Luke 10

Iesus Kulos Hot Ke Hana Iri Ana Non Kina Mol Pe Analoch Pe Nai (72)

a Iesus henonou hot ke hana iri ana non kina mol pe analoch pe nai (72) pe kulos hote iri. Pe kulos ke nachnai ke iri muka nge i ke tela nga kileng lochloch ngana nenge lape i laia. b Pe Iesus hele lange iri, “Ume lochloch ngana nganangaria mur te mera tach lo pe lulunga ana hana mur iri unne sune mana. Ke a hetalaulau lange tokoninga nenga ume nemur ke kulos hote lulunga ana hana mur ke te lule ana ume mur. c Iok ala ol! E kulosia imo ke a pomanga sipsip tutuna mur nenge la tetu teu luluch nge kaone inolo mur. d Ala pe a mene umtutuna ero pe a takis kole ero pe a mene lemo ae ulina e ero pule. Nenge teke a saolia mele hel nga kue ames ke a hele sakilil ero. Nenge teke ai teu nga pele e a hele tala ke pomai, ‘Non Palaungana na petanga tu luluch nge imo.’ Nenge teke none nem na poinga urana pe purpure petanga nem lape lemo helenga urana ngana nem masio nge i ke nek. Pe nenge teke ero, lemo helenga urana ngana nemur lape haka mule nge imo. e Atu mana nga pele elle nem ke a ngaungau pe a ininia utar nenge te tunge lala nge imo iange a ume lamam pe urumo laka. Pe ama lilis rara nga pele hel pule ero ol. f Ala nga kileng e pe ai teu langa pele e pe a ngaua utar nenge te tunge lala nge imo. A hemas mule iri nenge aria haleles nga lamam pe a hele lange hehei pe hana ke a teke, ‘NeHalang nena naualanga urana toto ngana heroi taua imo lo.’ 10 Pe nenge teke a langa kileng e pe te ulo ele imo ai hot langa kue pe a heleia iri ke a teke, 11  g ‘Mo pasis sue lemo kileng ana maruchrue nga apemem ke a eteia nge NeHalang lemene ero toto ia lemo poinga poreke ngana mur. Imo letemo matana ke nek, NeHalang nena naualanga urana toto ngana at rochroi toto nge imo pe lememo ero ia lo!’ 12  h E hele ke manmanna toto lange imo. Nga etue palaungana nem lape NeHalang letena porekeia kileng nenge Sotom pe lemo kileng ero!”

Tuele Kina Nemur Nenge Te Ulo Ele Iesus

(Mat 11:20-24)

13 “Imo nenge Korasin lape atu ngamo poreke toto! Pe imo nenge Petsaita lape a poreke toto pule! Iange NeHalang poia ure papalaungana nge imo ke a esia lo pe letemo manmanna ia ero. Pe toinge NeHalang poia ure papalaungana nemur nge Tir pe Siton lape iri te hulia reria poinga mur nga halang nike. Iri te henonou hote iri nge te hulia reria poinga poreke ngana mur ke pomai; te heronia hengeron muna hulu ngana pe te hepore singiria ana apou! 14 Nga etue nenge NeHalang nau teu at nge ita elle pe elle nga rera poinga mur lape letena poreke ia iri nenge Tir pe Siton unne sune pe imo nem ero toto. 15 Pe imo nenge Kapernam nenge a teke ala nga lut nga tapa. Lape te tamal sue imo ke ala nge sio toto nga kileng au ngana!” 16  i Iesus hele lange na hana mur, “Mele nenge longo taua imo longo taua iau pule pe mele nenge ulo ele imo ulo ele iau pule pe mele nenge ulo ele iau ulo ele I nenge kulosia iau at.”

Iechinga Palaungana Lohot Nge Hana Iri Ana Non Kina Mol Pe Analoch Pe Nai nem (72)

17 Hana iri ana non kina mol pe analoch pe nai (72) neu teat mule pe te iech toto. Pe te hele lange Iesus, “Non Soke, uneinei mur pule mo kulos hote iri nga iong em pe te longo tau mana!” 18  j Pe Iesus tuacholia lange iri, “E esia non poreke ngana nge losio at nga tapa ke pomanga kileng chalem ngana. 19  k A longo ke nek! Iau e tunge lek kerkerenga lange imo ke imo sipomo a poia ume nemur nenge pomai. Ai haka nga ilimo nenge te hunun pe a hekolkole iri. Pe ei mur nenge te hunun ita, lape apoia iri ke pomam pule. Pe a hekou sue lemo ngarang Non Poreke ngana nem nena kerkerenga. Pe ute pele nge heporeke imo ero. 20  l Uneinei ne mur te longo taua imo pe a iech sakilil ero nge a mene kerkerenga palaungana nem. A iech toto mana nga emo nge tehas sue nga lut nga tapa.”

Iesus Iech Toto Ngana

(Mat 11:25-27; 13:1617)

21 Nga etue unne neu Opepengpeng hemute Iesus nga iechinga pe hele, “Temek O! Iong Non Soke nenga lut nga tapa pe nga ich! E heto heke iong pe e hele urana toto lange iong nge o talkome ure nemur nge hana nenge leteria matana pe te etei toto nga ure lochloch ngana nga ich. Pe O hemallaha hot mene lange hana nenge leteria manga aina kinkino ngana pe te etei sakilil ero. Oe Temek, o iech toto nga ure nei nge lohot ke nanas tau tote lemem ngam.

22  m  “Temek tunge ure lochloch ngana at nge iau lo. Mele e nga ich nei etei tote iau ero, Temek i toro mana etei tote iau. Pe mele e nga ich nei etei tote Temek ero, iau toro mana e etei tote pe pule iri nenge iau lemek ke e hetei hote iri lange Temek.” 23 Pe Iesus naula nga na hana mur pe hele mana lange iri, “Imo nemur a iech toto nga ure ne mur nenge aesia iri! 24 E hele pengpeng lange imo. Hetalalonga mur pe naungaala ana hana mur nge nike eingaria chup tau tote ure nenge imo aesia pe iri te kolkolia. Pe eingaria chup tau tote ure nenge imo a longe pe iri te longe ero.”

Helenga Opene Nge Non Urana Ngana Nenge Samaria

25  n Non hotonga ana hetoronga e iat ke teke totoia Iesus. Pe hele, “Non Soke, lape epoi ke merei ke e mene tunga nenga maulinga ke koko?”

26 Pe Iesus tuacholia, “Tehas sue ke mere nga NeHalang nena hotonga mur? Pe iong o sisia pe luna ma ke mere?”

27  o Pe Non neu tuacholia, “Mutem taua NeHalang amo Soke nga letem toto pe nga opem pe nga kikim ngam toto pe nga letem tuanin ngana mur lochloch. Pe pule mutem taua neingam ke pomanga mutem taua iong sipom.”

28  p Pe Iesus hele lange i, “Lem tuacholinga nem pengpeng toto. Opoi ke pomai pe nga hoena lape otu luluch nge NeHalang.”

29 Pe non hotonga ana hetoronga neu teke hepeng mule i sipona ene pe ontei mule Iesus, “Itei hel toto nenge iau neingak mur?”

30 Iok laol, Iesus tuacholia lange i ke pomai, “None lohaka nge Ierusalem pe i ke ramana sio lala nge Ieriko. Ol pe hana porekreke ngana hel te laua i pe te palia i ke mete par. Pe te haka hote nena hengeron mur pe te ua sapele. 31 Pe tunginga ana hana mur e nanas sio nga kue neu ke lala nge Ieriko pule pe esia non neu nge ma nga kue pe i kel nga kue ele pe la sapele. 32 Iok, none pule nge mata nenge Liuai nanas sue kue neu pule pe esia non neu nge ma pe kel ana pule. 33 Pe non Samaria e nanas sio ke la pe esia non neu nge tepal poreke ke ma pe letena poreke toto ia i. 34 Ol pe lake lome na chanchan mur nga oliua eina luluch nga uain. Ke het pe tal heke i nga nena tongki pe mene i ke langa pele nenge lang mur tema teueu ia pe nauele i. 35 Pomange rou non Samaria neu tung hot ke alak iri nai lange non nenge nauelele pele neu pe hele lange i ke teke, ‘O nauele non nei pe teke o hesilia ure hel nge i eat mule pe e tuacholia lange iong ol.’”

36 Iok, Iesus onteia hotonga ana hetoronga neu, “Nga ramam non tei nge hana mol nei nge o teke neingana toto non nenge te palia neu?”

37 Pe non hotonga ana hetoronga neu hele, “Ngana laka i nenge letena porekeia non nenge hana te palia nem.”

Pe Iesus hele lange i, “Iok, Ola pe opoi ke pomalaka nge non nem.”

Iesus Langa Marta Nena Pele

38 Iok laol, Iesus iri ul nena hana mur teila pe Iesus iteu nga kileng e. Pe heie ene Marta mene Iesus ke langa na pele. 39  q Pe Marta tina e ene Maria. I kila sio nga Iesus apena huna ke longlongo Iesus nge hetottoro. 40 Pe Marta letena inin taua tina Maria iange halaua i nga tuninga ero. Ol pe la ke hele lange Iesus, “Non Soke, tik pai hile sio mene iau ke iau toro e popoia ume lochloch pamai. Heongana nge at ke halaua iau kai?” 41 Pe Iesus tuacholia Marta pe hele, “Atong liuk, iong letem tu nga ure halang sakilil. 42  r Pe ure elle mana nge urana toto nge letem tu hite. Pe Maria hottaua ure nem pe lape e ua ia nge i ero ol.”

Copyright information for `UVL