Mark 7

God ana raugagayo mai Jew ahi vaivai i ghetawanei

(Mat 15:1-9)

(Pharisee ma mai Jew anatapuhi, muriyai da hita am, au naona, nimahi hina oghai. Me warihagha waghawaghahi ahi vaivai hi teretereiya nana'arena. Maranaina boruwei he nene memei, egha hina am da au naona gobuhi hina ogha tawane'i. Ahi ghoha maghamaghauhi ghehauhi maiteni hevo taghotaghohi, me ani am da ani uma, me he ogha'oghanei).

Pharisee ma raugagayo tauvi haraharamanahi ghehauhi Jerusalemei hi nei Yesu awarina da hita rau-tanighanei ma hi inanai da ana tauvotaghotagho ana nima gobuhi hi am'am.

Ma tauhi Yesu hi rau-bayadei hipa, “Aiwa'i aubaina, am tauvotaghotagho waghawaghata ahi vaivai egha hita votaghotaghoi ma ana ura mirahi he am'am?”

Ma Yesu i pari-beyana, “Taumi morumorumi, God ana peroveta Isaiah i riwa kauwa, tauna i girugirumia nana'arena, God i riwa,

‘Taumi gamomiyei o vovohepahepa'u,
wate nuwanuwami au horana tapuna ava.
Tauhi rava ahi vaivai hevivi damani ma egha yamna God ana raugagayo.
Yamna aubaina ahi vohepahepa yamna kwakwavina.’
7:7Isa 29:13
Taumi God ana raugagayo o teretere riyei ma taumi ami vaivai o vovo taghotaghoi.”
Ma i riwana meyehi ipa, “Taumi ami haramanei God ana raugagayo o teretere riyei ma taumi ami vaivai o vovo taghotaghoi. 10 Moses God ana raugagayo i teretereiya yamna, ‘Amam ma ayom mavi virehi,’
7:10Exo 20:16
ma ‘Aiya'i amana ma ayona e enaena bo'ahi, tauna onavi hiragheni.’
7:10Exo 21:17
11 Wate taumi o viharaharamanihi da ayo ma ama he rau-rau boviyehi ma, God awarina; he am'am verena. 12 Ami viharaharamanei, tauhi ama ma ayo egha hita vohaguhi. 13 Ma we'i, viharaharamana taumi, rava auwarihi o vividamani ma God riwana o vivihamoa'i. Ma kauwa maghamaghauhi ghehauhi maitehi o kaukauwei.”

Aiwa'i ghohana rava horahi evivi mirahi.

(Mat 15:10-20)

14 Yesu patara i ghore meyehi ma ipa, “Ana tapumi ona rau-tanighaneu ma aiwa'i a ririwemi ona haramanei. 15 Aiwa'i da au gamomi e ruirui tauna egha itavivi miraimi ma aiwa'i da horamiyei e hopuhopu, tauna evivi miraimi, God au matana.”
7:15-16Mark giruma ghehauhi uranei i girugirumiya we nana'arena,“Mepa da tanighami e ma'ama'e, yamna ona rau-tanighana.”


17 Yesu patara ivo terehi ma i naeme au numa ma ana tauvotaghotagho hivi taravirevirei da awanaina anona itavi heghehi. 18 Yesu ipa, “Taumi maiteni egha ota haramanei bo? Kauwa aiwa'i upune'i rava au horahi e ruirui apo egha inavi mirai, anona yamna we'i kauwana egha tauna au nuwanuwana ita ruirui ma au manawana da e hopuhopu.” (We'i riwanei Yesu yam anatapuhi ivi aninei da tauhi egha wa'iyawa).

20 I amdabi ipa, “Aiwa'i rava horanei e hopuhopu yamna rava evivi mirai, God au matana. 21 Rava ghoha'apoapoe, nuwanuwahiyei hevivi tetei ma ghohana he ghohaghohai nota apoapoehi me, rauhoghara yabayababa, danene, vihiraghena, awadanene, 22 amboho, rau ivi apoapoe, moru, erawa, unura, terevaidegha, maeghaeghae ma bu'uwa kauwahi. 23 We'i ghohahi apoapoehi rava horahiyei he hopuhopu ma rava hevivi mirahi.”

Wavine ana vitumaghana

(Mat 15:21-28)

24 Ma na'i meyagaina i voterei ma i nae Tyre au paratana ma au numa i rui, aubaina egha ita ghohei da rava hita haramanei, wate tauna egha tagotagogina da ita rau-govagha. 25 Wavine tagogi Yesu tuyeghana i nonori ma i nei awarina, we'i wavinena tauna egha Jew, tauna eteni au Fonisia i tupuwa, Siria au paratana. We wavinena natuna wavinena haburuna aruwa-apoapoena, i ruini. Yamna aubaina ayona i nae Yesu awarina, au naona i raudune ma ivi baghai da aruwa-apoapoena natuna awarina ita vaina tawane'i. 27 Yesu i haramanei da wavinena eteni, yamna aubaina i riwei, “Egha ita ahi da rowarowa ahi yam ana vaini ma ou'ou ana verei, e'egha da, au naona rowarowa hina am hi yauwa.”
7:27Riwa rowarowa awanaina anona yamna mai Jew. Tauhi he notanotai da tauhi hi ahi guratana, egha me rava ghehauhi, yamna aubaina tauhi eteni ravahi he ghoreghorehi ‘ou'ou.’


28 Ma wavine i pari-beyei, “Bada, yamna riwa kauwa wate rowarowa ahi yam hamohamoghina kepakepa au gabaurina e dabadabarara yana ou'ou he aniani.”

29 Ma Yesu i riwei, “Ma naeme am au numa. Tam am paribeyana i ahi aubaina aruwa-apoapoena natum au horana tauna i hopuna tawane'i.”

30 Ma i nae me ana au numa ma i tuhaghai da teverana ana au ani eno i enoeno ma aruwa-apoapoena i hopu tawane'i.

Yesu oroto tanigha potapotana ma mena birebirena ivi yawahani

31 Yesu Tyre paratana i ne tawane'i da au Sidon ma i kwaviviro da au Dekapolis Galili topana au ririvana. 32 Rava ghehauhi oroto tanighana potapotana ma menana birebirena hi neiai ma Yesu hivi baghai da urana au opina ita terei da itavi yawahani. 33 Yamna aubaina Yesu oroto i taravaina hopunei da tauhi ava ma ura gigina oroto au tanighana i tere ru'iyei ma ura gigina i hovai ma menana ivo dadani. 34 Ma au mara i inana ma nuwanuwana i boyai ma i yavutu tawanana ma oroto i riwei, “Efata,” we'i anona “Mawana tawane'i.” 35 Maratagogi tanighana i wanatawanei ma menana ivi dagudagu ma i dede kauwa. 36 Ma Yesu rava ivi ghaehi, i riwana guratehi da egha rava ghehauhi hina riwei da aiwa'i i tupuwa. Rava i riwana guratehi wate tauhi egha hita rau-tanighana ma hivi tuyetuyeghei. 37 Ma maranai rava we'i riwana hi nonori, tauhi hi bahana guratei ma i riwa, “Aiwa'i anatapuhi i kauwana anatapuna ahi'ahina ava. Tauna rava tanigha potapotana ivi yawahani da e rau-tanighana ma menana birebirena e dedede kauwa.”

Copyright information for `WEDTOPURA