am31Fi 1:16m41Ko 6:13,15m5Lo 1:24-28m71Fi 1:15
bm8Lu 10:16m9Yo 13:34m11Ef 4:28m12Kl 4:5
cm131Ko 15:20, Ef 2:12m151Ko 15:51-52

1 Thessalonians 4

Yami dewa moyaꞋaina againe Yaubada nuwana

wanakiveyamumuna.

1Siule tobohiyameyao, kadu yaku gahe saꞋeya-moꞋena. Boi akivetuvetunumi higa gavaimi wanahuluhuluva be Yaubada nuwana wanakiveyamumuna faꞋina. Ada au hidede amine wahuluhuluva. Tova adamoya Kaiwabu Yesu ana eganeya aveꞋoꞋolemi kadu agahevagadonemi be mena dewa hagihagina againe wanatutuveguvegulami. 2FaꞋina ahe wahalamanena gava vehimeya Kaiwabu Yesu givelema, medema ahawavelevelemi.

3Tu Yaubada yana nuwanuwa omi faꞋimiya hidede amine. Nuwanuwana mahamahalimiyao wanamiyami ada udo tulina tulina wanavekwaulaugedi. 4Gilubodana be moyaꞋaimi saꞋeyana saꞋeyana nagomi ana hawata faꞋina halamana wanavaina. E, dewa tunutunugina amine Yaubada matane kadu kaliva matadiya yami nuwanuwa ayaꞋayafanina wanavehimeyena. 5Badi kaliva Yaubada keke hidahalamaneni-ma matadigadigaga againe hihawahawahegedi be keke maꞋita taudiyao hidahawatadi. Keke badi amine wanahuluva. 6Kaliva yadi huluva vevine agaidiya ma keke tamo hakwadi tobohiyana vavinena agaidiya ginakiluvaluva be hidede amine bana againe ginakivekoyo ada yana abavehimeya keke ginawowomumuyeni. Boi avenuwaꞋatami kadu agahemi toyogina, kaꞋi kaliva vevine agaidiya hinakoyo, au Kaiwabu adi matahiwadi ginaveledi. 7FaꞋina Yaubada keke gidakovada-yo udo againe kanamiyami. Au gikovada be dewa yegayegana againe kanamiyami. 8Hidema faꞋina hai kaliva mena yaku kivetuvetunu gikilowena, keke kaliva bonana gidakiloweni au Yaubada Bana AluꞋaluwana givelemi-ma bonana gikilowena. Yaubada yana nuwanuwa omi faꞋimiya au hidede amine.

9Tu veꞋahawahawahega tobohiyamiyao tovetumagana ami yoꞋo agaimiya faꞋina ime keke anaꞋetoladini, faꞋina omi taumiyao veꞋahawahawahega ana nuwanuwa faꞋina Yaubada againe ahe wasikulu. 10Ada wona velemona tobohiyamiyao tovetumagana adi yoꞋo Masedoniya ana fafali matatabuna agaidiya veꞋahawahawahega amine wahuluhuluva. Tobohiyameyao, kadu anagahevagadonemi be veꞋahawahawahega againe wanatutuveguvegulami. 11Giluboda-moꞋemi be kukuya againe wanamiyami, ami mataꞋatubodagaga wanaꞋitaveꞋavina, keke wanamiya-kawowo au taumiyao nimamiya wanafaisewa-hagihagi boi akivetuvetunumi amine. 12Medede amine wanahuluva be higa keke tamo hakwadi againe amiga ami kevakeva faꞋina wanavetumagana, au taumiyao yami faisewa againe wanavaivaina, ada au hidede amine yami dewa ginalubodana badi Yesu Keliso keke hidavetumaganeni-ma matadiya. a , b 

Yesu yana yewaꞋela ana toveya toꞋalika tomiyami faꞋidiya.

13Tu tobohiyameyao, keke nuwanuwama badi alika againe hiꞋenonuwaulu-ma faꞋidiya wananuwanuwafani be higa badi Yaubada keke hidahalamaneni-ma hitagitagi-faꞋila amine omi keke wanatagitagi-faꞋila. Badi yadi abaluveꞋavina keke, faꞋina keke hidanuwanuwa vaita tobohiyadiyao hiꞋalika-yo hina Yesu buye himimiyami. 14Ide kavetumagana higa vaita Yesu giꞋalika be gimididi-havagi. Medema faꞋina kadu kavetumagana higa vaita Yesu ginayewaꞋela ana toveya, Yaubada badi Yesu ana tovetumagana hiꞋalika-ma ginasivemidididi be Yesu buye ginanauwedi yana abageya. 15Kaiwabu Tauna yana gahe amine hidedemi avenuwaꞋatami, higa Kaiwabu Yesu ginayewaꞋela ana toveya ide gaveyao Yaubada keke gidavegaꞋauleda tu aimo wayawaida kanamiyami, medema keke wai kananagoni. Au badi alika againe hiꞋenonuwaulu-ma wai hinanagona tu ide wai kanamulina. 16Au Kaiwabu Tauna lobama amine ginahobuꞋela wakovaꞋawafatafatana kadu lobama ana tovenuwaꞋata kikaiwabuna waꞋagona kadu Yaubada yana hiulega waꞋagona. Ada nagona badi Keliso ana tovetumagana hiꞋalika-ma hinamididi-havagi au ide gaveyao Yaubada keke gidavegaꞋauleda tu aimo wayawaida kanamiyami, medema auheꞋama ide buye seꞋeyaine ginakifatumida digo buhibuhi againe ginanauweda be lobama hinafane Kaiwabu buye kanaveꞋanauhaga faꞋina. Ada au Kaiwabu buye kanamiyamiya-vagata. 18Hidema faꞋina mena Kaiwabu yana gahe againe buye wanaveꞋahawahawavemoluva be yami tagiya toꞋalika faꞋidiya ginahavaina. c 

Copyright information for `VIV