Revelation of John 22

22:1-5 Konde Molopa Mindi Puli Ulu Pulumu Pelemo Nomo Kinie Unjomo-selonga Temanemo

Kanu kinie angellomone alieli konde molopa mindi puli ulu pulumu pelemo no omba purumumu
22:1* ,17 inie yakondo 21:6**
na lipe ora sirimu, akumu kariyápa mele pa terimu. Pulu Yemo kinie Sipisipi Walomo
22:1** ,3 bokumunge alsena anjokondo “44.3. Pikinini Sipsip Bilong God”.
kinie elonga ye nomi kingi polomonga no akumu wendo omba,
kolea awilimunge aulke-barisi suku-singine omba purumu. No ekendo ekendo kéloselonga alieli konde molopa mindi puli ulu pulumu pelemo unjomo angilierimu,
22:2* ,14* ,19 Ou Pulu Pulu 2:9, 3:22,24, inie yakondo 2:7; bokumunge alsena anjokondo “24. laip - diwai bilong”.
akumu ponie tenga tenga wale rurepo mongo tolemo, oli tenga tenga mongo tolemo. Unjomonga gomomane yemboma tepa konde limo.
Pulu Yemone mana umbune sirimu mele umbune paa telu kepe aku koleana naa pemba. Pulu Yemo kinie Sipisipi Walomo-selonga ye nomi kingi polomo aku koleana lemba, Pulu Yemonga kongono tendeli kendemande yembomane yu popo toko kapi ninge. Enone yunge kumbikeremo kanonge, yunge imbimu
22:4*bokumunge alsena anjokondo “28. nem”.
enonga mambelena molomba.
Aku koleana ipu naa lemba. Pulu Ye Awilimuni eno molongena pa tendembamonga ‘Ena tepili.’ molo ‘Tepe-llame kandamili.’ naa ninge. Eno yembo nomi kingime alieli molko nokoko mindi punge.

Angellomone nando nimbendo: “I ungume ungu sikema, yembomane manda ‘Nane nikiru mele sike telemo.’ ningu pilku mondoko pilinge ungume.
22:6*inie yakondo 21:5.
Awilimu, Pulu Yemone ungu umbu tondorumume pilku yemboma ningu siringi yembomanga
22:6** ,9 bokumunge alsena anjokondo “35. profet”.
minimenga Pulu Yemo, yuni ‘Yunge kendemandemane ulume nondopa wendo ombá mele kanangi lipe ora sipili.’ nimbe yunge angellomo lipe mundorumu.” nirimu.

22:7-20 Yesusi Nondopa Omb Temane Te

Yesusini nimbendo: “Pilieme! Na nondopo ombó.” nirimu. Ibokune nimbe molemo ungu pe wendo ombáma pilipe lipe tenge panjipe temba yembomo yu malo.
22:7*inie yakondo 1:3.


Na Jono, na iulume pilipu kanorundu yemo. Pilipu kanopolie na ulume lipe ora sirimu angellomo ‘Yu popo topo kapi niembo.’ nimbu yunge kumbikerena tamalu perindu nalo yuni nando nimbendo: “Paa aku naa tei! Nunge angenali Pulu Yemone ungu umbu tondorumume pilku yemboma ningu siringi yema kinie, ibokune nimbe molemo ungume pilku liku telemele yemboma kinie, nu kinie na kinie olio pali Pulu Yemonga kendemandema molopo kongono tendelemolo kene nuni Pulu Yemo yu mindi popo toko kapi nieni.” nirimu.
22:9*inie yakondo 19:10.


10 Aku nimbelie kelepa nando nimbendo: “I bokune ulu pe wendo ombá mele nimbe molemo ulume nondopa kamu wendo ombá kene
22:10*inie yakondo 1:3.
‘Naa piliengi! Naa nimbu para siembo.’ ningu lopi naa teani.
22:10**inie yakondo 10:4.
11 Yembo te tepa kenjilimo yembomo

yu kamu tepa kenjipe molopili.

Yembo te kalaro molopili molemo yembomo

kamu kalaro molopili yembo akumu molopili.

Yembo te tepa kondolemo yembomo

kamu tepa kondopa molopili.

Yembo te kake tepili molemo yembomo

kamu kake tepili molopili.”

nirimu.

12 Yesusini nimbendo: “Pilieme! Na nondopo ombó tekero. Ombó kinie yemboma enonga ulu telemelemanga yu-mele-mele mele kalombondo mele kalombo melema membo ombó. 13 Na ou kumbi lepo molorundu pe akilipu molombo yemo;
22:13*inie yakondo 21:6, 1:8, 1:8*.
Na Kumbinemo Pe Akilipemo;
22:13**inie yakondo 1:17.
Na Melemanga Pali Pulu Yemo, Na ‘Kongono Tembo.’ Konopu Lelioma Alieli Tepo Pora Silio Yemom

14 “Yemboma enonga mulumbalema kulumiye tolemele yemboma aku telemelemonga ‘Alieli konde molopa mindi puli ulu pulumu pelemo unjomonga mongoma
22:14*Ou Pulu Pulu 2:9, 3:22,24; inie yakondo 2:7.
ongo nongo, kolea awilimunge kou pala kerepulumenga ongo puku sukundu waa.’ nimolomonga kanu yemboma eno malo.

15 Ulu kerime mindi konopu kimbú siku molemelema kinie,

tomo ambolko meambu liku telemelema kinie,

wapora andoko tolemelema kinie,

yembo toko kondolemelema kinie,

we melema anjiku ‘pulu yema’ ningu popo toko

kapi nilimelema kinie,

kolo toli ulume konopu mondoko kolo toko telemelema kinie,

kanu yemboma eno kolea awilimunge kou-palamonga ulsukundu molemele.
22:15*inie yakondo 21:8.


16 “Na Yesusi, nane ‘Nanga yembo talapema
22:16*bokumunge alsena anjokondo “43. sios”.
iungume piliengi, pupe nimbe sindepili.’ nimbu nanga angellomo ‘Nu puku ningu si-pou.’ nimbu lipu mundorundu. Na ye nomi kingi Depisini kalopa lsimu yemo; yu nanga anda-kolepamo;
22:16**Ou Pulu Pulu 49.
ipulueli-ou kolea tangombando kombukandipime pali kumbulupe, telu mindi kamu tondolo pa tepa angilimo akumu na.”
22:16***inie yakondo 2:28, Kambu 24:7, Pe-Pita 1:19.
nirimu.
17 Minimu kinie ⸤Sipisipi Walomonga⸥ Ambo Limbe Ambomo kinie elone ningelendo: “Nu paa ou!” nilimbele. Iungume pilimbe yembomone “Nu paa ou!” nipili. No waka lemo yembomo opili. Yembo te ‘No nombo.’ konopu lemba yembomo kou mone naa lipe we simbe no, alieli konde molopa mindi puli ulu pulumu pelemo nomo, omba nopili.
22:17*inie yakondo 21:6, 21:6**.


18 Ibokumunge pe wendo ombá mele nimbe molemo ungume pilinge yembomando liepi-liepi topolie nimbondo: “Yembo tene ibokune sukundu molemo ungumenga ungu te suku mundupe nimu liemo ibokumunge ulu umbune tondolo mare ‘wendo ombá’ nimbe molemo ulu umbunema Pulu Yemone ‘aku yembomo-kinie wendo opili.’ nimbé. 19 Molo yembo tene ibokumunge ulu pe wendo ombá nimbe molemomanga ungu te naa nimbe kulu topa wendo limu liemo Pulu Yemone yu mundupe siye kolopa, ‘Yu alieli konde molopa mindi puli ulu pulumu pelemo unjo ibokumuni nimbe silimomonga
22:19*inie 22:2.
mongo mare naa nomba, kolea awili kake teli ibokumuni nimbe silimo koleana naa opili.’ nimbé.” nikiru.

20 Iulume wendo ombá nimbe silimo yemone nimbendo: “Sike. Na nondopo ombó tekero.” nilimo.

Paa aku sipe tepili! Awili Yesusi, paa oyo!

21 Awili Yesusini Pulu Yemonga yemboma ⸤pali⸥ we kondo kolopa molopili molangi. Aku sipe tepili!

⸤Aku pea.⸥

Copyright information for `UBUKALA