Romans 10

10:1-15

Pulu Yemone Ulu Serimumanga Pulumu Isirele Yombomane Naa Pilieringi Ungu Se (9:30—10:21 pali)

Ango-keme, ‘Nanga pulu lemó Isirele yomboma mindili nolemolá aulkana wendo ongo, yu kinia pea molko kondonge aulkana pangi.’ konopu lepo ⸤na Pollone⸥ Pulu Yemo alieli mawa sepo molio. Onone Pulu Yemone “Saa.” nilimú uluma ‘Tondolo mundupu samili.’ ningu selemele mele na kanopo manda nimbu simbú-na-kolo Pulu Yemone kanopa peanga pilielemo uluma naa pilku kondolemele akumunga aku sipu mawa sepo molio. Pulu Yemone ‘yombo sumbi nilima.’ nimba kanolemo mele naa pilku, ono onono pilku ‘I-sipu semolo kinia yombo sumbi nilima molomolo.’ ningu pilku seringi. Akumunga ‘Pulu Yemone ono ‘yombo sumbi nilima’ nimba kanolemo ungumu samili.’ naa niringi. Karasini ‘Yomboma ⸤ ‘Na sika lipa tapondopa, mindili nolemolá aulkana wendo limú.’ ningu⸥ kuru mondolemele yomboma pali Pulu Yemone ‘yombo sumbi nilima’ nimba kanopili.’ nimba ⸤Mosisini Pulu Yemonga⸥ ungu-manema ⸤sirimuma⸥nga tondolomo Karasini ‘mania pupili.’ nirimu kanumu.

Mosisini sirimu ungu-manema pilku liku senge yomboma Pulu Yemone ‘yombo sumbi nilima’ nimba kanomba mele Mosisini boku topa nimbale:

“Ungu-manema ⸤pali⸥ pilku kondokole
sumbi siku senge yomboma
aku sengemonga molko kondoko mindi pungí.”
nirimu.
Aku-na-kolo ‘⸤Yesusi Karasi⸥ sika ⸤nanga nimba senderimu⸥.’ ningu kuru mondolemelemonga Pulu Yemone ‘yombo sumbi nilima.’ nimba kanombamonga ungu se i-sipa molemo:

“Ono onono konopumane pilkuli,
‘Nawene ( ‘Karasi mana mania lipu membo wambo.’
nimba) mulu-koleana ola pumbaye?’
ni naa niengi.”
ungu se aku sipa molemo.
Molo i-siku ningí:

“‘Nawene (Karasi kelepa kololi koleana
wendo lipa memba ombándo)
yombo kololima pulimili koleana
mania pumbaye?’ ni naa niengi.”
nimba molemo.

⸤Aku sipa ungumu manda mólo. Pulu Yemone yombo sumbi nilima nimba kanolemomonga⸥ ungumu nambolka nimba molemoye? I-sipa nilimú:

“Ungumu ono-kinia nondopa molemo.
Ononga keremanga molopa konopumanga pelemo.”
nilimú. Aku ungu nirimumu ‘⸤Ye Nokoli Karasimu⸥ sika ⸤olionga lipa tapondólimu⸥.’ nimbu kuru mondolemolo ungumu olione andopo nimbu silimulu ungu kanumu. Akumu i-sipa:
Onone sumbi siku “Yesusi yu ⸤nanga⸥ Ye-Awilimu.” ningu siku, ononga konopumanga ‘Yu kolorumu kinia Pulu Yemone yu óno-koleana topa makisinderimu.’ ningu kuru mondonge kinia Pulu Yemone lipa tapondopa ono mindili nolemolá aulkana wendo lipa, yu-kinia pea molko kondonge aulkana lipa mondomba. 10 Konopumane ⸤ ‘Yesusi sika nanga nimba kolondorumu kinia Pulu Yemone sika yu topa makisinderimu. Yu nanga Ye-Awilimu.’ ningu⸥ kuru mondolemele yomboma aku siku kuru mondolemelemonga Pulu Yemone ono kanopale, ononga ulu-pulu-kirima siye kolopa ono ‘yombo sumbi nilima.’ nimba we kanolemo. Konopumane ningu pilku kuru mondolemele mele ‘Yomboma piliangi.’ ningu keremane ningu silimilimunga Pulu Yemone ono lipa tapondopa mindili nolemolá aulkana wendo lipa yu-kinia molko kondonge aulkana lipa mondolemo. 11 Akumu Pulu Yemonga bokuna ungu se molemo mele i-sipa:

‘ ‘Yu sika ⸤lipa tapondomba.
Yu-mambele molopo kondombo⸥.’ ningu
kuru mondolemele yombomane
⸤yuni sika lipa tapondombamonga⸥
pe ‘Yu kolo tokomo.’ ningu
konopu kiri panjingí aulka se naa lemba.’
nilimú.
12 Bokuna ‘kuru mondolemele yomboma’ nilimú akumu Juda yombomando mindi naa nilimú. Juda yomboma naa molemele yombomando kepe pali nilimú. Ye awili selumu olionga pali Ye-Awilimu akumunga olio pali selu sipa nokolemo. Ye-Awilimu yu mangilku ‘Na liku tapondou.’ ningu mawa selemele yomboma pali awili-sepa sepa kondolemo.

13 “Ye-Awilimu imbi leko mangilku
⸤ ‘Liku tapondou.’ ningu⸥ mawa selemele
yomboma pali yu sika lipa tapondopa
mindili nolemolá aulkana wendo lipa
yu-kinia pea molko kondonge aulkana
lipa mondomba.”
akumunga olio pali selu sipa nokolemo.

14 Aku liemu ‘Yu sika. ⸤Yuni sika lipa tapondopa mindili nolemolá aulkana wendo limba.⸥’ ningu kuru naa mondokole “Liku tapondou.” ningu nambi seko yu mangilingíye? Yuni ononga nimba senderimu, yu molemo mele semanemo naa pilkuli ‘Yuni lipa tapondomba.’ ningu nambi seko kuru mondongeye? Yombo sene yuni ononga nimba senderimu, yu molemo mele nimba naa simba kinia ono nambi seko pilingíye? 15 “Ungumu ningu si-paa!” nimba lipa naa mundumba kinia ono nambi seko ungumu pungu ningu singíye? Aku sipa Pulu Yemonga bokuna ungu se molemo, akumu i-sipa:

“Yomboma ungu peangamo ningu singíndu
kimbu kongono seko olemele akuma
yombo paa peangama.”
nilimú.

10:16-21

Isirele Yombomane Pulu Yemonga Semane Peangamo Pilku Naa Liltingi Ungu Se (9:30—10:21 pali)

16 Aku-sipa na-kolo Isirele yombo mare semane peangamo pilku naa liltingi. Akumunga Aisayane nimbale:

“Ye-Awilimu, nunga ungu andopo nimbu sirimulumu
namelene ‘Sika.’ ningu kuru mondoringiye?”
nirimu.
17 Akumunga, Pulu Yemonga ungu ningu silimili pilielemele aku ulumuni yombomane ‘⸤Karasi⸥ sika. ⸤Yuni sika na lipa tapondopa mindili nolka aulkana wendo limba.⸥’ ningu kuru mondolemele aulkamo akisindilimú. Ungu ningu silimili pilielemele akumu Karasinga ungumu.

18 Aku-sipa na-kolo nane mangilipuli: ‘Isirele yomboma ono ⸤i ungumu⸥ naa pilieringiye?’ nimbu mangilkiru. Mólo, ⸤aku naa nikiru⸥. Ono paa sika pilieringi. ⸤Akumu Pulu Yemonga bokuna ungu se molemo:⸥

“Keremanga niringi unguma yombo moloringi
ma-koleamanga pali wendo omba purumu.
Ononga unguma koleamanga pali pilieringi.”
⸤ungu se aku sipa molemo.⸥
19 Kelepo ungu se mangilipuli: ‘Isirele yomboma i ungumunga pulumu naa pilieringiye?’ nimbu mangilkiru. Mólo. Paa sika pilieringi. Mosisini ⸤Isirele yombomando Pulu Yemonga⸥ ungu se nirimumu u niembo:

⸤Pulu Yemone onondo nimbale:⸥
“‘Yombo talape imbi naa mololima.’
⸤ningu kanolemele⸥ yomboma
⸤sepo kondombo kinia⸥
molko kondongemonga kanokole
ono Isirele yombomane
kanu yomboma-kinia konopu kiri panjiku
⸤ ‘ ‘Ono maloya. Olio aku sipa sepa kondopili kene
Pulu Yemonga ungumu pilipu
yu bulu naa siemili.’ niengi.’ ⸥ nimbú.
⸤Ono Isirele yombomane⸥
‘Yombo talape konopu naa peli
molko kinjilimili yomboma.’
⸤ningu kanolemele⸥ yomboma
na Pulu Yemone ⸤lipu tapondombo kinia⸥
molko kondongemonga kanokole
nane ‘ono Isirele yombomane akuma kanoko
mumindili kolko,
⸤ ‘Olio aku sipa sendepili
yu molemona pamili⸥.’ niengi.’ nimbú.”
nirimu.
20 ⸤Sika Isirele yombomane ‘Olio manjipu Pulu Yemonga yomboma molemolo.’ ningu pilieringi-na-kolo⸥ Aisayane kepe aku sipa ⸤Isirele yomboma⸥ pipili naa kolopa ⸤Pulu Yemonga⸥ ungu se ⸤Isirele yombo talape ultukundu yombomando⸥ sumbi sipa nimbale:

“Na ‘koropo kanamili.’ naa niringi yombomane
na kanoko lenderingi.
Na ungu se mangilku naa pilieringi yomboma
‘Na kanangi.’ nimbu ono moloringina
ombo mona molorundu.”
nirimu.
21 Isirele yombomando Aisayane ⸤Pulu Yemonga⸥ ungu se pea nimbale:

“Nanga ungumu naa pilku liku,
kara pulimili yombomando
nane alieli “Wangi.” nimbu
koronga-u kepe kiniá yandopa kepe
kangulupu limbu sepo giliu.”
nirimu.

Copyright information for `UBUANDELALE