am1Hi 4:14, 12:2-3m2,5Ail 12:7m6Hi 3:14, 10:23
bm7-11Sam 95:7-11m7-8Yem 17:7, Ail 20:2-5m11Ail 14:21-23
cm14Hi 3:6m15Sam 95:7-8m16-18Ail 14:1-3,26-33

Hebrews 3

Yesu Mosese gikaiwabuhegena.

Siule tobohiyakweyao, omi Yaubada yana yoꞋogaga faꞋina gisevehailemi, ada kadu gikovami be aimo yana yoꞋo lobameya wanamiyami. Bana Yesu wananuwa-nunauyena, BanaꞋe Yaubada giꞋiveninisena ada abaveyao ana tofaisewa kikaiwabuna ide faꞋideya gisena be Yaubada ana vetumagana kaꞋabiꞋabina-ma againe ginagonagoyeda. Yesu mena faisewai-nadi faꞋina Yaubada givegidena-ma gibonabonaꞋabiyena. E, tuwai-moꞋena Mosese Yaubada yana yoꞋo hinafadiya giꞋidibumuhiga amine, meda anafaiweya tova moyaꞋaina Yesu giꞋidibumuhiga be Yaubada bonana matatabuna giꞋabina. WaꞋita, manuwa vewaga ana ita kaliva hinadavana tu manuwai-nadi ana toꞋaiyogona hinadava-moꞋena. Meda anafaiweya Mosese bana vaita Yaubada yana manuwa ana yowana amine ma kadavana, tu Yesu Tauna Yaubada yana manuwa ana toꞋaiyogona, higa yana yoꞋogaga adi toꞋihagihagi, kadava-moꞋena. Bana Mosese kikaiwabuna tu Bana Yesu kikaiwabu-moꞋena. Manuwa saꞋeyana saꞋeyana keke tauna gidamidi, au kaliva hikivemididina. Meda anafaiweya Yaubada yana manuwa higa yana yoꞋo keke taudiyao hidatubuyemu, au Yaubada yana vehimeya againe hitubuyemu faꞋina Bana gaitoma moyaꞋaidi inubadi. Bana Mosese ma Yaubada ana agetoga, ada yana yoꞋo matatabudi hinafadiya bana bonabonaꞋabina be gavaimi Yaubada yana nuwanuwa aimo tova mulina ginagaheyena, medema faꞋina giꞋawatalatalaina. Tu Bana Yesu ma keke Yaubada ana agetoga au Natuna, ada Bana bonabonaꞋabina be Yaubada yana manuwa higa yana yoꞋogaga agaidiya givehivehimeya. Ada ide Yaubada yana yoꞋogaga. KaꞋi yada waꞋasevatu kanaꞋatuvefaꞋila be gavadi aimo Yaubada ide faꞋideya ginagani-ma yada wavemwamwala kanalubode-moꞋena amine o, ide velemoꞋena Yaubada yana yoꞋogaga kamimiyami. a 

KanaꞋitaveꞋavida be keke miIsileli amine

Yaubada bonana kanaluhegehegeni.

KaꞋi yada waꞋasevatu kanaꞋatuvefaꞋila, au ide velemoꞋena Yaubada yana yoꞋogaga. FaꞋina AluꞋaluwa Mahalina Veyao Tuwaina ana bukiya gigahe amine kanahuluva gigayo,

Boi tuwai-moꞋena bwanenemiyao
babigaga againe hinunudadana ana toveya,
badi tagadi hiꞋivekuluna be
Iya yadi Yaubada hivekwaulaugeku.
Kadu yaku atuvefaꞋila higaluvaluvana.
Tu omiꞋiyao ma kaꞋi tova adamoya
bonaku wananogalina o,
keke bwanenemiyao amine tagami
wanaꞋivekuluni, au bonaku wanavenogalena.
Mene babigaga againe badi bwanenemiyao
yaku gugai malamala foti agaidiya hiꞋitaꞋitana.
Mena yaku gugai fifiwalana hiꞋitaꞋitana,
tu tova moyaꞋaina yaku atuvefaꞋila
yadi dewa koyona againe higagaluvaluvana,
ada bonaku keke hidavenogaleni.
10 Hidede amine hivekwaulaugeku faꞋina,
badi kalivai-dina agaidiya ganuwakoyo.
Badi faꞋidiya gagahe gagayo,
Tova moyaꞋaina tagadi kuluna
be eda tunutunugina hihegehegena
ada yaku nuwanuwa hifanifaniyena.
11 FaꞋina badi agaidiya ganuwakoyo lakahina
ada gawonadabadaba gagayo,
Abaga faꞋidiya gahawahegena-ma keke againe
hinaluku be agaikuya hinaveyawai, keke-moꞋa.
Au hidede amine Yaubada yana buki againe miIsileli faꞋidiya gigahe. b 

KaꞋi yada vetumagana kanahegena, keke kanaluku Yaubada yana abageya.

12 Tobohiyakweyao, tuwai-moꞋena bwanenemiyao tagadi kuluna keke Yaubada yana abaveyawai againe hidaluku, faꞋina taumiyao wanaꞋitaveꞋavimi be keke tamo hakwadi agaimiya nuwanuwa koyona aseꞋasene ginadauda-yo yana vetumagana ginahegeni-yo Yaubada Tomiya-vagata ginavekwaulaugeni. 13 Yaubada ide kaliva agaideya tova gihawahegena be againe bonana kanavenogalena. Tovai-nadi givewagana tova adamoya, ada tovai-nadi aimo gidadauda againe, tova tova buye wanaveꞋakivetuvetunu be yami vetumagana againe wanafaiwala ada keke tamo hakwadi agaimiya dewa koyona nuwana ginavaini-yo tagana ginakulukulu. 14 Boi tuwaina kavebutu Yesu againe kavetumagana. KaꞋi yada vetumagana kanakiveꞋavina, kanaꞋatuvefaꞋila kananunauwena yawaida ana aituheya, au ide velemoꞋena Keliso buye kavetobohiyana. 15 Mena Yaubada yana gahe saꞋeyana ahe gayakahina-ma kadu kanaꞋitanuwenuwena, gigayo,

Boi tuwai-moꞋena bwanenemiyao tagadi hiꞋivekuluna
be Iya yadi Yaubada hivekwaulaugeku.
Tu omiꞋiyao ma kaꞋi tova adamoya
bonaku wananogalina o,
keke bwanenemiyao amine tagami
wanaꞋivekuluni, au bonaku wanavenogalena.
16 Ma gaveyao Yaubada bonana hinogalini tu hivekwaulaugeni? Au badi moyaꞋaidi Mosese ginagoyedi be Idifita hiꞋotayabuyabuna-ma kalivai-dina. 17 Kadu gaveyao agaidiya Yaubada ginuwanuwakoyo malamala foti agaidiya? Au badi dewa koyona hififaisewani-yo hiꞋalika be luludi babigaga againe giꞋiyauyaulena-ma kalivai-dina. 18 Ada kadu gaveyao faꞋidiya Yaubada giwonadabadaba gigayo, Abaga badi faꞋidiya gahawahegena-ma keke againe hinaluku be Iya agaikuya hinaveyawai, keke-moꞋa? Au badi bonana keke hidavenogaleni-ma agaidiya hidede amine gigahe. 19 Badi yadi dewa koyona againe halamana kavaina. Keke Yaubada hidavetumaganeni faꞋina, abaga Yaubada yadi abaveyawai faꞋina gikidewedewena-ma againe keke adifaiweya hidaluku. c 

Copyright information for `VIV