Matthew 28

Kolomongo Awili 28 Yesusi Lomboropa Ola Molopalie Terimu Mele Temanemo
Kolomongo Awili 28 Temanemo*aku terimumunge temane mare Mako 16, LLuku 24, Jono 20-21selo; ungu mare Lipe Mundorumu Yema 1:3-8, Ou Korini 15:4-8.

28:1-10 Yesusi Lomboropa Ola Molorumu Kinie Ambo Talone Yu Kanoringili Temanemo
28:1-10 Temane*akumunge 28:1,5-8 Mako 16:1-8, LLuku 24:1-8, (Jono 20:1).

⸤Juda yembomanga koro moloringi⸥ wale Sambatemo pora nimbe, enonga pulu-pulu kongono walemo
28:1*bokumunge alsena anjokondo “37. Sabat”.
wendo ombando kolea tangombando muni lierimu kinie Makatalla taono ambo Maria kinie, Maria te kinie,
28:1**Amboselonga ungu mare inie yakondo 27:56,61.
pukulu ⸤Yesusinge⸥ onomo noseringi kou kandena ⸤onomo⸥ kanongele puringili.

Awilimunge mulu koleana angello te manie orumu kinie ma jimi-jimi paa tondolo tepa terimu.
28:2*Aku ulumu tewale wendo orumunje? Giriki ungune kanopolie mimi sipu naa pilimolo. Marene ningendo: “Amboselo naa wangili terimu.” nilimele; marene ningendo: “Amboselo oringili kinie terimu.” nilimele.
Angellomone omba kou kandena pupe kou kande kerepulumu pipi siringi koumu wendo lipe perele-marele memba pupe nosipe akune ola molorumu.
Kanu angellomonga kumbikeremo kariapá tepa pa telemo mele pa tepa, mulu pakorumume kalopera topa paa kake telemo mele kake terimu. Yesusi ono kolea nokoringi ami yema angellomo kanoko paa mini-wale munduku pungu-pungu ningulie yembo kololimene ungu naa ningu ulu te naa telemele mele eno aku siku uluri naa teko we moloringi.

Angellomone amboselondo nimbendo: “Pipili naa kolale. Yesusi ‘Kolopili.’ ningu talko unjo perana uku toko panjeringi kanu yemo kanongele okombele na pilkiru. Yu ya naa lemo. ⸤“Kolopolie wale yepoko sipemonga⸥ lomboropo ola molombo.” ou nirimu aku mele temu. Onomo ou lierimu koleamo ongo kanale. Kanokololie popenge teko pukulu yunge lombili andolime i siku ningu siengili: “Yesusi ono koleana lepalie lomboropa ola molopa kolea Gallilli disirikindu kumbi lepa pulimo kene eno akune yu kanonge.”
28:7*,10 Yesusini inie yakondo 26:32 “Tembo.” nirimu mele.
ningu siengili. ⸤Ungu nimbu sindimbondo ondu⸥ kanu ungumu nimbu pora sikiru.” nirimu.

⸤Angellomo aku sipe omba mona molopalie nirimu mele⸥ kanoko pilkululie amboselo pipili kolkolo kamele paa akokolo, aku sipe konopu talo pepili lkisiku pukulu yunge lombili andolime ningu singele puringili. ⸤Lkisiku pungele puringili kinie⸥ Yesusi lipe sinjipe elo aulkena kanopa lipelie “Okombeleye?” nirimu. Kanu kinie elone yunge kimbukundu puku kangulkulu yu kapi ningu imbi liku ola mundundoringili.

10 Kanu kinie Yesusini elondo nimbendo: “Pipili naa kolkololie, elo pukulu nanga angenupilindu ningelendo: “Kolea Gallillindu pangi. Yu akune kanonge.” ni-pele.” nirimu.

28:11-15 Ono Kolea Nokoringi Ami Ye Mare Puku Pulu Yemo Popo Tondoringi Ye Awilimendo Yesusinge Onomo Kou Kandena Ulu Te Wendo Orumu Mele Ningu Si-Poringi Temanemo
28:11-15 Temanemo*nokoringi ungu pulumu inie yakondo 27:62-66.

11 Amboselo kelko yando ongele oringili kinie Yesusinge ono kou kandemo nokoringi ami ye mare kolea awili ⸤Jerusalleme⸥ suku puku Pulu Yemo popo tondoringi ye awilimendo
28:11*bokumunge alsena anjokondo “34. pris”.
ulume wendo orumu mele pali ningu si-poringi.

12 ⸤Pilieringi kinie⸥ popo tondoringi ye awilime, Juda yembomanga ye awilime kinie pea maku tokolie eno kinie ⸤ungu ningulie ningendo: “We yemboma iulume wendo omu mele pilkulie “Yesusi lomboropa ola molomunje.” ninge kene ‘Naa piliengi!’ nimbu nambe-eamolonje?” ningu⸥ kerepale ningulie tenge mele ningu panjikulie niringimuni, ami yema kou mone awisili sikulie 13 enondo ningendo: “Yembomane “Yesusi nambe-emuye?” ningu walsinge kinie enone i siku niengi: “I pulueli uru pemulu kinie yunge lombili andolimene kiyengo ningu ongo yu liku meli pungi.” niengi. 14 “⸤Olio Juda yemboma nokolemo Romo⸥ gapomano ye nomimuni ⸤aku tengi mele⸥ ungu te piliemu liemo ‘Eno mongo naa liengi!’ nimbu olione enonga lipu tapondopo yu-kinie ungu nimolo, kanu kinie ‘Enone ono koleamo mimi siku naa nokoko we uru pengi.’ konopu lembamonga mongo naa linge.” niringi.

15 Aku niringimunge pilkulie ami yemane kou mone liku enone “Niee.” niringi mele yembomando niringi. Akumunge yandopa kinié i⸤boku tokoro⸥ walemo kepe Juda yembomanga koleamanga pali iungumu anjo anjo pulimo pilkulie yembo awisilini kanu temanemo toko molemele.

28:16-20 Yesusi Omba Yu Lombili Andolime “Nanga Kongono Tende-Paa.” Nimbe Lipe Mundorumu Temanemo
28:16-20 Temanemo*Mako 16:14-18, LLuku 24:36-49, (Jono 20:19-25).

16 ⸤Amboma pukulie kanoko pilieringi mele temane toko siringi⸥ kinie pilkulie Yesusi lombili andoli ye rureponga yepoko kolea Gallilli disiriki puku, Yesusini ma pangi te imbi lepa ou “Akune wangi.” nirimu ma pangine puringi. 17 Akune puku Yesusi kanokolie niringimuni, yu kapi ningu yunge imbi liku ola mundundoringi nalo marene ‘Yesusi kolorumu. Imu Yesusi molo nawenje?’ ningu konopu talo teko lieringi.

18 Kanu kinie Yesusi yu nondopa omba enondo nimbendo: “Tatane nando “Nu nunu mulu koleana melema kinie yemboma kinie, ma koleana melema kinie yemboma kinie nokani.” nimbe tondolomo
28:18*Pulu Yemone ‘Yesusi melema pali nokopili.’ nimbe namba sirimu. Deniele 7:13-14, LLuku 10:22, Jono 3:15, Ou Korini 15:27, Epesasi 1:20-22, Pillipai 2:9-11.
na sirimu, na-kinie pelemo.
19 Aku ⸤tondolo na sirimumu eno simbo eno kinie pemba⸥ kene eno ma koleamanga pali puku ‘Yemboma pali nanga ungumu pilku liku, nanga lombili andolime molangi.’ ningu, puku ningu si-pukulie ningemone, ⸤pilku liku molonge⸥ yemboma no lindingendo Lapa kinie Malo kinie Mini Kake Telimu kinie enonga imbi leko
28:19*bokumunge alsena anjokondo “28. nem”.
eno no lindiku,
20 enondo “Na lombili andolimene teangi.” nirindu mele pali ‘Aku yemboma teangi.’ ningu eno mane siengi. Aku siku niliku andoko molonge kinie na eno-kinie alieli molambo mulu maselo pora nimbé.” nirimu.
28:20*Yesusi mulu koleana olando purumu temanemo Mateyuni naa torumu. Mako 16:19, LLuku 24:50-51, Lipe Mundorumu Yema 1:9-11, Epesasi 1:20-22 molemo.


⸤Aku pea.⸥

Copyright information for `UBUKALA