Matthew 17

17:1-13 Yesusinge Kalumu Te Lupe A Lierimu Temanemo
17:1-13 Temanemo*Mako 9:2-13, LLuku 9:28-36. 17:9,12 Yesusini yu tonge nirimu mele ungu pulu te inie yakondo 16:21-28*.

Yesusini ⸤yu lombili andolimendo aku sipe nimbe sirimu kinie⸥
17:1*ungu pulu te inie nondopa 16:28**.
pe koro te omba purumu kinie Pita keme Jemisi keme Jemisi angenu Jono keme eno lipe meli pupe mulú
17:1**‘Mulú akumu mulú Emono’ ningu pilimele, akumunge manda manjeli olando sipe nane tausini wane anderete pit (9 100), molo sikisi tausini tu anderete mita (6 200) mele lierimu. Aku liemo yu mulú Molie mongone kanolemolo mele.
paa olandopa polorumu tenga ola purumu. ‘Olio oliolio mindi molamili.’ nimbe eno akune lipe memba purumu.
Akune puringi kinie eno kanoko molangi yunge kangimu alowa tepa, yunge kumbikeremo ena tondolo topa yembomanga mongo takele telemo mele pa awili-tepa tepa, yu pakorumu mulumbalema pa telemo mele aku sipe kake terimu. Yu aku sipe molopili, ⸤Juda yembomanga koronga-ou moloringili ye awili talo,⸥ Mosisi kinie Illainjaselo ongolo Yesusi kinie ungu ningulu mona angilieringili kanoringi.

Kanu kinie Pitane Yesusindu nimbendo: “Awilimu, olio ya molopamolo peanga lepamo. Nuni “E.” ninu liemo, ulke takaye yepoko takondombo. Te nunge, te Mosisinge, te Illainjanga takondombo.” nirimu. Yuni aku sipe nimbe molopili kupe tondolo pa teli te omba eno aki torumu kinie kupena suku ungu te wendo ombalie nimbendo: “I yemo nanga konopu mondolio Malomo.
17:5*bokumunge alsena anjokondo “32.2. Pikinini Bilong God”.
Yu kanopo paa peanga kanolio. Yuni ungu nimbéma pilku liengi.” nirimu.

Aku nirimu pilkulie yu lombili andoli ye ⸤yepoko⸥ paa mini-wale mundukulie mana manie molko tamalu peringi. Eno tamalu peringine Yesusi omba eno ambolopalie nimbendo: “Mini wale naa munduku ola angiliee.” nirimu. Pe olando siku kanoringi kinie Yesusi yuyu molorumu kanoringi.

Mulú polorumumunge manie onge oringi kinie Yesusini eno mane sipelie nimbendo: “Enone kinié kanongi mele isili-ou yembo teluri kepe ningu naa siengi. Pe mindi, Manie Omba Mana Ye A Lierimu Yemo kolopalie lomboropa ola molomba kinie temanemo toko anjo siengi. Ou molo!” nirimu.

10 Aku nirimu kinie pilkulie yu lombili andolimene ⸤yu sike molorumu mele ningu kanokolie⸥
17:10*Yesusi Mosisi kinie Illainja kinie moloringi kanokolie ‘Yesusi yu Pulu Yemone “Lipu mundumbo.” nimbe, nimbe panjerimu yemo lemo.’ ningu pilieringinje.
yundu walsiku pilkulie ningendo: “⸤Pulu Yemone ‘olio nokopa kondopa lipe mundumbo.’ nimbe mako torumu mako torumu ye nomi Kirasimu nu liemo⸥ Pulu Yemonga ungu manemanga pulume pilku mane silimele yemane “I llainja ⸤kelepa⸥ kumbi lepa ombá. ⸤Ye nomi Kirasimu pe akilipe ombá.⸥” nilimele mele
17:10**Yembomane Mallakai 4:5-6 molemo ungumu pilkulie aku siku ningu pilieringi.


nambemune nilimeleye? ⸤Illainja kelepa naa opili nu koronga orunu moleno kanumu.⸥” niringi.

11 Yesusini topondopa nimbendo: “‘‘I llainja ⸤kelepa⸥ kumbi lepa ombalie melema pali tepa mimi temba.” nilimele kanumu sike nilimele. 12 Nalo ⸤akumunge ungu te pea nimbu sikirula.⸥ Pilieme. Illainja koronga orumu. Yu orumu kinie ⸤kanu yemane⸥ yu kanoko imbi naa siku ‘Yu we yere.’ konopu lekolie ‘Yu-kinie temolo.’ ningu pilieringi ulume pali teringi.
17:12*Ou-Kingime 19:2,10.
Aku siku mele Manie Omba Mana Ye A Lierimu Yemo
17:12**bokumunge alsena anjokondo “32.3. Pikinini Bilong Man”.
mindili liku singela.”
17:12***Aisaya 52:14, 53:1-12.
nirimu.

13 Aku sipe nirimu kinie pilkulie lombili andolimene ‘No Lindeli Jonondo nikimu.’ ningu pilieringi.
17:12-13*inie yakondo 11:14. Jono ka siku toko kondoringi temanemo inie yakondo 14:3,10. Yesusi yu kepe toko kondongela nimbelie nirimu.


17:14-21 Yesusini Kuru Te Makororumu Temanemo
17:14-21 Temanemo*Mako 9:14-29, LLuku 9:37-42.

14 ⸤Yesusi kinie yu lombili andoli ye yepoko kinie⸥ eno ⸤mulune manie⸥ ongolie yemboma maku toko moloringine oringi kinie ye te Yesusi orumune omba koporongo langopa 15 mawa tepalie nimbendo: “Awilimu, nanga kangomo kondo koloyo. Yu kuru kopari tolemo-na mindili awili tepa nolemo. Taki-teki yu tepena pupe nomanga pulimo. 16 Nu lombili andoli yema molongine kangomo membo ondu kinie enone yu manda teko konde naa lingi.” nirimu.

17 Aku nirimu kinie pilipelie Yesusini ⸤yemboma iri topalie⸥ nimbendo: “Kinié molemele yemboma eno ⸤‘Pulu Yemone ulume sike manda temba.’ ningu⸥ tondolo munduku naa pilimele. Eno konopu karaye tepa pepili molemele yemboma, na eno wale nambepo mane sipu ulu mare lipu ora simbo kinie mimi siku pilingeye? ⸤Na eno-kinie siye tekemo.⸥” nimbelie

“Na moliona kangomo mengo waa.” nirimu.
18 Mengo oringi kinie Yesusini kanu kurumu iri torumu kinie yu kangomonga ⸤konopune⸥ omba wendo purumu kinie kanu enamonga kangomo manda molorumu.

17:19-21 ‘Pulu Yemonga Tondolomo Na-Kinie Pelemo.’ Nimbu Tondolo Mundupu Pilipulie Manda Temolo Mele Ungu Te

19 Aku terimu kinie kanokolie Yesusi lombili andoli yema Yesusi yuyu molorumune ongo walsiku pilkulie ningendo: “Kuru akumu olione nambemune manda naa makoromuluye?” niringi kinie

20 Yesusini topondopa nimbendo: “⸤‘Pulu Yemone sike olio lipe tapondomba.’ ningu⸥ tondolo munduku naapilimelemonga ulu tondolo i-silime manda naa telemele. Nane eno paa sike nimbu sikirumu: Unjo tenga mongo akumu mele paa kanga nalo kanu mongomo mana mundulimele kinie unjo akopa awi lepa angilimo mele, aku sipe enone ‘Pulu Yemone olionga ungume pilimbe. Olio lipe tapondomba.’ ningu wallo kolte mindi pilkulie ipolemo mulúmundu “Anjo puku ne koleana angiliei.” ninge kinie sike aku sipe pupe angilimbe. ‘Teamili.’ ninge ulumenga ulu manda naa tenge ulu te naa pemba.
17:20*LLuku 17:6, nalo ya mulú polemo tendo nirimu, LLukuni unjo malleperi tendo nirimu. Ungu talo pea Mateyu inie 21:21-22, 13:31. Ya “unjo tenga” nimbe molemo akumu Giriki ungune “unjo masetete” nirimu, akumunge pulumu inie yakondo 13:31-33* Masetete**.
21 (Pulu Yemo mawa teko langi mi toko naa nongolie kuru i-silime yembomanga konopumenga manda makoronge. Ulu tondolo i-silime we manda naa tenge.)” nirimu.
17:21*Pala ( ) akune sukundu molemo ungumu yembo pilipe konginjeli pelemo yembo marene ‘Mateyuni naa torumu. Yembo tene lupe pe torumu.’ ningu pilimele. Aku ungumu mele Mako 9:29 sike molemo.


17:22-23 Yesusini Yu Tonge Kinie Kolopalie Lomboropa Ola Molomba Mele Wale Talo Sipe Nirimu Temanemo
17:22-23 Temanemo*Mako 9:30-32, LLuku 9:44-45, inie yakondo 16:21.

22 ⸤Pe walse,⸥ kolea Gallilli disiriki puku moloringi kinie Yesusini yu lombili andolimendo nimbendo: “Manie Omba Mana Ye A Lierimu Yemo ⸤ka sikulie yu tonge⸥ yema anjo singe kinie
17:22*inie anjokondo 26:45 pulu polopa molemo.
23 enone yu toko kondonge. Kolopalie wale yepoko sipemonga Pulu Yemone yundu ‘Lomboroko ola molou.’ nimbé.” nirimu. Aku nirimu pilkulie enonga konopune sukundu meme kulupi perimu kulu pilkulie paa kondo koloringi.
17:23*Jono 16:6,22.


17:24-27 Pulu Yemo Popo Toringi Ulke Tembelena Yesusini Kou Takisi Torumu Temanemo

24 Pe Yesusi kinie yu lombili andolime kinie Kapeniame taonona oringi kinie Pulu Yemo popo toringi ulke tembelemonga kou takisi
17:24*Wendo Oringi 30:13, Pe Kingime Wale Talo 24:9.
lsingi yema ongo Pita walsikulie ningendo: “‘Nunge ungu mane sili yemone ulke tembelemonga kou takisi tolemo.’ konopu lekemolomo. Sikeye?” niringi kinie
25 Pitane “Tolemo.” nirimu.

Kanu kinie Pita ulkena sukundu pupelie ungu te nimbé terimu kinie Yesusini yu ou walsipelie nimbendo: “Saimono, nu nambolka konopu lekenoye? Ye nomi kingimene kou takisi lupe lupema lingendo namele “Taa.” nilimeleye? Enonga yemboma kinie kou takisi limele molo yembo lupema “Taa.” nilimeleye?” nirimu.

26 Pitane topondopa nimbendo: “Yembo lupemando “Takisi taa.” nilimele.” nirimu.

Aku nirimu kinie pilipelie Yesusini yundu nimbendo: “Aku liemo kingimunge
17:26*Ye nomi kingi Pulu Yemondo nimbe nirimu.
yembomane takisi naa tonge.
27 Nalo takisi naa tombolo kinie ulke tembele-takisi limele yemane olto kanoko keri kanonge kapola naa temba kene
17:27*ungu pulu te Romo 14:20-21.
nomune puku uku mundu-peni. Uku mundukulie oma te toni aku omamonga keremo aká tendeni kinie kou te
17:27**Ponie tenga tenga Juda yemane ulke tembele kou takisi toringi aku koumunge imbi “darakama” nili akumunge talo ningu siringi. Omamonga kerena perimu kou akumu “satata” nili akumu kou darakama kise mele. Kou-mone akuselonga pikisa te ya nondopa molemo.
pemba, aku koumu likulie mengo puku oltonga pea liku tere leko takisi tou.” nirimu.

Copyright information for `UBUKALA