Acts 14

14:1-7 (14:1-5) Pollo Banapasiselo Akoniamo Taono Andokolo Ungu Ningu Siringili Kinie (14:5-7) ‘Kouni Tomolo.’ Niringi Pilkululie Kowa Puku Kolea LLikonia Poropinji Puringili Temanemo

Pollo Banapasiselo Akoniamo taono pukululie niringilimuni, alieli taono tenga sukundu pukululie teringili mele aku siku Akoniamo kepe Juda yemboma maku toko Pulu Yemonga ungumu pilieringi ulkena sukundu pukulu ungu mane siringili. Ningu kondoringili kulu pilkulie Juda yemboma kinie yembo lupema
14:1*bokumunge alsena anjokondo “14. Grik”.
kinie enonga yembo awisili ‘Yesusi molopa terimu mele nikimbili ungumu paa sike.’ ningu tondolo munduku pilieringi.
14:1**bokumunge alsena anjokondo “8. bilip”.
Nalo ‘Kolo tokombele.’ ningu ungu naa pilieringi Juda yembomane yembo lupema teko mumindili kondoko kondi toringi kinie yembo lupemane Pollo kinie Banapasiselo konopu keri panjeringi. Pollo Banapasiselo wale awisili Akoniamo taono molko ‘Awilimunge’ ningulu ungu pipili naa kolkolo tondolo munduku niringili kinie, Pulu Yemone ‘Nane yembo we kondo kololi ungu nindikimbilimu ‘Paa sike nikimbili.’ ningu, pilku liengi!’ nimbe ‘Elone ⸤aku sipe mele⸥ lipe ora simbe ulu tondolo
14:3*ungu pulu te Jono 2:11*.
awisili teangili.’ nimbe lipe tapondorumu kinie ulu tondolo awisili teringili. ‘Elone ulu tondoloma tengele kinie yembomane kanokolie, ‘Paa sike Pulu Yemonga ungumu nikimbili lepamo.’ ningu piliengi!’ nimbe Pulu Yemone ‘Aku siku ulu tondoloma teangili.’ nirimu.

Kanu kinie aku taonona yemboma konopu talo teko panjiku moloringi. Marene “Juda yembomane nikimilimu sike nikimili.” niringi, marene “Pollo Banapasiselone nikimbilimu sike nikimbili.” niringi. Juda yemboma kinie yembo lupema kinie enone ‘Pollo Banapasiselo tepo kenjipu kouni tamili.’ ningu langi niringi nalo langi niringi mele pilkululie elo kowa pukulu kolea LLikonia poropinji pukulu kanune LLisira taono kinie Depi taono kinie kolea nondopa lierimu koleamanga pali andokolo temane peangamo we toko siliku andoringili.

14:8-20 (14:8-18) LLisira Taono Pukulu Ungu Ningu Siringili Kinie (14:19-20) Pollo Kouni Toringi Temanemo

LLisira taono ye te kimbu tambulolimu molorumu. Anumuni merimu kinie kimbu tambulolimu merimu,
14:8*inie yakondo 3:2-8.
walsikele kepe aulke naa andorumu.
Pollone ungu nirimu mele pilipe molorumu. Pollone yu neme-neme nimbe kanopalie, ‘Pulu Yemone na manda tepa konde limbe.’ nimbe pilipe molorumu kanopalie, 10 tondolo mundupelie yundu nimbendo: “Nu kimbu kambilku ola angiliei!” nirimu. Kanu kinie ye kanumu walsikele kimbu kambilipe ola angilipe purumu.

11 Pollone ye kimbu tambulorumumu tepa konde lsimu kanokolie yembo maku toko moloringimene enonga LLikonia ungu leko ningendo: “Olio popo tolemolo pulu yemanga ye talo manie ongo mana ye alekolo olio molemolona okombele lepamo.” niringi. 12 Pollo ungu awisili nirimu kulu kanokolie ‘Yu pulu ye Emisi’ niringi.
14:12*Enone ‘Pulu ye Emisi yuni pulu yemanga pali ungu umbume yembomando nimbe sili pulu yemo.’ ningu pilkulie Pollo ‘yu Emisi’ niringi kanumu.
Banapasi Pollo kinie tapu toko oringili kulu kanokolie ‘Yu pulu ye Susi.’ niringi.
14:12**‘Susi yu pulu yemanga pali lapa.’ ningu pilkulie aku niringi kanumu.
13 Kolo toli pulu ye Susi kanumunge tamandu ulkemo
14:13*Tamandu ulkemo kinie ulke tembeleselonga ungu pulumu telu. ‘Pulu ye te olio kinie tapu topa molombando aku ulkena molemo.’ ningu Pulu Yemo popo tondoringi yemane akune puku popo toko melema kalondoringi.
kanu taonona ulsukundu angilierimu, yunge ala yemo kongi kao pelea pokore kinie pillawa sindi mulkewe pokore kinie lipe ‘Elo asipu popo topo kongime kalopo siemili.’ nimbe taono pala kerepulune memba orumu.

14 Nalo Yesusini “Nanga kongonomo tende-pale.” nimbe lipe mundorumu ye
14:14*bokumunge alsena anjokondo “1. aposel”.
Banapasi kinie Polloselone tenge teringi mele pilku keri pilkululie elonga wale pakolime liku sungu sikulu,
14:14**‘Elo olio nokolembele pulu ye popo tolemoloselo’ ningu elo popo tonge teringi paa kanoko keri kanokololie aku teringili.
yemboma maku toringine lkisiku ru niliku pukululie ningelendo:
15 “Yema, aku ulumu nambemune tekemeleye? Olto eno mele, mana yeselo mindi. Temane peangamo eno topo simbolo ombulu. Eno pulu ye kolo toli koropama munduku siye kolko, kanu mele koropama bulu siku, mulu kinie ma kinie nomu kusa kinie melema pali tepa, yu yuyu konde molemo Pulu Yemonga ungumu ‘Pilku liengi!’ nimbululie, nimbu simbolo ombulu kanumu. 16 Ou sike yembo lupe lupema enonga konopuni pilku ulu teringime Pulu Yemone kanopa we siye kolopa, teko molonge kinie yu kanopa peanga kanomba mele kamu naa nimbe para sirimu. 17 Nalo ou Pulu Yemone ‘Na molio mele naa piliengi!’ nimbe melema pali lopi naa terimu. Yuni olio ‘Nane eno kondo kolopo tepo kondolio mele kanangi.’ nimbe ‘Lo manie omba langi peangama wendo opili, eno nongo kapola tendeko konopu siku molangi.’ nimbe aku sipe terimu.” nirimu. 18 Elone aku niringili nalo yembomane ‘Elo pulu yeselo.’ ningu popo toko kongime kalonge teringi ulume ‘Munduku siye kolangi.’ ningulu tondolo munduku karaye teko “Molo!” niringili kinie munduku siye koloringi.

19 Kanu kinie Akoniamo taono kinie kolea Pisidia poropinji lierimu Andiyoko taono kinie moloringi Juda yembo mare LLisira taono ongolie eno kondi toringi kinie enone Pollo kouni tokolie, ‘Kolomu.’ konopu leko yunge onomo kunduku liku meli puku taonona ulsukundu toko lteringi. 20 Nalo Yesusinge lombili andoli yemboma yu lierimune ongo kakapu teringi kinie yu ola angilipe kelepa taonona sukundu purumu.

14:20-21 Depi Taono Kamu Puringili Temanemo

Opalikundu Banapasi kinie Depi taono puringili.
21 Akune temane peangamo toko siringili kinie yembo awisili Yesusinge ungumu pilku lsingi.

14:21-28 Depi Taono Munduku Siye Kolko, Siria Poropinji Kolea Awili Andiyoko Kelko Yando Oringili Temanemo

Pe elo kelko LLisira taono yando ongolo, Akoniamo taono ongolo kolea Pisidia poropinji lierimu Andiyoko taono oringili.
22 Kanu taonomanga Yesusinge lombili andoli yemboma “Pulu Yemo ye nomi kingi molopa nokolemo koleana
14:22*bokumunge alsena anjokondo “20. kingdom”.
ou naa pupu ya mana molopolie Kirasinge yemboma molemolomonga mindili nombo umbunema memolo nalo ‘Paa sike Pulu Yemo nokopa molemo koleana pambo.’ ningu yunge ungumu munduku siye naa kolko, tondolo munduku pilku molaa.” ningu silikulu oringili.
23 Pollo Banapasiselone taonomanga pali Kirasinge yembo talapemanga tapu yema
14:23*bokumunge alsena anjokondo “43. sios”, “16. hetman”.
mako tondokolo, Pulu Yemo kinie ungu ningu mawa tengelendo langi mi toko naa nongololie ningelendo: “‘Awili
14:23**bokumunge alsena anjokondo “6. Bikpela”.
⸤Yesusi Pulu Yemone ‘Eno nokopa kondomba ye te lipu mundumbo.’ nimbe mako torumu ye nomi Kirasimu omba sike lipe tapondopa mindili nolemela aulkena wendo lsimu.⸥ Yu sike.’ ningu tondolo munduku pilimele yemo eno nokopa kondopili.” niringili.

24 Kolea Pisidia poropinji ongololie, pe kolea Pambillia poropinji sukundu ongolo, 25 kanune Peka taono ongo yemboma ungumu ningu silikulu, Atelliya taono oringili.

26 Atelliya taono munduku siye kolko, sipine kelko kolea Siria poropinji lierimu kolea awili Andiyoko
14:26*Andiyoko ungu pulu te inie yakondo 13:14*.
kamu oringili. Ikongono teko lsingili kongonomo ou pulu polko tengele mele yembomane “Pulu Yemone ikongonomo sikimu yuni elo kondo kolopa lipe tapondopili ikongonomo te-pale.”
14:26**inie yakondo 13:43.
ningu liku mundoringi kolea awili
14:26***inie yakondo 13:1-3.
kanune kongono teko pora sikululie kelko sukundu oringili kanumu.
27 Kanune ongo molkololie, Kirasinge yembo talapemo liku maku tokolo, Pulu Yemone elo lipe tapondorumu kinie teringili mele kepe, Pulu Yemone Juda yembomanga ulsukundu molemele yembo lupemane yunge ungumu pilku liku yunge koleana manda punge aulkemo akisinderimu mele kepe, temane toko siringili. 28 Kanu kinie elo akune Yesusinge lombili andoli yemboma
14:28*bokumunge alsena anjokondo “10. disaipel”.
kinie wale awisili pea moloringi.

Copyright information for `UBUKALA