am3Af 13:24, 19:4m4Ais 40:3-5m8Af 26:20, Yo 8:39
bm9Md 7:15-20m12Lu 7:29
cm15-16Yo 3:28, Af 1:5, 13:25m19-20Md 14:3-4, Mk 6:17-18
dm21-22Yo 1:32-34, Mad 17:5, Lu 9:35

Luke 3

Yoni tobafitaiso yana laumamala.

Madiu 3:1-10 Maki 1:1-6 Yoni 1:19-23

Loma Tokaiwabu ana egana Sisa-Taibiliyo malamala fifitini givehivehimeya tu Yaubada bonana Yoni Sakalaiya natuna againe gilakayemu, bana babigaga againe gimiyami-tu. Medema tovai-nadi Fonitiyo-Failato Yudiya ana fafali givehivehimeyena, bana Helodi Galili ana fafali givehivehimeyena ada tobohiyana Filifi Ituliya be Tilakonaidi adi fafali givehivehimeyedi, kadu bana Laisaniya Abilene ana fafali givehivehimeyena. Au hidedemi tovehimeya adi loi, tu tovai-nadi againe Anasi be Kaiyafasi abaveyao ana tofaisewa adi tokaiwabu. Au Yaubada Yoni againe gigahe-yo Yoni gufa ana egana Yolidani awaꞋawanina moyaꞋaina agaidiya ginunudadana tu gilulumamala gigayo, “Yami dewa koyona wanavenikohiyena be wanabafitaiso. Wananuwavilana be Yaubada yami koyona ginayawelina.” Boi tuwai-moꞋena Yaubada bonana ana toꞋawatalatalaina ana egana Aiseya yana buki againe giꞋetoladina amine, meda Yoni gihuluva. Aiseya gigayo,

Kaliva agona hinogalina walaꞋaiya gikovakovadadana
gigayo, Kaiwabu yana eda wanavetauna
yana eda aseꞋasemiya wanakidewedewena.
NuꞋawaꞋawahagana wanavetauna,
oya lakahidi kabiꞋodi wanayalamoidi,
eda nubalabaladi wanakivetuvetunudi,
kadu eda dabodabodi wanaluꞋukeukedi.
WanaꞋihagihagi be kaliva moyaꞋaidi
Yaubada yana kibababala hinaꞋitana.
Au hidedemi Aiseya yana gahe.

Tu Yoni kaliva moyaꞋaidi bana againe hiyoꞋoyoꞋo be ginakivebafitaisoyedi-ma agaidiya gigahe gigayo, “Omi vaita oloto koyona ana egana vaiba natuneyao amine. Hakwadi givenuwaꞋatami-yo, vaita Yaubada yana ilaꞋa omi agaimiya wadaꞋoseni? Keke amifaiweya Yaubada wanaꞋoseni. Omi wagahe vaita yami koyona wadahegeni-yo wadahagavilami. Au dewa yamumuna wanafaisewani-yo yami hagavila au velemoꞋena ma anahalamanena. Kadu keke wanavebutu taumiyao agaimiya wanagahe wanagayo, Ide Abelahamo bwaneneneyao faꞋina kadu ide Yaubada natuneyao. Au gagahemi Yaubada anafaiweya ginakilowemi tu hida kabala agaidiya kaliva ginabubudi be Abelahamo ana yoꞋoya ginasedi. KaduꞋe adamoya tamuyoko ahe hiyadalina be ai hinaluꞋinubadi, ada ai saꞋeyana saꞋeyana guwadi keke yamumuna ma hinataladi be aiꞋalaꞋalata againe hinahegedi. Ai-dina amine omiꞋiyao.”

10 Au hidedemi Yoni gigahegahe tu yoꞋoyoꞋo higahena higayo, “Au gavadi anagani?”

11 Bana gigayo, “Hai kaliva ana aikeva luhei, medema gilubodana be kaliva ana aikeva keke ma gidavelena. Meda anafaiweya aꞋa gidafolakena.”

12 Kadu takesi ana toyaudi hiꞋela be hinabafitaiso ada higahena higayo, “Tovehawala, ime gavadi anagani?”

13 Yoni gigahedi gigayo, “Takesi ana manigaga wanayaudi, keke taumiyao faꞋimiya wanavai-kawowoni.”

14 Tu kadu tolugaviya tufoidi hitoliluveluvena higayo, “Kadu ime gavadi anagani?” Bana gigayo. “Keke kaliva yadi lokoloko wanalemadi kadu keke kaliva wanakiholiholidi. Fatami faꞋina wanavenuwakibokibo.” Au hidedemi Yoni gigahedi. a, b 

Yoni Tobafitaiso Yesu inubana faꞋina givenuwaꞋata.

Madiu 3:11-12 Maki 1:7-8 Yoni 1:24-34

15 Tu kaliva moyaꞋaidi Yaubada yana Tovegida Keliso yana yemu faꞋina hilulauboda, ada hivebutu Yoni faꞋine nuwahinagediya hinuwanuwa vaita kaꞋi bana Keliso-moꞋena o kaꞋi keke. 16 Yoni yadi nuwahinage gibonalaufata gigayo, “IyaꞋeku ma gufa againe gakivebafitaisoyemi tu kaliva saꞋeyana gifaiwalahegeku-ma giꞋelaꞋela. Bana kikaiwabu-moꞋena tu iya kwamana kabisoku faꞋina keke akufaiweya Bana againe ganaveꞋagetoga-yo ana ageyafayafa adi abaꞋaiyauga ganayauni. BanaꞋe ma AluꞋaluwa Mahalina againe tufoimi ginakivebafitaisoyemi be ginavemagami, tu tufoimi aiꞋalaꞋalata againe ginakivebafitaisoyemi mema higa vaita ginavematahiwadiyemi. 17 E, aimo ginaꞋela ada yana abasaibutu ana giꞋe lakahina ginaꞋabina be witi ana abavagakolukolu againe ginasibutuna. AꞋa-moꞋena yana kweda againe ginaꞋiveꞋaveꞋahina tu yogona ai giꞋalata-vagata ma againe ginaluveꞋalahina.” 18 Au hidedemi Yoni gilumamaledi kadu enohega tulina tulina amine Yaubada yana VenuwaꞋata Yamumuna faꞋina giluꞋageyedi.

19 Tu Yoni tovehimeya Helodi gidakeyena. Bana Helodi tobohiyana vavinena adi egana Helodiyasi giluhabuyedi faꞋina gidakeyena, kadu yana dewa koyona moyaꞋaina faꞋina gidakedakeyena. 20 Helodi koyona moyaꞋaina gifaisewadi tu koyona saꞋeyana buye giveꞋatutamoꞋaina higa Yoni deliya gisena. c 

Yoni Yesu gikivebafitaisoyena.

Madiu 3:13-17 Maki 1:9-11

21 Tu Yoni aimo keke deliya gidaluku tu kaliva moyaꞋaidi gikikivebafitaisoyedi ana toveya, kadu Yesu gikivebafitaisoyena. Yesu gibafitaiso gihavaina giveꞋoveꞋoꞋola tu lobama giꞋayavalina be AluꞋaluwa Mahalina ana ita vaita bunebune amine Bana againe gihobuꞋela. Au agoꞋago lobameya gikova gigayo, “OꞋeni NatuꞋaseꞋaseku. Nuwaku ukiveyamumu-moꞋena.” Au hidedemi Yaubada gigahe. d 

Yesu bwaneneneyao faꞋidiya.

Madiu 1:1-17

23 Tu Yesu tauna ma ana malamala teti givaidi-yo yana faisewa givebutuna. Kaliva hivaitana Yesu tamana Yosefa tu Yosefa tamana Heli,

24 
  • Heli tamana Matata, Matata tamana Livai,
  • Livai tamana Meliki, Meliki tamana Yanai,
  • Yanai tamana Yosefa,
25 Yosefa tamana Matatiya, Matatiya tamana Emosi, Emosi tamana Nahumi, Nahumi tamana Esilai, Esilai tamana Nagai, 26 
  • Nagai tamana Madi, Madi tamana Matatiya,
  • Matatiya tamana Semeini, Semeini tamana Yoseki,
  • Yoseki tamana Yoda,
  • 27 Yoda tamana Yowanani, Yowanani tamana Lesa, Lesa tamana Selubabela, Selubabela tamana Saladiyeli, Saladiyeli tamana Neli, 28 
  • Neli tamana Meliki, Meliki tamana Adi,
  • Adi tamana Kosami, Kosami tamana Elimadamu,
  • Elimadamu tamana Eli,
  • 29 Eli tamana Yosuwa, Yosuwa tamana Eliyesa, Eliyesa tamana Yolima, Yolima tamana Matata, Matata tamana Livai, 30 
  • Livai tamana Simiyoni, Simiyoni tamana Yuda,
  • Yuda tamana Yosefa, Yosefa tamana Yonama,
  • Yonama tamana Elayakimu,
  • 31 Elayakimu tamana Meleya, Meleya tamana Mena, Mena tamana Matata, Matata tamana Nadani, Nadani tamana Devida, 32 
  • Devida tamana Yese, Yese tamana Obedi,
  • Obedi tamana Bowasi, Bowasi tamana Salamoni,
  • Salamoni tamana Nasoni,
  • 33 Nasoni tamana Aminadabu, Aminadabu tamana Adimina, Adimina tamana Ani, Ani tamana Hesiloni, Hesiloni tamana Felesi, Felesi tamana Yuda, 34 Yuda tamana Yakobu, Yakobu tamana Aisake, Aisake tamana Abelahamo, Abelahamo tamana Tela, Tela tamana Naho, 35 
  • Naho tamana Seluke, Seluke tamana Leu,
  • Leu tamana Feleke, Feleke tamana Iba,
  • Iba tamana Sila,
  • 36 Sila tamana Kenani, Kenani tamana Afakesedi, Afakesedi tamana Semi, Semi tamana Nowa, Nowa tamana Lemeki, 37 
  • Lemeki tamana Metusela, Metusela tamana Inoki,
  • Inoki tamana Yaledi, Yaledi tamana Mahalalila,
  • Mahalalila tamana Kenani,
  • 38 Kenani tamana Inosi, Inosi tamana Seti, Seti tamana Adama, Adama tamana Yaubada.
    Copyright information for `VIV