am42Veh 8:3m5-6Yo 12:31, 14:30m82Veh 6:13
bm9-11Sam 91:11-12m122Veh 6:16, 1Ko 10:9m13Hi 2:18, 4:15
cm18-19Ais 61:1-2m25-261Kin 17:1-24, 18:1m272Kin 5:1-14
dm33-34Md 8:28-29, Yo 6:69, Lu 8:28
em41Md 8:29, Mk 3:11-12

Luke 4

Setani Yesu giꞋaladibidibiyena.

Madiu 4:1-11 Maki 1:12-13

1Tu Yesu Yolidani againe gibafitaiso gihavaina, AluꞋaluwa Mahalina ahe giluvaiye-moꞋeni yo givehimeyena be babigaga againe gina aiyeta foti agaidiya gimiyamiyanana tu Setani giꞋalaꞋaladibidibiyena. Ada aiyetai-dina agaidiya keke tamo aꞋa gidaꞋuꞋani faꞋina mafu gilauna.

3Au Setani giꞋela gigahena gigayo, “KaꞋi velemoꞋena OꞋeni Yaubada Natuna, hida kabala unavehimeyena be ginaveꞋaꞋa.”

4Tu Yesu gigayo, “Yaubada bonana etoꞋetoladina gigahe gigayo,

Keke aꞋa-moꞋa gagana againe kaliva yawaimi wanavivaini.”
5KaduꞋe Setani giꞋela Yesu oyeya gilakavena, babi ana abavehimeya tulina tulina givehawalena ada auheꞋama Yesu giꞋitaꞋauhi-Ꞌowodi kadu gigahena gigayo, “Hida abavehimeya moyaꞋaina adi kikaiwabu buye O ganavele. Abavehimeyai-dina adi wakikaiwabu iya nimakuya hdadauda, ada hakwadi nuwanuwaku ganavelena, au ganavelena. 7KaꞋi OꞋeni agaikuya unadavadava, abavehimeyai-dina matatabudi ganavele.”

8Yesu gibonalaufata gigayo, “Yaubada bonana etoꞋetoladina gigahe gigayo,

Yaubada yami Kaiwabu againe wanaꞋoduꞋodu,
Bana anakaibe wanahawadavadavana.”
9KaduꞋe Setani giꞋela Yelusalema againe ginauwena be manuwa-tafalolo ana uduꞋuduya gilakavena gigahena gigayo, “KaꞋi OꞋeni velemoꞋena Yaubada Natuna, au hidedei tu babiya unaꞋauhifu, faꞋina Yaubada bonana etoꞋetoladina gigahe gigayo,

Iya Yaubada yaku tovenuwaꞋata ganavehimeyedi
be hinaꞋitaveꞋavi, ada nimadiya
o hinakamohi be age keke kuga ginatalani.”
Au hidedemi Yaubada yana gahe saꞋeyana Setani giyakahina.

12Yesu gibonalaufata gigayo, “Yaubada bonana etoꞋetoladina hidedemi gigahe gigayo,

KaꞋi o tauni vita againe unavetalaiye digo,
keke Yaubada ya Kaiwabu yana leme ana
veꞋoꞋola againe unagaluvaluvani.”
Au hidedemi Yesu gigahe.

13Ada au Setani aladibidibi tulina tulina agaidiya Yesu gigaluvaluvana gihavaina, ginuyabuyabuna be kadu aimo mali aituheya. a , b 

Yesu yana faisewa givebutuna.

Madiu 4:12-17,23-24 Maki 1:14-15,39

14Tu AluꞋaluwa Mahalina yana faiwala Yesu againe gimiyami tu Galili ana fafaliya kadu giyewana, ada medema awaꞋawanina moyaꞋaina agaidiya ana valeya giveꞋaliyahega. 15Yadi manuwa-abavehawala adi egana sinagogi agaidiya givehavehawala, ada moyaꞋaidi hidavadavana.

MiNasaledi Yesu hikilowena.

Madiu 13:53-58 Maki 6:1-6

16Tu Nasaledi againe Yesu giyemu, medema melalai-nadi againe gilakata. Ada sabati againe manuwa-abavehawala againe giluku yana dewa amine. Au gitowamidi be Yaubada bonana ginahawana. 17Ada kaliva saꞋeyana buki tuwai-moꞋena Aiseya giꞋetoladina-ma givelena. Yesu buki givaina digo giluyagilina ada yana maita ginuhagana be gihawana-ma hidedemi gigahe.

18Kaiwabu AluꞋaluwana agaikuya gimimiyami,
givegideku be koyokoyo agaidiya
valeya yamumuna ganalumamalena.
Hida venuwaꞋata faꞋina giꞋiveniniseku,
yogoyogonidiyao adi aiyauga hinavaina
tomatakoyo hinaꞋita-havagi.
Kadu giꞋiveniniseku be
tonuwavita nuwadi ganakiveyamumuna.
19Givegideku be kaliva ganavenuwaꞋatadi
Yaubada yana nuwadoga ana tova a giyemu.
Au hidedemi Aiseya yana gahe Yesu gihawana.

20Tu Yesu gihawa gihavaina, buki giꞋuwana digo toleme giveleyeweni tu gihiyoto. Ada moyaꞋaidi manuwa-abavehawala againe himiyami-ma hiꞋitakwanekwanena. 21Au Yesu givebutu gigahedi gigayo, “Adamoya mena Yaubada yana gahe wanogalina-ma gilakayemu velemoꞋena.”

22Ada kaliva moyaꞋaidi hihawaveyamumuyena ada gahe nuwaꞋabiꞋabina amine gilukahihi faꞋina nuwadi givegafoꞋuyaꞋuya higayo, “Bana hidevama Yosefa natuna tu yana gahe ana nogala vaita kaliva saꞋeyana.”

23Yesu gigahedi gigayo, “Gavaita yada gahegahe saꞋeyana agaikuya wanayakahina. Hidedemi wanagayo, O doketa faꞋina tauni unasiveyawa. Kafeneumi againe aituha fifiwalana ufaisewana be valeyana anogalina amine, meda hidei tauni ya melala againe unafaisewana.

24Au hidedemi omi wanagaheku tu iya gagahemi velemoꞋena, kaꞋi falofita Yaubada bonana tauna yana yoꞋo agaidiya ginaꞋawatalatalainena, keke hinavenogaleni. Meda omi yaku yoꞋo wanahuluviku. 25Wanogali! Omi wahalamanena tuwai-moꞋena Elaiya yana toveya keke maꞋita wehi gidalugaga ginunauwena malamala tohiye kadu hafuna, ada melala moyaꞋaina agaidiya loka lakahina gilakayemu. Medema tovai-nadi sikwa moyaꞋaidi Isileli ana fafaliya himiyami tu Elaiya yana yoꞋo miIsileli hikilowena faꞋina, Yaubada keke badi yadi sikwa agaidiya Elaiya gidaꞋiveniniseni be ginavelugadi. Au vinemiSalefadi sikwasikwadi adikaibe agaidiya giꞋiveninisena. Badi yadi melala keke Isileli ana fafaliya, au Saidoni ana fafaliya. 27Meda anafaiweya tuwai-moꞋena Yaubada bonana ana toꞋawatalatalaina ana egana Elaisa yana toveya, tovedawodawowo moyaꞋaidi Isileli ana fafaliya himiyami tu keke tamo badi agaidiya gidasiveyawani, au Neyamani anakaibe gisiveyawana ada bana keke kwanamiIsileli au kwanamiSiliya.” Au hidedemi Yesu miNasaledi gigahedi.

28Tu kaliva moyaꞋaidi manuwa-abavehawala againe himiyami tu Yesu yana gahe miIsileli keke yadi wavetumagana ma faꞋidiya hinogalini-yo hinuwakoyoveꞋine. 29Au hitowamidi Yesu hiwavina be melala gihegena. Yadi melala oya fafaline hiveꞋalahina faꞋina kabune hinauwena higa sefa againe hidatuwavelowona. 30Tu Yesu yoꞋoyoꞋo hinafadiya ginu-moꞋa be gina. c 

Yesu kaliva wayafunena gikiveyamumuna.

Maki 1:21-28

31Yesu gina tu Kafeneumi Galili ana fafali againe gihobuꞋela, ada sabati againe givebutu kaliva givehawaledi. 32Ada yoꞋo yana vehawala faꞋina hiyaulowoga, faꞋina yana gahe aseꞋaseꞋiꞋonagina vaita tovehimeya velemoꞋena amine.

33Tu mena manuwa-abavehawala againe kaliva saꞋeyana wayafunena gimiyami. Yafune koyona giluvaiyeni-yo gikovaꞋawafatafata gigayo, “Ha! Yesu kwanaNasaledi gavadi ime agaimeya unagani-yo uꞋela? KaꞋi O uꞋela be ime yafune ama loi unamunuma-yo anabwavi? O ya inuba gahalamanena. OꞋeni Yaubada yana Kaliva Mahamahalina.”

35Yesu yafune gihawatana gigayo, “GiꞋalove. Una kaliva unuyabuyabuni.” Yesu gigahe-yo yafune yoꞋo hinafadiya kaliva gibaina be ginuyabuyabuna tu kaliva keke tamo vita gidanuhagani.

36Kaliva moyaꞋaidi hiꞋita-yo hiyaulowoga-moꞋa buye hiveꞋagahegahe higayo, “Hima hida gava gahe yo yana wafaiwala kadu yana waꞋabavehimeya yafune givehimeyedi be kaliva hinunuyabuyabudi?” 37Ada Yesu valeyana melala moyaꞋaina Kafeneumi awaꞋawanine giveꞋaliyahega. d 

Yesu toꞋaulolo moyaꞋaidi gisiveyawadi.

Madiu 8:14-17 Maki 1:29-34

38Tu Yesu gimidi manuwa-abavehawala againe gihobu tu Saimoni yana manuweya giluku. Tu Saimoni lawana hiꞋaulolo lakahina wowodi vaita ai, ada badi faꞋidiya Yesu hiveꞋoꞋolena be ginavelugadi. 39Au Yesu gina giꞋodutagodi au wowodi ana lukalalava gihawatana be gituluna. Ada auheꞋama himidi be hivebutu adi wakawaka adiga hikidewedewena.

40Kauwana giholuholu tu gaveyao moyaꞋaidi agaidiya toꞋaulolo yadi aulolo tulina tulina himiyami, medema Yesu againe hiꞋaliyedi ada nimana badi agaidiya gisena be moyaꞋaidi gisiveyawa-Ꞌowodi. 41Kadu yafune kaliva tufoidi moyaꞋaidi hiluvaiyedi-ma hinulovelovedi hikova higayo, “OꞋeni Yaubada Natuna.” Tu Yesu gihawatadi be keke hinagahe, faꞋina Bana Yaubada yana Tovegida ma hihalamanena. e 

Yesu Yudiya melalidi agaidiya gilulumamala.

Maki 1:35-39

42Hida mala gilauna Yesu gilowoga be gina melalagaga againe be anakaibe ginamiyami faꞋina. Tu yoꞋo hivemulitawaina be Bana againe hiꞋela vaita hinasiveyewana tu gigahedi gigayo, “Gilubodaku be Yaubada yana abavehimeya ana VenuwaꞋata Yamumuna kadu mali melala agaidiya gadalumamalena. Hidema ana inuba faꞋina Yaubada givegideku be gahobuꞋela.” 44Ada au manuwa-abavehawala ana egana sinagogi Yudiya melalidi agaidiya gilulumamala.

Copyright information for `VIV