ononga opa-toumane mindili siku umbuna awisili siringi walemanga mindili paa awili seko noringi yomboma. Ono ononga wale-pakoli suluma Sipisipi Walomonga mememone kulumiye toringi-na kake sekemo.
15 Akumunga,

“Ono Pulu Yemonga ye nokoli kingi polo
kumbikundu gilku,
yunga ulka suluminia paa kake selina
ipulieli tangoli kongono senderingi.
Ye nokoli kingi polona molemo yemo
ono-kinia kopu sepa molopa ono nokomba.
16 Pe-pe kepe ono kelko
gelene naa kolko no nonowalene naa kolko,
enane naa nomba, sepe molo mélsene
ononga kangimu naa nopili molonge.
17 Sipisipi Walomo
ye nokoli kingi polona suku-singina molemomo
yuni ‘ono nanga sipisipima’ nimba
ono tapu sembamonga
ono aku siku manda molko kondonge.
‘Ono no nangi.’ nimba
konde molopa mindi puli no pikilimúmanga
memba pumbá.
Pulu Yemone ‘Ono kelko kola naa sangi.’ nimba
kolama pali kulu tondomba.”
nirimu.

Copyright information for `UBUANDELALE