am1Md 26:36m9Yo 17:12m11Md 26:39
bm14Yo 11:49-51
cm17Yo 13:38
dm20Md 26:55, Yo 7:26
em26Yo 18:1,10m27Yo 13:38
fm31Yo 19:6-7m32Yo 12:32-33m371Ti 6:13

John 18

Yesu miYuda hikiveꞋavina.

Madiu 26:47-56 Maki 14:43-52 Luke 22:47-53

1Yesu giveꞋoꞋola gihavaina, ime ana tomuliya buye ahobu gufa ana egana Kidiloni againe adamana. Yuwadede againe ai moyaꞋaina faha againe gikabu, ada Yesu ime buye aluku.

2Tu bana Yudasi Yesu gihawavemogatalena-ma, abagai-nadi gihalamanena, faꞋina medede againe tova moyaꞋaina Yesu ime ana tomuliya buye avagavagaꞋauta. 3Au abaveyao ana tofaisewa kikaiwabudiyao be tonagona tafatafalolodiyao adi egana Falisi, badi tolugaviya adi yoꞋo saꞋeyana kadu tuilala tufoidi hiꞋiveninisedi be walamufadiyao wadakidiyao wagiyodiyao Yudasi giꞋaliyedi ime Yesu buye amiyami-ma abagai-nadi againe.

4Hiyemu tu Yudasi Yesu ana tohawavemogatala badi buye himidimidi. Au Yesu gaitoma moyaꞋaina Bana againe ginalakayemu-ma gihalamanena faꞋina givagaꞋela badi agaidiya gigahe gigayo, “Hakwadi waleleleni?”

Badi higayo, “Yesu kwanaNasaledi.”

Bana Yesu gigayo, “Au Iya Kaliva-moꞋeku.”
6Ada Yesu Tauna gigahe Iya Kaliva-moꞋeku againe, au hinuvagatugu yadi wamatauta babiya hibeꞋu.

7Kadu gitoliluveluvedi gigayo, “Hakwadi waleleleni?”

Kadu badi higayo, “Yesu kwanaNasaledi.”

8Yesu gigayo, “Ahe gagahemi Iya Kaliva-moꞋeku. KaꞋi Iya waleleleku digo, hida yaku kalivamomo ma wakiꞋilovedi be hinana.” 9Hidedemi gigahe be bonana yana veꞋoꞋola Tamana againe ahe gigaheyena-ma velemoꞋena gidalakayemu. Boi hidemi gigahe, “Uveleku kalivai-dina ma keke tamo gadanuhegeni-yo gidabwavi.”

10Tu Saimoni-Fita yana feto giwahina-ma gisiwakana digo kaliva saꞋeyana gilauna be tagana waꞋiꞋatagine giluyoꞋena. Bana kalivai-nadi abaveyao ana tofaisewa adi tokaiwabu ana agetoga, ana egana Maleko. 11Fita bana tagana giluyoꞋeni-yo Yesu gigahena gigayo, “Ya feto ana foseya useni. MakewaꞋe aulolo ana gowa Kamaku giveleku-ma ganayuyena, keke ganakiloweni.” a 

Anasi againe Yesu hivekotuna.

12Tu Yesu gigahe-yo badi tolugaviya adi tonagona buye, kadu miYuda yadi tuilala au Yesu hikiveꞋavina be hiyogo-yo Anasi againe himidinauwena, bana Kaiyafasi lawana ada medema malamalai-nadi againe bana Kaiyafasi abaveyao ana tofaisewa adi tokaiwabu. 14Kadu Kaiyafasi ma boi miYuda givehimeyedi gigayo, “Gilubodana be kaliva saꞋeyanaga miYuda moyaꞋaida faꞋideya gidaꞋalika.” b 

Fita Yesu faꞋine givekeke.

Madiu 26:69-70 Maki 14:66-68 Luke 22:54-57

15Tu Saimoni-Fita Yesu gibwaꞋulina kadu iyaꞋeku buye, iya kadu Yesu ana tomuliya. Abaveyao ana tofaisewa adi tokaiwabu gihalamane-hagihagiyeku, faꞋina yana manuwa ana edaꞋawaneya iya Yesu buye aluku tu bana Fita kabuꞋavane wana liline gimidimidi. Au iya gahobu agetoga kwamayoku wana giꞋitaꞋitaveꞋavina-ma againe gagahe ada wana giyauna be Fita giluku.

17Bana kwamayoku-nadi Fita againe gigahe gigayo, “Kadu o kalivai-nina wadema kalivai-nadi ana tomuliya agaidiya, au ayoma?” Fita gigayo, “Iya keke.”

18Tu tokaiwabu ana agetoga be badi tuilala ai hikulina kwadudu faꞋina, ada himidimidi tu ai hivevevala. Ma kadu bana Fita badi agaidiya gina gimidimidi tu ai givevevala. c 

Abaveyao ana tofaisewa adi tokaiwabu

Yesu givedewayaugina.

Madiu 26:57-68 Maki 14:53-65 Luke 22:66-71

19Tu bana abaveyao ana tofaisewa adi tokaiwabu Yesu gitoliluveluvena. Ime ana tomuliya faꞋimeya kadu yana vehawala faꞋina gitoliluvaluva. 20Bana Yesu gigayo, “Tova moyaꞋaina kaliva moyaꞋaidi matadiya gagahegahe. E, manuwa-abavehawala agaidiya be manuwa-tafalolo lakahina againe miYuda moyaꞋaida kavagavagaꞋauta-ma, gavehavehawala tova moyaꞋaina. Keke tamo gavadi gadagahekauyeni. 21Tu gavana faꞋina-yo Iya utoliluveluveku? Badi bonaku ahe hinogalina-ma unatoliluveluvedi. Gavaimi gagahegaheye ma hihalamanena.”

22Hidemi gigahe tu tuilala saꞋeyana liline gimidimidi-ma Yesu giluꞋatugena gigayo, “Gavadi-yo tokaiwabu lakahina uꞋihawadamane?”

23Yesu gigayo, “KaꞋi gagahe koyona digo, gavadi yaku koyona au unahawavemogatala kaliva matadiya. Tu kaꞋi gagahe yamumuna amine, gavadi-yo uluꞋatugeku?”

24Au Anasi Bana Yesu nimana aimo yogoyogonina Kaiyafasi againe giꞋiveninisena, bana abaveyao ana tofaisewa adi tokaiwabu. d 

Fita Yesu faꞋine givekeke-havagi.

Madiu 26:71-75 Maki 14:69-72 Luke 22:58-62

25Tu Saimoni-Fita gimidimidi tu ai givevevala. Badi kaliva buye himidimidi-ma higahena higayo, “OꞋeni kadu saꞋeya ana tomuliya agaidiya, kaꞋi ayoma?” Tu kadu givekeke gigayo, “Iya keke.”

26Abaveyao ana tofaisewa adi tokaiwabu ana agetoga saꞋeyana, bana kaliva tagana Fita giluyoꞋena-ma tobohiyana gigayo, “KaꞋi oꞋeni ma gaꞋita, boi faha againe bana buye wamiyami, kaꞋi ayoma?” 27Kadu Fita givekeke-havagi. Tu auheꞋama kamukamu gikwage. e 

Failato againe Yesu hivekotuna.

Madiu 27:11-14 Maki 15:1-14 Luke 23:1-5

28Tu miYuda Kaiyafasi yana manuweya hihobu be Yesu hinauwena kwanaLoma yama tovehimeya yana manuwa lakahina againe. Bana tovehimeya ana egana Failato. Aimo mala gilaulauna. MiYuda taudiyao manuwa lakahina againe keke hidaluku. KaꞋi hidaluku digo, adi hawata hidayawelina vaita aseꞋasedi hidakivebwanenena. KaꞋi hidayawelina digo, tafalolo lakahina aꞋana keke adifaiweya hinaꞋani, tafalolo ana egana lobama ana tovenuwaꞋata yana Abamaduviviya. Hidede amine yadi vehimeya gisena. 29MiYuda adi hawata faꞋina Failato gihobu kabuꞋavane badi agaidiya be gigayo, “Hida kaliva gavaimi wahawavekoyoyeni?”

30Badi higayo, “KaꞋi hida kalivai-nadi keke tokoyona, kadu keke adaꞋaliye o againiya.”

31Failato gigahedi gigayo, “Au omi wananauwena be taumiyao yami vehimeya amine wanavedewayaugina.”

Tu miYuda higayo, “Omi miLoma wahawatama faꞋina, keke amafaiweya anavehimeya be kaliva alika againe anahegeni tu nuwanuwama omi wanakivekelosena.”
32Hidede amine hihuluva be gavaimi Yesu yana alika keloseya faꞋina boi gigaheyena, medema velemoꞋena gidalakayemu.

33Tu miYuda higahe-yo Failato giluku-havagi manuweya ada Yesu giyowanina be gigahena gigayo, “KaꞋi velemoꞋena OꞋeni miYuda adi tokaiwabu?”

34Yesu gigayo, “KaꞋi tauni ya nuwanuwa againe hidemi ugahe, o kaꞋi mali kaliva Iya faꞋikuya o againiya higahe ma unogalina faꞋina ugahe?”

35Failato gigayo, “KaꞋi o uvaita iya kwanamiYuda? Iya hima tuliku. O Tauni ya yoꞋo be kadu yami abaveyao ana tofaisewa kikaiwabudiyao iya agaikuya hiꞋaliye. Gavadi tamo koyona ufaisewani-yo?”

36Yesu gigayo, “IyaꞋeku tokaiwabu tu keke hida babi againe gadavehimeya. KaꞋi hida babi againe gadavehimeya digo, yaku yoꞋo boiyesedi hidalugaviya be keke miYuda hidakiveꞋaviku faꞋina. Tu yaku abavehimeya inubana tulina.”

37Au Failato gitoliluveluvena gigayo, “VelemoꞋena OꞋeni tokaiwabu?”

Yesu gigayo, “Ika, ugahe amine tokaiwabu IyaꞋeku. Nuwanuwa velemoꞋena faꞋina kaliva agaidiya gaꞋawatalatalaina. Hidema faꞋina Iya gatubuga kadu hidema faꞋina gahobuꞋela babiya. Gaveyao nuwanuwa velemoꞋena ana kaliva, medema bonaku hivenogalena.”

38Failato gigayo, “Nuwanuwa velemoꞋena gavaꞋadi?” Gigahe-yo gihobu-havagi kabuꞋavane miYuda agaidiya, ada gigahedi gigayo, “Keke tamo gavadi koyona Bana againe gadanuhagani. 39Tu tafalolo lakahina ana egana Abamaduviviya ana toveya yami dewa saꞋeyana amine ganahuluva. Kaliva saꞋeyana yogoyogonina ganayauna be ginahobu. KaꞋi nuwanuwami hida kaliva miYuda ami tokaiwabu ganayauna?”

40Au badi miYuda hikovadona higayo, “Keke BanaꞋe. Ime nuwanuwama Balaba.” Tu Balaba bana tomunugakaiꞋafu. f 

Copyright information for `VIV