Revelation of John 22

Kanu kinie angellomone alieli konde molopa mindi puli ulu pulumu pelemo no omba purumumu* na lipe ora sirimu, akumu kariyápa mele pa terimu. Pulu Yemo kinie Sipisipi Walomo** kinie eltenga ye nomi kingi polomonga no akumu wendo omba, kolea ailimunge aulke barisi suku singine omba purumu. No ekendo ekendo kélotolonga alieli konde molopa mindi puli ulu pulumu pelemo unjumu angilirimu,* akumu ponie tenga tenga wale rurepo mongo tolemo, oli tenga tenga mongo tolemo. Unjumunge gomomane yamboma tepa konde limo. Pulu Yemone mana umbuni sirimu mele umbuni paa telu kepe aku koleana naa pemba. Pulu Yemo kinie Sipisipi Walomotolonga ye nomi kingi polomo aku koleana lemba, Pulu Yemonga kongono tenjili kendemande yambomane yu popo toko kapi ningí. Enene yunge kumbikeremo kanonge, yunge imbimu* enenga mambelena molomba. Aku koleana ipu naa lemba. Pulu Ye Ailimuni ene molongena pa tenjimbemonga ‘Ena tepili.’ molo ‘Tepe llame kandamili.’ naa ningí. Ene yambo nomi kingime alieli molko nokoko mindi pungí.

Angellomone nando nimbendo: “I unguma ungu sikema, yambomane manda ‘Nane nikiru mele sike telemo.’ ningu pilku monjiku pilingí unguma.* Ailimu, Pulu Yemone ungu umbu tonjirimuma pilku yamboma ningu siringi yambomanga** minimenga Pulu Yemo, yuni ‘Yunge kendemandemane uluma nondopa wendo ombá mele kanangi lipe ora sipili.’ nimbe yunge angellomo lipe mundurumu.” nirimu.

Yesusini nimbendo: “Pilieme! Na nondopo ombó.” nirimu. I bokuna nimbe molemo ungu pe wendo ombáma pilipe lipe tenge panjipe temba yambomo yu malo.*

Na Jono, na i uluma pilipu kanorundu yemo. Pilipu kanopolie na uluma lipe ora sirimu angellomo ‘Yu popo topo kapi niembo.’ nimbu yunge kumbikerena tamalu perindu nakolo yuni nando nimbendo: “Paa aku naa tei! Nunge angenali Pulu Yemone ungu umbu tonjirimuma pilku yamboma ningu siringi yema kinie, i bokuna nimbe molemo unguma pilku liku telemele yamboma kinie, nu kinie na kinie olio pali Pulu Yemonga kendemandema molopo kongono tenjilimolo kene nuni Pulu Yemo yu mindi popo toko kapi nieni.” nirimu.*

10 Aku nimbelie kelepa nando nimbendo: “I bokuna ulu pe wendo ombá mele nimbe molemo uluma nondopa kamu wendo ombá kene* ‘Naa piliengi! Naa nimbu para siembo.’ ningu lopi naa teani.** 11 Yambo te tepa kenjilimo yambomo

yu kamu tepa kenjipe molopili.

Yambo te kalaro molopili molemo yambomo

kamu kalaro molopili yambo akumu molopili.

Yambo te tepa konjilimo yambomo

kamu tepa konjipe molopili.

Yambo te kake tepili molemo yambomo

kamu kake tepili molopili.”

nirimu.

12 Yesusini nimbendo: “Pilieme! Na nondopo ombó tekero. Ombó kinie yamboma enenga ulu telemelemanga yu mele mele mele kalombondo mele kalombo melema membo ombó. 13 Na ou kumbi lepo molorundu pe akilipu molombo yemo;* Na Kumbinemo Pe Akilipemo;** Na Melemanga Pali Pulu Yemo, Na ‘Kongono Tembo.’ Konopu Lelioma Alieli Tepo Pora Silio Yemo.***

14 “Yamboma enenga mulu wambalema kulumiye tolemele yamboma aku telemelemonga ‘Alieli konde molopa mindi puli ulu pulumu pelemo unjumunge mongoma* ongo nongo, kolea ailimunge kou pala kerepulumanga ongo puku sukundu wai.’ nimulúmunge kanu yamboma ene malo.

15 Ulu kerime mindi konopu kimbú siku molemelema kinie,

tomo ambolko meambu liku telemelema kinie,

wapora andoko tolemelema kinie,

yambo toko konjilimelema kinie,

we melema anjiku ‘pulu yema’ ningu popo toko

kapi nilimelema kinie,

kolo toli uluma konopu monjiku kolo toko telemelema kinie,

kanu yamboma ene kolea ailimunge kou palamonga ulsukundu molemele.*

16 “Na Yesusi, nane ‘Nanga yambo talapema* i unguma piliengi, pupe nimbe sinjipili.’ nimbu nanga angellomo ‘Nu puku ningu sipui.’ nimbu lipu mundurundu. Na ye nomi kingi Depisini kalopa lirimu yemo; yu nanga andakolepamo;** ipulueli ou kolea tangombando kombukandipime pali kumbulupe, telu mindi kamu tondolo pa tepa angilimo akumu na.”.*** nirimu. 17 Minimu kinie ⸤Sipisipi Walomonga⸥ Ambo Limbe Ambomo kinie eltene ningilindu: “Nu paa oi!” nilimbele. I unguma pilimbe yambomone “Nu paa oi!” nipili. No waka lemo yambomo opili. Yambo te ‘No nombo.’ konopu lemba yambomo kou mone naa lipe we simbe no, alieli konde molopa mindi puli ulu pulumu pelemo nomo, omba nopili.*

18 I bokumunge pe wendo ombá mele nimbe molemo unguma pilingí yambomando lepi lepi topolie nimbundu: “Yambo tene i bokuna sukundu molemo ungumanga ungu te suku mundupe nimu liemo i bokumunge ulu umbuni tondolo mare ‘wendo ombá’ nimbe molemo ulu umbunime Pulu Yemone ‘aku yambomo kinie wendo opili.’ nimbé. 19 Molo yambo tene i bokumunge ulu pe wendo ombá nimbe molemomanga ungu te naa nimbe kulu topa wendo limu liemo Pulu Yemone yu mundupe kelepa, ‘Yu alieli konde molopa mindi puli ulu pulumu pelemo unju i bokumuni nimbe silimomonga* mongo mare naa nomba, kolea aili kake teli i bokumuni nimbe silimo koleana naa opili.’ nimbé.” nikiru.

20 I uluma wendo ombá nimbe silimo yemone nimbendo: “Sike. Na nondopo ombó tekero.” nilimo.

Paa aku sipe tepili! Aili Yesusi, paa oyo!

21 Aili Yesusini Pulu Yemonga yamboma ⸤pali⸥ we kondo kolopa molopili molangi. Aku sipe tepili!

⸤Aku pea.⸥

Copyright information for `UBUNOPENGE