1 Corinthians 3

Angokeme, ⸤aku nikirumunge⸥ na ene kinie molopolie, yamboma Pulu Yemonga Minimuni nilimo mele pilku liku telemele yamboma mane silio mele ene aku sipu manda mane naa sirindu. We mana yambo ⸤umbu konopuni mindi pilimele yamboma⸥ mane silio mele ene aku sipu mane sirindu. Kirasinge ambolango pamema mindi moloringimunge nane ene ame mindi sirindu.* ‘Ene langi enge nilime manda naa nonge.’ nimbu kanopolie langi enge nilime naa sirindu. Kinié kepe langi enge nilime manda naa nonge. Enenga ou konopu wemane ene ambolopili molemelemonga mana yambomane telemele mele telemele. Ene ‘Yambomane teko nosikimili mele nane aku sipu telkanje papu.’ ningu yamboma kinie konopu keri panjiku, anju yando irinele teko, aku uluma telemele, akumu konopu ouma pepili molemelemonga telemele.* ⸤Aku ulu telemelemane ene Mini Kake Telimuni kamu ambolemo yamboma naa molko, yunge ungumu naa pilimele mele lipe ora silimo.⸥ ⸤Enene i siku mele telemele:⸥ Yambo tene nimbendo: “Na Pollonga yambomo.” nilimo. Tene nimbendo: “Na Apollosinge yambomo.” nilimo. Aku siku nilimele yamboma we mana yamboma mindi naa molemeleye?

⸤Apollosi kinie Pollotolo nambemuna arenale teko kerepali nilimeleye?⸥ Apollosi naeye? Pollo naeye? Apollosi olto Ailimunge kendemandetolo mindi. Ailimuni kongono lupe lupe sirimu yetolo molopolie, aku kongonomo terimbulumunge ene “Kirasi sike.” ningu tondolo munduku piliringi* aulkemo akisinjirimbulu yetolo mindi molembolo. Nane langi umbu torundu; pe langi umbu tonjirindu koleana Apollosini andopa no mundurumu; nakolo Pulu Yemone ‘Langime toko raka nimbe opili.’ nirimu. Akumunge yambo langi umbu tonjilimomo imbi naa molemo; yambo poniena andopa no silimo yambomo kepe imbi naa la molemo; Pulu Yemone ‘Langime wendo opili.’ nilimo aku yemo mindi imbi molemo. Yambo langi umbu tolemo yambomo kinie poniena andopa no silimo yambomo kinie aku yambotolonga kongono te olandopa te maniendopa molo. Aku yambotolone ⸤Pulu Yemonga⸥ kongono mindi tengelemonga telembele mele mimi sipe kanopa apurupe yu mele mele mele kalomba. Apollosi olto kinie Pulu Yemo kinie tapu topo kongono telemolo yema; ene Pulu Yemonga ponie mele, ⸤akumunge yu mindi olandopamo⸥.

Ene Pulu Yemone ulkemo takopa molemo mele molemelela.
10 ⸤Na ene moloringine ombo pulu monjipu unguma mane sirindu kinie⸥ Pulu Yemone we kondo kolopalie ‘Na ulke takoli kongonomonga pilipe konginjili pelemo yemo molopili.’ nimbe tondolo te we sirimu. ‘Ene yunge ulkemo angilipili.’ nimbe na aku tondolomo sipelie lipe mundurumuna ene moloringine ombo, ‘Ulke angilimbemonga ponga polangi.’ nimbu mana kouma talape topo nosirindu, aku koumanga ola yambo tene ulkemo takopa molemo. Nakolo ulke takolemele yambomane mimi siku pilku konjiku ulke takangi.* 11 Ulkemo ola takonge kouma nane talape topo nosirindu akuma Yesusi Kirasi yu.* Yambo tene alowa tepa kou lupe mare manda naa nosimbe. 12 Yambo marene ⸤Pulu Yemonga ulkemo⸥ kanu koumanga ola takongendo kou gollo kinie, kou sillipa kinie, kou mone olandopa pulimo kouma kinie, aku mele peangamane takoko, marene unju kinie angi kinie rasi witi unju aku mele kerimene takoko, telemele. 13 Pe Pulu Yemone yamboma kote tenjipe pilimbe walemo wendo ombá kinie ulkemo takolemele mele mona lemba. Kanu walemo kinie tepe tene ‘Yambomane kongono teringime teko konjiringinje molo teko kenjiringinje?’ nimbe manda manjimbe. 14 ⸤Manda manjimbe kinie⸥ yambo tene manie talape topa lemo koumanga ola* ulke takombamo tepene naa nomba pora simu liemo yu mele kalolimu limbe. 15 Molo yambo tene ulke takombamo tepene nomba pora simu liemo aku kongono tembamonga mele kalolimu naa limbe. Kanu yambomo yuyu ⸤Pulu Yemone⸥ lipe taponjipe ‘Mindili naa nopili.’ nimbe yu kinie molopa konjimbe ulu pulumu* simbe nakolo yu, tepene yambo te nombá telemo kinie yambomane liku taponjiku yu wendo limele kinie tepene kamu naa nolemo yambomo mele molomba.

16 Ene Pulu Yemo molemo ulke suluminia* paa kake telimu molemele; Pulu Yemonga Minimu enenga konopuna sukundu molemo; akumu ene naa pilimeleye? 17 Akumunge yambo tene Pulu Yemonga ulke suluminia* paa kake telimu tepa kenjimu liemo Pulu Yemone kanu yambomo tepa kenjimbela. Pulu Yemonga suluminiamo ‘Yunge suluminia kake telimu.’ nilimo, aku suluminiamo ene eneno, akumunge aku sipe tepa kenjimbe yambomo yuni yu kepe tepa kenjimbe.

18 Ene eneno konopuni kolo toko naa piliengi! Enenga yambo tene yuyu pilipelie, ma koleana yambomane ‘Olio pilipe konginjili pelemo yamboma molemolo.’ ningu pilimele mele yuni aku sipe ‘Pilipe konginjili yambomo molio.’ nimbe pilimu liemo ‘Aku sipu nimbu naa piliembo.’ nipili. ‘Mana yambomane na kanokolie ‘Aroma toli yambomo.’ ningu kanangi.’ nipili. Aku sipe nimbé kinie sike pilipe konginjili yambomo molomba. 19 Mana yambomane pilkulie ‘Akumu pilipe konginjilimu.’ ningu pilimele mele Pulu Yemone kanopalie ‘Kekelepa toli ulumu.’ nimbe kanolemo. Akumunge ungu te yunge bokuna molemo, akumu i sipe:

‘Yambo marene yamboma teko kenjingindu
enenga konopuna pilipe konginjili pelemomone
uluma telemele nakolo
Pulu Yemone aku telemele uluma kanopalie
‘Aku pilkulie tekemelemonga ene eneno melu lelko
nomi suku mundukumili.’ nimbe kanolemo.’*
nimbe molemo kanumu.
20 Akumunge ungu te pea molemola, akumu i sipe:

‘Ailimuni pilipelie,
konopuna pilipe konginjili pelemo yambomane
konopuni pilimele mele ene naa lipe taponjimbe.
‘Pilimele mele uluri molo.’ nimbe pilimo.’*
nimbe aku sipe molemo.
21 Akumunge altoko yemanga imbime kapi ningu ambolko ola naa linjengi.* Melema pali enenga. 22 ⸤Na⸥ Pollo kepe Apollosi kepe Pita* kepe, ma koleamo kepe konde mololi ulumu kepe kololi ulumu kepe, kinié lemo melema kepe pe lemba melema kepe, akuma pali enenga; ⸤ene liku taponjingíndu aku tapu yema kinie melema kinie pelemele⸥; 23 ene Kirasinge yamboma, Kirasi Pulu Yemonga yemola, ⸤akumunge elte kinie olio kinie melema pali enenga kene anju anju talape yu mele mele manda molame!⸥*

Copyright information for `UBUNOPENGE