Revelation of John 11

Kolomongo Awili 10 Angello Tene Boku Kelo Te Jono Sirimu Norumu Temanemo

11:1-14 Ye Talone Pulu Yemonga Ungu Ningu Siringili Temanemo

Manda manjeli koló pepena te na sipelie nimbendo: “Pulu Yemo popo toko kalemele ulke tembelemo kinie akune melema popo toko kalemele polomo kinie akuselo puku manda manjiku, akune Pulu Yemo popo toko kapi ningu imbi liku ola mundunduku molemele yemboma kambu silieni pu.” ⸤nirimu.⸥ “Nalo Pulu Yemonga ulke tembele palana sukundu koleamo yembo talape lupema
11:2*bokumunge alsena anjokondo “2. arapela lain”.
sirimulu kene akumu manda naa manjeni. Kanu yemboma Pulu Yemonga kolea awili kake telimunge kambiliku andoko molangi oli tu paono tu omba pumbe.
11:2**Oli tu-paono-tu (24) aku olimenga ya 11:3 wale wane tausini tu anderete sikiti molemo (1260) telu sipemo. “Ponie yepoko oli talo-pakera” nilimolola.
Nane nanga ungume andoko ningu sindingele yeselo ‘Elo tondolo pupili.’ nimbu enge simbo kinie wale wane tausini tu anderete sikiti
11:3*inie ola 11:2**; inie anjokondo 12:6.
andokolo nane ungu umbu tondomboma pilkulu pe wendo ombá mele ningu silikulu andongele. Yemboma kola-ulke molongendo mele pingi kerime pakolemele mele elo aku siku wale-pakoli pingi kerime pakokolo yemboma nanga ungume ningu siliku andongele.
Iyeselo ou Pulu Yemone ungu umbu tondorumume pilipe yemboma nimbe sirimu ye Sekarayane “Unjo ollipi talo kinie tepe-llame talo kinie ma koleamo nokolemo Ye Nomi Awilimunge kumbikerena angilimbele.” nirimu
11:4*Sekaraya 4:1-14.
akumu iyeselondo nirimu.
Yembo tene kanu yeselo ulu te tepa kenjimbe temba kinie elonga kerena tepe wendo omba elonga opa puluema nomba kondomba. Yembo tene ‘Elo ulu te tepo kenjembo.’ nimbé yembomo yu paa sike aku sipe kolomba. Elo Pulu Yemonga ungu wendo ombá mele ningu siliku andongele kinie ‘Lo naa opili.’ ningu pipi singele engemo elo kinie pembala. Elone ‘Noma meme topili.’ ningele engemo elo kinie pembala. Elone ‘Mana we yemboma ulu umbunema wendo opili.’ ningele engemo pembala. Aku siku elone ‘Yemboma mindili simbolo.’ konopu lengele kinie manda mindili singele.

Elone Pulu Yemonga ungume andoko ningu siku pora singele kinie mele takera enge nili te kowa-muru te paa lepa mindi pupe naa pora nilimomonga wendo olemomo wendo omba elo molongelena ‘Tambo.’ nimbe omba elo topa kondomba. Elonga onoselo kolea awili, ou elonga Awilimu unjona toringi kolorumu kolea paa awili akumunge aulke tenga akune we lemba. Aku koleamo imbi leko ungu iko tokolie ‘Sodomo’ ningu ‘Isipi’ nilimele.
11:8*“Sodomo” niringi kolea akumunge temanemo Ou Pulu Pulu kolomongo awili 18, 19 molemo. Yembo akume ulu kerinele paa awisili teringi temanemo Ou Pulu Pulu 19:4-11 molemo. Akumu pilkulie ya kolea yembomane ulu pulu keri awisili teringimunge “Sodomo” niringi. “Isipi” niringi akumu ou Isipi yembomane Isirele yemboma mindili liku siku ka kongono siringi, aku temanemo WendoOringi kolomongo awili 1 molemo.
Yembo talape lupe lupema, ungu lupe lupe leko, kangi lupe lupe angilipe, kolea lupe lupe molonge yembomane elonga onoselo neme-neme ningu kano-pou-pou tenge nalo marene ‘Ono teamili.’ naa ninge. Aku teko molangi wale yepoko omba pupe kise sipemo wendo ombá. 10 Mana molonge yembomane elonga onoselo kanokolie konopu siku, langi koyoko nongo, enonga pulu lemo yemboma melema we siku mundunge. Kanu yeselone mana molonge yemboma ou mindili liku singelemonga aku tenge.

11 Nalo wale yepoko omba pupe kise sipemo wendo orumu kinie Pulu Yemone konde mololi popomo lipe mundorumu kinie yeselonga kangine sukundu purumu kinie elo konde molkolo ola angilieringili kinie yembomane kanokolie paa pungu-pungu ningu mini-wale mundoringi. 12 Kanu kinie elone mulu koleana ungu te tondolo mundupelie nirimumu pilieringili. Kanumuni elondo nimbendo: “I nie olando wale.” nirimu. Kanu kinie elonga opa puluema kanoko angiliengi elo kupe tenga mulu koleana olando puringili.

13 Olando pungele puringili kinie walsikele ma jimi-jimi tondolo mundupe terimu kinie kolea awilimu owe topa rureponga talo tepa, owe tenga ulke melema pali topa kalorumu. Ma jimi-jimi terimumuni yembo sepene tausini topa kondorumu kinie yembo naa kolko we moloringimene paa pungu-pungu ningu mini-wale munduku mulu koleana molemo Pulu Yemo kapi ningu yunge imbi liku ola mundundoringi.

14 Ulu umbune talo sipemo pora nimu;
11:14*inie yakondo 8:13, 9:12.
yepoko sipemo nondopa wendo ombá tekemo.

11:15-19 Biyukele Yepoko Pakera Sipemo Ungu Sirimu Kinie Ulu Mare Wendo Orumu Mele Temanemo (Inie yakondo 8:6-9:21 kananila.)

15 Kanu kinie pe angello yepoko pakera biyukelema amboloringimenga yepoko pakera sipemone yunge biyukele ungu sirimu kinie mulu koleana kere awisilinge ungu te tondolo mundupe wendo ombalie nimbendo:

“ “Ma koleamo nanga.” nimbe
ou nokopa ye nomi kingi awilimu molorumumunge
kolo wangopa olionga Awili ⸤Pulu Yemo⸥ kinie
yuni “Yemboma nokopa kondomba ye te
lipu mundumbo.” nimbe
mako torumu ye nomi Kirasi kinie elone
11:15*Konana 2:2.

“Kinié oltonga.” ningulu
elo kamu-kumu kingiselo molkolo
nokoko mindi molko pungele.”
11:15**bokumunge alsena anjokondo “20. kingdom”.

niringi.
16 Kanu kinie ye awili wane paono po
11:16*,19tokapu telu (24) kanumu; inie yakondo 4:4 kananila.
Pulu Yemonga kumbikerena enonga ye nomi kingi polomanga moloringi akume manie puku tamalu peko Pulu Yemo kapi ningu imbi liku ola mundundukulie
17 ningendo:

“Pulu Ye Awili,
Tondoloma Pali Nu Kinie Pelemo Yemo,
ou molorunu mele kinié kepe
molko mindi puli yemo,
nuni kolea melema pali nokoni
ulu pulu tondolo olandopamo likulie
nu nunu ye nomi kingimu kamu pulu polko molko
melema nokoni nokokono akumunge
nu-kinie “Ange” nikimulu.
18 Koleamanga pali we yembomane

nu-kinie paa mumindili koloringi nalo
kinié nu yemboma kinie mumindili kolko
kote tendeko kamu toni walemo kamu wendo omu.
Yembo kololime apuruku,
nunge kendemande yembo
ou nuni ungu umbu tondorunume pilku
yemboma ningu siringi yemboma kinie
11:18*bokumunge alsena anjokondo “35. profet”.

nunge yembo kake telime kinie
‘Nu olionga ye awilimu.’ ningu
nunge ungumu taka liku pilku tenge panjiku
nunge imbi liku ola mundundoringi yemboma kinie,
yembo awilime kepe
yembo imbi naa mololime kepe
⸤eno pali⸥ mele kaloli peangama siku,
ma koleamo teko kenjeringi yemboma
teko kenjeni walemo
kinié kamu wendo omu.”
niringi.

11:19-12:18 Ambomo Kinie Wambiye Derekonoselonga Temanemo

19 ⸤Ye nomi wane paono pone ‘Pulu Yemo imbi ola molopili.’ ningu aku siku niringi⸥ kinie Pulu Yemo popo toko kalemele ulke tembele mulu koleana sukundu angilierimu akumu kune lipe lierimu, akune sukundu Pulu Yemone mi lepa nimbe panjerimu ungumu
11:19*bokumunge alsena anjokondo “22. kontrak”. Ketemonga pikisa te inie yakondo gomo 1143 molemo.
suku perimu ketemo
11:19**Wendo Oringi 25:10-22.
mona lierimu kanorundu. Kanu kinie kariapá tepa, ungu mare wendo omba, mulú kilkala nimbe, ma jimi-jimi tepa, lo kopu mongo awisili torumu.
11:19***inie anjokondo 16:18,21; Wendo Oringi 19:16 kananila.


Copyright information for `UBUKALA