am2Ha 6:10m3Ha 14:11m4Ha 4:9-11m6Ha 11:15-18, 14:2-3
bm7Ha 21:2,9, Ef 5:32m8Ais 61:10m9Lu 14:15m10Ha 22:8-9
cm12Ha 1:14m13Yo 1:1,14m15Ha 1:16m16Ha 17:14
dm19Sam 2:2m20Ha 13:11-17, 20:10m21Ha 19:17-18

Revelation of John 19

Yoni kweli lakahina lobameya ginogalina.

Tu Babiloni ana lauyawela gaꞋita-yo butuna lakahina ganogalina, vaita yoꞋoyoꞋo lakahi-moꞋedi lobameya hikovakova higayo,

Aleluya! Ada kibababala Yaubada againe giveꞋinuba,
BanaꞋe kikaiwabuna kadu fifiwalana.
Yana laufata velemoꞋena kadu tunutunugina.
Mena melala vaita kwamayoku yamayamadadadi amine
yadi dewa udoꞋudona agaidiya gilaufata.
Dewai-nadi againe tomiyababi hinuwaꞋabiyedi.
Tu yana tofaisewa hiluveꞋalikadi-ma dayagidi gilaufata.
Au hidedemi hikova.
Kadu hikova-havagilena higayo,

Aleluya! Yaubada kanadavadavana
faꞋina melalai-nadi siyona gilakalaka-vagata.
Au tomiyalobama adi tonagona tuweniti-fowa kadu gaitoma wayawaidi fifiwaladiyao adivefowa Yaubada againe hiꞋiboꞋula-moꞋa be hihawadavadavana, BanaꞋe yana didigaꞋuꞋuya givetogana amanadi. Kadu badi hikovakova higayo,

Aleluya! Yama nuwanuwa ehe hidedemi.
Tu agoꞋago saꞋeyana Yaubada yana didigaꞋuꞋuya giyemu gigayo,

Omi Yaubada yana tofaisewa
kadu omi BanaꞋe wamatausena
lakahimiyao kadu kabiꞋomiyao
yada Yaubada wanadavadavana.
Hidedemi gigahe-yo butuna lakahina vaita yoꞋoyoꞋo lakahi-moꞋedi agodi amine ma ganogalina. Butudi vaita gufa lakahina gihobuhobu kadu atala gihegehegena toyogina ma amine. Badi hikovakova higayo,

Aleluya! Yada Yaubada Kaiwabu
givebutu givehivehimeya, BanaꞋe Tofaiwala-moꞋa.
Kanavemwamwala kanagakahikahi,
au BanaꞋe kanakivekaiwabuna.
FaꞋina yana Sifi kabiꞋona
yana nagi ana tova a gilakayemu,
ada yana kwamayoku ma higa
Yesu ana tovetumagana moyaꞋaidi
nagi faꞋina ahe gikidewadewa.
E, Yaubada kaleko kwayakwayana givelena,
yegayegana kadu veꞋakinamanamalina.
Au hidedemi yoꞋoyoꞋo hikovakova.

[Mena kaleko kwayakwayana ana nuwanuwa ma Yaubada yana kaliva mahamahalidiyao yadi dewa yegayegana.]

Tu bana tovenuwaꞋata gigaheku gigayo, “Hidedemi uꞋetoladini. Gaveyao Yaubada yana Sifi kabiꞋona yana nagi ana avemwamwala againe giyowanidi, medema yadi vemwamwala gavatubuga!” Au hidedemi gigahe. Kadu gigayo, “Mena gahe-nadi au Yaubada yana gahe velemoꞋena.”

10 Hidede amine gigahe-yo tovenuwaꞋata agene gaꞋiboꞋula-moꞋa higa gadahawadavadavana. Atu gihawataku gigayo, “Auwe, keke unahawadavadavaku. IyaꞋeku Yesu yana tofaisewa anafaiweya kadu oꞋeni kadu tobohiyamomo, omi nuwanuwa velemoꞋena Yesu giꞋawatalatalainena be againe waluluveꞋavina-ma kalivai-mina. Keke iya unahawadavadavaku, au Bana Yaubada. Unogali! Yaubada yana nuwanuwa velemoꞋena Yesu giꞋawatalatalainena-ma meda Yaubada bonana ana toꞋawatalatalaina tuwaina Yesu nunune hinauna kadu adamoya nunune hinanauna.” a, b 

Kaliva ana egana Bona hosi kwayakwayana againe

giyage-ma kahihina.

11 Tu tovenuwaꞋata gilukahihi gihavaina, lobama ana wanafali yauyaugina gaꞋitana, ada mene matakuya hosi kwayakwayana gimidi tu Bana Kaliva kwaune gihiyoto-ma ana egana Todibumuhiga kadu Togahe velemona. Yana abavehimeya tunutunugina againe gilulugaviya kadu kaliva agaidiya gilulaufata. 12 Matana giveꞋakinamanamalena vaita aiꞋalaꞋalata amine kadu uꞋune badau kikaiwabuna moyaꞋaina hidadauda. Kadu Bana wowone egana kilukilumina gidadauda, eganai-nadi keke tamo hakwadi gidahalamaneni tu Bana anakaibe gihalamanena. 13 Kaleko againe givaigau-ma dayaga lakahina gifotana, ada Bana ana egana Bona higa Yaubada bonana amanadi. 14 Bana Bona wai ginagona tu badi lobama ana tolugaviya adi yoꞋo adi yoꞋo wai himulina. Hosi kwayakwayadiyao agaidiya hiyage ada kaleko kwayakwayana yegayegana kadu veꞋakinamanamalina againe hivaigau. 15 Bana Bona awane feto sinasinahina giyemu be medema againe yoꞋo tulina tulina ginalaulaudi-yo agevavane ginasedi. E, yana fuluma kainumula againe ginavehivehimeyedi. Kaliva kelefi abavagafuwafuwa againe hivagafuwafuwana amine, meda Yaubada yana ilaꞋa ana abanauhaga againe Bana Bona Tauna tokoyona ginavagafuwafuwadi be Yaubada yana ilaꞋa lakahi-moꞋena hinanuhagana. 16 Ada ana aikeva kadu ubuna againe egana kilukilumina gidadauda. Egana hidede amine.

TOKIKAIWABU ADI TOKAIWABU
TOVEHIMEYA ADI TOVEHIMEYA c 

Yaubada nibaineyao adi agolaufofola hinuhagana.

17 KaduꞋe gaꞋenoꞋita tu lobama ana tovenuwaꞋata kauwana againe gimidimidi-ma gaꞋitana. Bana manuga moyaꞋaidi lobama hinafane hiyaveyavega-ma agaidiya gikovaꞋawafatafata gigayo, “MoyaꞋaimi waꞋela be Yaubada yana abutu faꞋina wanavagaꞋauta. 18 Abutu-nadi againe kaliva moyaꞋaidi gaviya againe hinaꞋalika-ma vidodi wanaꞋauꞋana, tokikaiwabu tolugaviya adi togiyomatana kikaiwabudiyao buyeꞋi, kadu hosi adi kaliva buyeꞋi, e kaliva moyaꞋaidi lakahidiyao kadu kabiꞋodiyao, agetoga adi tovehimeya buyeꞋi vidodi wanaꞋauꞋana.” Au hidedemi tovenuwaꞋata gikova.

19 Tu bana kevakeva manimaninina kadu babi ana tokikaiwabu moyaꞋaidi adi tolugaviya adi yoꞋoyoꞋo buyeꞋi gaviya faꞋina hivagaꞋauta-ma gaꞋitadi. HivagaꞋauta higa Bana hosi kwayakwayana kwaune gihiyoto-ma kadu yana tolugaviya hidalugaviyadi. 20 Atu Bana Bona yana yoꞋo buyeꞋi nibaidiyao hifaiwalahegehege-moꞋedi, ada bana kevakeva manimaninina kadu falofita veꞋalololona hikiveꞋavidi. Mena falofita boi kevakeva manimaninina loseyanina amine iyaꞋiyaya yauyaulowogidi gififaisewadi be medema againe kaliva kevakeva manimaninina ana iyaꞋiyaya hivaina, kadu ana ikilukiluma hihawadavadavana-ma ginuwaꞋabiyedi. Au adiꞋiselu hikiveꞋavidi-yo wayawaidi muna gaitoma yagoyagona alamatafifailina giyabeyabela-ma againe hihegehobuyedi. 21 Tu adi tolugaviya moyaꞋaidi Kaliva yana feto awane giyemu-ma againe yadi alika hinuhagana. Kalivai-nadi hosi kwayakwayana kwaune gihiyoto. Tu au hiꞋalika-Ꞌowoga ada manuga moyaꞋaidi hiꞋela vidodi hiꞋauꞋa hiꞋauꞋa tu hiꞋa-wayoga. d 

Copyright information for `VIV