am24Lo 15:12m25-291Ko 8:4-13m26Sam 24:1m31Kl 3:17
bm32Lo 14:13m331Ko 9:20-22
cm7Aba 1:26-27m8Aba 2:21-23m9Aba 2:18
dm181Ko 1:10-12
em25Hi 9:18-20
fm282Ko 13:5m32Hi 12:5-6

1 Corinthians 11

Iya Keliso tavagine ganunudadana amine, meda anafaiweya omi iya tavagikuya wananunudadana. a, b 

MiKolinita uꞋudi ana veꞋaikeva faꞋina, higa tamo hakwadi

babiya givehimeyedi ma ana iyaꞋiyaya.

Yaku gahe gaitoma moyaꞋaina faꞋina wanuwa-nunauyena ada tovetumagana yada dewa moyaꞋaina gavehawalemi-ma wadibudibumuhigena faꞋina gahawaveyamumuyemi.

Tu nuwanuwaku wanahalamane-hagihagiyena Bana Keliso kaliva moyaꞋaidi yadi tovehimeya kadu kwamayoku adi tovehimeya moganedi, kadu Keliso ma ana tovehimeya Yaubada. Hai kaliva omi miKolinita agaimiya giveꞋoveꞋoꞋola o kaꞋi AluꞋaluwa Mahalina yana venuwaꞋata giꞋawaꞋawatalatalainena tu uꞋuna ana aikeva keke gidavehalilini, medema mali kaliva givehimeyena ma giseyemaunena ada keke ana tovehimeya Keliso gidawowomumuyeni. Tu hai kwamayoku hiveꞋoveꞋoꞋola o kaꞋi AluꞋaluwa Mahalina yana venuwaꞋata hiꞋawaꞋawatalatalainena tu uꞋudi keke hidakevani, medema hihuluhuluva vaita kaliva amine ada moganedi keke hidawowomumuyeni. Yada dewa ana nuwanuwa ma kwamayoku yamayamadadadi uꞋudi hiyamana be hidedemi udo ana aituha hiseyemaunena amine, meda kwamayoku hitafatafalolo tu keke uꞋudi hidakevani-ma yadi huluva ana ita vaita yadi udo faꞋina uꞋudi hidayamani. KaꞋi kwamayoku hinadibutoyoga be uꞋudi keke hinakevani digo, uꞋudi hinatotona. Tu kaꞋi kwamayoku uꞋudi hinatotona o kaꞋi hinayamana amine, hinawowomumu lakahina higa vaita yadi udo ana iyaꞋiyaya. Vevine manuwa-tafalolo againe uꞋudi hinakevana, be keke udo ana iyaꞋiyaya amine hinaseyemauneni faꞋina. Tu kaliva ma Yaubada Tauna anununa againe kaliva gibubuna be Yaubada yana kikaiwabu giyemaunena faꞋina, gilubodana be gitafatafalolo againe keke uꞋuna ginakevani, ada medema againe keke mali kaliva tu Yaubada anakaibe ana tovehimeya ma ginaseyemaunena. Badi kwamayoku ma kaliva yana kikaiwabu hiyemaunena, faꞋina uꞋudi hinakevana, be medema againe bana kaliva adi tovehimeya ma hinaseyemaunena. Yada dewa uꞋuda ana veꞋaikeva faꞋina ana nuwanuwa au hidede amine. FaꞋina kaliva ma Yaubada keke kwamayoku luludiya gidabubuni. Kwamayoku kaliva lulune gibubudi. Kadu kaliva keke kwamayoku faꞋidiya gidabubudi, au kwamayoku kaliva faꞋine gibubudi. 10 Yaubada kwamayoku kaliva lulune gibubudi faꞋina, hitafatafalolo againe uꞋudi hinakevana be kaliva agevavane himimiyami ma hinaseyemaunena. Kadu lobama ana tovenuwaꞋata hilulauboda faꞋina uꞋudi hinakevana, ada mena uꞋudi ana veꞋaikeva againe moganedi yana abavehimeya dibune himimiyami ma ana iyaꞋiyaya hinayemaunena.

11 Tu kaliva vevine Kaiwabu yana yoꞋogaga agaidiya himimiyami-ma keke tulina tulina amine hinamiyami. Au kaliva vevine hinavelugadi, kadu vevine kaliva hinavelugadi. 12 FaꞋina boi tuwai-moꞋena Yaubada kwamayoku nagona kaliva lulune gibubuna amine, meda kadu tova hidevama kaliva vevine agaidiya hitubutubuga. Ada kaliva vevine gaitoma moyaꞋaina inubadi Yaubada. 13 Tu taumiyao yada dewa wananuwenuwena be wanavehimeya kaꞋi kwamayoku saꞋeyadi yoꞋo matadiya Yaubada againe hinaveꞋoveꞋoꞋola tu uꞋudi keke hinakevani amine, medema gilubodana o kaꞋi keke? 14 Keke gidalubodani faꞋina ide yada dewa wahalamanena, higa kaꞋi kaliva uꞋuna tunugina, yana wawowomumu ginamiyami. 15 Tu kwamayoku ma Yaubada uꞋudi tunugina giveledi uꞋudi ana aikeva faꞋina, ada medema adi vaigau hagihagina. 16 KaꞋi omi gaveyao nuwanuwami mena vevine yadi dewa faꞋina wanavekwageyeku digo, ganagahemi ganagayo, “Tova moyaꞋaina ime afositolo hidede amine avehavehawala, higa vevine hinaveꞋoveꞋoꞋola o kaꞋi AluꞋaluwa Mahalina yana venuwaꞋata hinaꞋawaꞋawatalatalainena againe, uꞋudi hinakevana. Ada tovetumagana adi yoꞋo tulina tulina agaidiya moyaꞋaidi mena dewai-nadi hiꞋitaꞋitaveꞋavina.” Au hidede amine yaku gahe. c 

Tovetumagana Kolinita againe sakalameni hiꞋivekoyona.

17 Tu adamoya kadu vehimeya saꞋeyana faꞋina ganalukahihi tu medema faꞋina keke ganahawaveyamumuyemi. FaꞋina wavagavagaꞋauta be Yaubada againe wanatafatafalolo ana toveya, keke aseꞋasemi ana leme wadanuhagani, au aseꞋasemi ana kivekoyo wanuhagana. 18 E, yaku gahe nagona ma valeyami saꞋeyana ganogalina, higa tafalolo faꞋina wavagavagaꞋauta againe, yami kaiwabu faꞋina waveꞋalaudaka. Ada ganuwanuwa vaita mena valeyami ganogalina-ma tufona velemoꞋena. 19 FaꞋina yami dewa gahalamanena tova moyaꞋaina waveveꞋalaudaka, ada mena dewai-nadi againe gaveyao yadi vetumagana velemoꞋena, ada keke kaiwabu faꞋina hidanuwanuwa, medema waseyemaunena. 20 Kadu ganagahe Kaiwabu Yesu Keliso ana anuwaꞋuduꞋudu faꞋina. Yada dewa ma kavagaꞋauta be au lakahina againe Kaiwabu kanuwaꞋuduꞋuduni tu sakalameni-moꞋena kavaina. E, mena seꞋeyaine wavagavagaꞋauta be Kaiwabu Yesu Keliso ana anuwaꞋuduꞋudu wanaꞋauꞋana againe, sakalameni waꞋivekoyona. Keke velemona Kaiwabu ana anuwaꞋuduꞋudu wadaꞋuꞋani. 21 FaꞋina kaliva vevine saꞋeyana saꞋeyana aꞋa waꞋaliyena-ma taumiyao wamaduꞋana tu keke tamo wadafolakeni, ada au tufoidi koyokoyo mafu gilaudi tu tufoidi wakalivadiyao hiyu-faꞋila be uꞋudi gikoyo. 22 Mene yami manuweya abaꞋauꞋa abayuyu gidadauda-ma maꞋi wanuwenuwena o kaꞋi keke? Omi toꞋa-faꞋila toyu-faꞋila yami manuweya wadaꞋa-yo wadaꞋela anuwaꞋuduꞋudu againe. KaꞋi Yaubada yana yoꞋo hivagaꞋauta-ma maꞋi waveꞋamohimohinedi o keke? Yana kaliva tufoidi keke wadaveꞋamohimohinedi, faꞋina badi adiga keke ma matadiya amiga lakahina waꞋauꞋa be wakivewowomumudi. Gavaimi ganagahe? KaꞋi mena yami dewa faꞋina ganahawaveyamumuyemi? Keke, keke-moꞋa! d 

Kaiwabu Yesu sakalameni ana vehimeya Folo givelena.

Madiu 26:26-27 Maki 14:22-25 Luke 22:14-20

23 Gavadi-yo mena sakalameni ana yaudi faꞋina keke ganahawaveyamumuyemi? Me waꞋita, sakalameni ana vehimeya Kaiwabu iya giveleku be omi gahawavelevelemi-ma hidede amine. Yudasi yana Kaiwabu nibaineyao agaidiya gihawavemogatalena bogi-nadi, Kaiwabu Yesu aꞋa givaina digo Yaubada againe givesiule gikihinena ana tomuliya agaidiya gigahe gigayo, “Hida aꞋa ma wowoku, omi faꞋimiya gahawahegena amanadi. Adamoya Iya gahuluva amine omi tova moyaꞋaina wanahuluhuluva be wananuwa-nunauyeku faꞋina.” 25 HiꞋa gihavaina, meda anafaiweya gowa givaina gigahedi gigayo, “Hida gowa ma Yaubada yana veyao ivaguna omi agaimiya gisena-ma ana iyaꞋiyaya. Iya dayagiku omi faꞋimiya ginamadu faꞋina Yaubada ginaveyaoyemi. Tova tova hida gowa wanayuyuyena againe, iya gahuluva amine omi wanahuluhuluva be wananuwa-nunauyeku faꞋina.” Hidede amine Kaiwabu Yesu gigahe. 26 FaꞋina tova tova hida aꞋa waꞋauꞋana kadu hida gowa wayuyuyena againe, Kaiwabu yana alika ide kaliva faꞋideya wahawavetuvetununa. E, tova moyaꞋaina hidede amine Kaiwabu yana alika wahawahawavetuvetununa Kaiwabu yana yewaꞋela ana maka. e 

Hai kaliva sakalameni ginaꞋivekoyona,

medema matahiwadi ginanuhagana.

27 Kaiwabu Yesu sakalameni ana nuwanuwa hidede amine gisena faꞋina, hai kaliva yana waꞋihawadamana Kaiwabu yana aꞋa ginaꞋana o yana gowa ginayuyena, medema vaita Kaiwabu wowona kadu dayagina gidakivekoyoni. 28 Kaliva saꞋeyana saꞋeyana aseꞋasemi wanatoliluveluvena be higa nuwanuwa koyona wanahegeni tu Kaiwabu yana aꞋa wanaꞋana yana gowa wanayuyena. 29 FaꞋina hai kaliva Kaiwabu yana aꞋa giꞋaꞋa-kawowona yana gowa giyuyuye-kawowona be Kaiwabu wowona ana nuwanuwa sakalameni againe gifaniyena, medema yanaꞋa yanayu againe matahiwadi ginavaina. 30 Kaiwabu wowona ana yaudi sakalameni againe wafaniyena faꞋina, tufoimi moyaꞋaimi wagakowakowa kadu waꞋaulolo, ada tufoimi waꞋalika. 31 Tu kaꞋi taudeyao aseꞋaseda kadatoliluveluvena be nuwanuwa koyona kadahegena sakalameni ana toveya, au Kaiwabu keke gidavedewayaugida-yo matahiwadi gidaveleda. 32 Tu tova tova Kaiwabu givedevedewayaugida ada matahiwadi giveleveleda be higa kanahagavilada, ada ide ada egana keke ginaꞋivebwavini faꞋina. E, matahiwadi giveleveleda be tomiyababi Kaiwabu Yesu keke hidavetumaganeni-ma Yaubada adi egana ginaꞋivebwavina amine, kadu ide ada egana keke ginaꞋivebwavini.

33 Siule tobohiyakweyao, Kaiwabu ana anuwaꞋuduꞋudu faꞋina wanavagavagaꞋauta ana toveya, tobohiyamiyao faꞋidiya wanaboda be moyaꞋaimi ahe wanavagaꞋauta-Ꞌowoga yo wanavebutu wanaꞋa. WanaꞋa-yo sakalameni wanavaina. 34 Hai kaliva mafu gilauna, medema tauna yana manuweya gidaꞋa-yo gidaꞋela. KaꞋi Kaiwabu ana anuwaꞋuduꞋudu againe tufoimi wanaꞋa-faꞋila o wanayu-faꞋila tu tufoimi amiga keke faꞋina wanawowomumu, au mena yami vagaꞋauta koyona faꞋina ami matahiwadi Yaubada nimane wananuhagana. Hidema faꞋina yami manuweya wanaꞋa-yo wanaꞋela be keke matahiwadi wananuhagani. Tu nuwanuwa tufona aimo gidadauda ma omi agaimiya ganaꞋela-yo medema faꞋina ganakivetuvetunumi. f 

Copyright information for `VIV