Revelation of John 12

⸤Kanu kinie⸥ mulu koleana suku ulu paa aili tondolo te ungu pulu perimu ulu te wendo orumu. Akumu i sipe: Ambo te molopa, enamo mulu mele pakopa, olimu yunge kimbumuni kambilipe, pengena ambo nomi kuwininge wanie kiraono te kombukandipi rurepo akuna angilipili pakopa molorumu. Yu olona ambolango monjipelie, membando mindili paa aili tepa nomba perepa kalle nimbe molorumu.

Kanu kinie mulu koleana sukundu ulu paa aili tondolo ungu pulu perimu ulu te kelepa wendo orumula: Wambiye derekono paa aili kondoli te* molopa, yunge penge yepoko pakara angilipe, kongi kao ungú mele rureponga talo wendo omba, yunge pengemanga ye nomi kingimunge wanie kiraono yepoko pakara pakopa molorumu. Kombukandipime owe yepoko tepa topa, kanu wambiye derekonomo yunge álimuni kombukandipi owe te muluna ola topa mana manie mundurumu. Ambolango membá terimu ambomonga kumbikerena angilipe kanu ambolangomo ambomone kanopa limbe kinie nombando nokopa angilirimu.

Ambomone kango te kanopa lirimu. Kanu kangomo ma kolea yambo talapema pali paa tondolo mundupe nokopa molomba. Merimu kinie ene popenge teko liku kangulku Pulu Yemo kolea pali nokopa molorumu polona mengo puringi. Ambomo kolea ku lelimunge sukundu lkisipe kowa pupe, kolea te Pulu Yemone ou tepa mimi tenjirimu kolea akuna purumu. Akuna Pulu Yemone “Yu wale wane tausini tu anderete kelepa sikiti* molopili nokonjengi.” nirimu.

Kanu kinie mulu koleana sukundu opa aili te wendo orumu. Mulu koleana angello aili Maikele kinie yunge mulu koleana we angelloma kinie wambiye derekonomo molorumuna opa oringi. Derekonomo kinie yunge angelloma kinie kanokolie opa teringi nakolo Maikelenga talapemone ene toko munduringi akumunge pe derekonomo kinie yunge angelloma kinie mulu koleana suku molonge kolea te naa lerimu. Derekono tondolomo yu koronga ou molorumu wambiyemo;* yu “⸤kurumanga nomi⸥ depelemo”.** ningu; yu “Setene” nilimele yemo;*** yu mana yamboma pali kondi topa “Lou lelko aulke tenga lupe pangi.” nilimo yemo. Kanumu toko mana manie munduringi, yu kinie yu lombili andoringi angelloma kinie toko mana manie munduringi.

10 Kanu kinie mulu koleana sukundu ungu tondolo te wendo orumu pilirindu. Aku ungumu ru nimbelie nimbendo:

“Olionga angenupilime alieli
ipulueli kepe tangoli kepe
Pulu Yemonga kumbikerena kote tenjilimo yemo
kinié mana manie toko mundúngimunge
Pulu Yemo yunge tondolo pelemomone
‘Setenene olio naa ambolopa tepa kenjipe
mindili nolemelka koleana naa memba pupili.’
nimbe, olio lipe taponjipe,*
yu paa sike ye nomi kingimu molopa
yu melema pali nokopa molopa,**
yu Pulu Yemone “Ene nokopa konjimbe ye te
lipu mundumbu.” nimbe mako torumu
ye nomi Kirasimunge,***
mele nokomba namba pelemomone
Kirasimu yuni melema pali
nokopa konjimbe walemo kinié kamu wendo omu.
11 Kongi Sipisipi Walomone*

meme ondo lenjirimumu kinie
Pulu Yemonga ungumu ningu siku teringimu kinie
aku ulutolone olionga angenupilime
enge ningu opa toumu toko munduringi.
Ene ‘mana molopo konjemili.’ ningu naa pilku,
‘opa toumane toko konjíngi liemo mandala.’
ningu piliringimunge aku sipe
engemo perimu kinie aku teringi.
12 Akumunge nu mulu koleamo kinie

akuna molemele yamboma kinie konopu siengi.
Nakolo nu mamo kinie nu nomu kusamo kinie
depelemo akuna manie purumumunge
ene kinie umbuni aili te wendo omu.
‘Pulu Yemone yu kamu topa mundumbe enamo
nondopa wendo ombá.’ nimbe pilipe
yu paa mumindili kolopa molemo.”
nirimu.

13 Wambiye derekonomo yu toko mana manie munduringi kinie kanopalie pe kango merimu ambomo andopa pulu sirimu.* 14 Nakolo ‘Yu wambiyemone naa topili.’ nimbe kolea ku leli sulu tenga lerimuna yu ponie yepoko oli talo pakara molopili nokonge kolea te Pulu Yemone tepa mimi terimumu ‘yu akuna mangopa yu kowa pupili.’ nimbe* ambo kanumu kera iliaka pou aili talo sirimu. 15 Yu kowa purumu kinie kanopalie wambiyemone ‘Yu none topa memba pupili.’ nimbe yunge kerena meku torumu kinie ambomo purumu aulkena no aili tepa topa pulu sirimu. 16 Nakolo mamone ambomo lipe taponjipe ma aili tepa kengeya lepa wambiye derekonomone meku torumu nomo pali akuna omba manie purumu. 17 Kanu kinie wambiyemone aku terimu kanopalie ambomo kinie paa mumindili kolopalie ambomonga ambolango wema kinie opa temba purumu. Ambomonga ambolango kanuma Pulu Yemone “Teai.” nilimo ungu manema pilku liku tenge panjiku teko, Yesusinge unguma ningu siku molemele yamboma. 18 Wambiye derekonomo nomu kusa kélona angilirimu.

Copyright information for `UBUNOPENGE