Genesis 21

Áitikimma Marákáraiye

Yawe Îtogo wemá tiráiteniq-umá Téramma atimuqá-aména abo wemá Abara-ámmo pórómátimo-uyákáraimma kíqna-uramma taróquráiye. Mi kánáráq-úrámmá Yawe Îtogo Abara-ámmo pórómati-uráimma, wemá anónuqma-áúráitana, Téra ámûkarariq-uréna inamáí ákáma amíkaiye. Téramo ákáyami iyapo Abara-ám Áítíkiye áwîqa yamámíkaiye. Abo Áítíkimo móra-tiyapakaraq kaumo (8) kánámó kéimma, Abara-ám Îtogomo timámíkaiteni-umá Áítíkimma ubayammá-uyákáraiye. Abara-ám ántárétiqa (100) auqa itana abo Áítíki wekáké páquraiye.

Téra tiraiye, “Îtogo wirágara amurámu timiye, abo máte-wayukamo iyápómo kemó akáúnnamo minná-itétama kete yeráwáqá wíra-inówe.” Aniyeténa Téra tiráiye, “Íma-mórawaigo Abara-ámtaba téna kettaba min íyápó ákáyaminiye tiraim-manibo, kemá íbêqa Abara-ám anónumma áúráípi iyápó ákáyamune.”

Ágakaraq Ítímaerima Timá-yíkáraiye

Áítíki anómma-auréna abo ááwáqa naraiye. Mi kánáráqó Áítíkimo naammo némaimma yuwéna ááwáqo kénaimma Abara-ám anó nawaqa agayákáraiye. Téra aónáima weni mayai-íníkóni ánimma Ítímáeri Áítíkimma wíra-uyákáraiye. 10 Miráitana Terá Kówánai-tena Abara-ámtaba tiráiye, “Mi máyáí íníkáráq wení ánimma wárénata kótao, íma Ítímáeri ení ótamma ketánikote yaináníye.”

11 Minnámo Téramo ti-náikómma mamá anómma Abara-ámuní auyanakoma táwítawa-uráiye, nói-náitababiyabo Ítímáerima wenáni-karaqiye. 12 Abo Îtogo Abara-ámtaba tiráiye, “Íma emá umma-áúyánámmá itaó enánikotabakaraq ení mayai ínímmá. Nówai-naimmo Téramo tína itaó, nówai-náitababiyo Áítíkikake kemó pórómáti-uyákáraunna emá iyápó-anna mayáínóne. 13 Kemá Ítímáerimma nétuqya iyápó áménana yeráwáqá abo mamá anó maruqa-páqinowe, minna wema enánipowana.”

14 Máí-nókápáqá aabêyanapimma Abara-ám yáimma awakaraq nonáná-yaqmá maténa Ágámma amikaiye. Wemá Áganí aqnókáq kauyakéna abo tiyákáitana wení ánikote kóuraye. Ága wení ammá maréna abo amáyukara-umaena kaqmáqmaqa Bétíba waqokaq uráiye.

15 Ábo anabíké nommá ánátakitana, Ága ánikomma karanóbáq apaq ayuwéna 16 abo wemá maré waqónáwátáq kéra-nékaka wení ánikomo-máikake máena, wemá wetábá ááímá kétena, “Kemá íma kao-nanana puyíkae.” Abo Ága mérami wáqónáwátáqó máqemaikakemma wemá ibiqá átáma yakáiye.

17 Îtogo Ítímaerimo ibiqó-yáráimma ítáraiye. Îtogoní énítóreko wíyôpake Ágamma áyarena abo wetábá tiráiye, “Nóraq-uránó, Ága? Íma ikatíq-uwó, Îtogo enánikoní ibiqá ítátuwaiye. 18 Emá uréya enánimma awíqma enayáápi yoraó, kemá wení iyápó-anna mamá anó maruqa áúqyikanune.”

19 Îtogo Áganí áúramma táagayakaitana abo wemá maiqnómmá áónaraiye. Ágama nonánábí nommá yakéna maré-uréna ánikomma nommá ámíkaiye.

20 Îtogo Ítímáerima yabírákáraitana abo wemá anómma-aukaiye. Wemá kaqmá maqa maena abo aráábá-naqa aukaiye. 21 Ítímaeri Páráni kaqmáq maqa maitana, wení anówa Ágama Ítípike aaramá aabá uyamikaiye.

Kayoné Áaimma Timá-kayoné Urayé Mi Bétíbaq

22 Mi-kánábímmá Ábrá-ámkaq aamá tínéna Abimereki iráiye Píkórite, wení ááíq-wayukatí kawáámá. Ábíméréki téna “Ítogo mátetataqo taroq-innabímmá ete mániye. 23 Íbêqa Îtogoní áúrakaqa emá ayáámma aikaq márénaqa kemá aónéqa minná emá íma kete, ketí iyápórawakaraq, ketí iyápó-annarawate táwí áaimma taroq-ónúne-tiyo. Emó namuq-náká-umá mánna marukaqó kemó emmó arátiraunna iraqo-náaimma mirárá-umá kemmá tirátio.”

24 Abara-ám téna “Kemá tiyáámma tikaq-maráúne.”

25 Íbêqa Abara-ám Ábímérékimma kúruqa timákáraiye wemó móra noqmaiqo uqmakáimma Ábímérékini mayaí-wáyúkáráwáqá yabíma abowání-umatawana. 26 Abo Ábíméréki téna, “Náwamo miraimmá íma kemá aónaraune. Emá íma mitaoqa timátimenaq ítárauna íbêquramma-itaúne.”

27 Miráitana Abara-ámma tipitípi-garaq purumakamma maména Ábímérékimma ámíkaiye. Mikákémmá máákagorata móra-yiyaqa maakaye. 28 Abara-ám móra-tiyapakaraq kaya (7) ánáé típítípíráwáqá mamá-ókaq tipítipi-rawapike makáiye. 29 Abo Ábíméréki Abara-ámma ítáraiye, “Nówai náaitabawa mami mórá-tíyápákáráq kaya (7) típítípíráwáqá emó mamá-ókaq yenamáraqa makáánó?”

30 Wemá anónna-uráiye, “Mami mórá-tíyápákáráq kaya (7) típítípíráwáqá mayaínónna áaraimma mi maíqnótábá keqtábá ukaíye-tínóne.”

31 Mi-náaitaba mi-márúqá Bétibare áwîqa-yarae, nówaitababiyo kaya-náká (2) móra-yiyaqo makááyakare.

32 Kaya (2) nákórátámó móra-yiyaqo maraí-áímmó Bétibaqo kánataimma, Ábímérékigaraq Píkori wení áai-wayukatí anómma yauwéqmeta Pírítáni marabaq uráiye. 33 Abara-ám támárátiki yaama Bétíba uqmakéna abo mikáq wemá Yawe Îtogoka monoqá-tiyákáraiye, matuqmatuq Ítogokaq. 34 Abo Abara-ám áayátá kanama Pírítaini marabimma máqe-uráiye.

Copyright information for `USA