Isaiah 12

וְאָֽמַרְתָּ בַּיֹּום הַהוּא אֹודְךָ יְהוָה כִּי אָנַפְתָּ בִּי יָשֹׁב אַפְּךָ וּֽתְנַחֲמֵֽנִי׃
הִנֵּה אֵל יְשׁוּעָתִי אֶבְטַח וְלֹא אֶפְחָד כִּֽי־עָזִּי וְזִמְרָת יָהּ יְהוָה וַֽיְהִי־לִי לִֽישׁוּעָֽה׃
וּשְׁאַבְתֶּם־מַיִם בְּשָׂשֹׂון מִמַּעַיְנֵי הַיְשׁוּעָֽה׃
וַאֲמַרְתֶּם בַּיֹּום הַהוּא הֹודוּ לַֽיהוָה קִרְאוּ בִשְׁמֹו הֹודִיעוּ בָֽעַמִּים עֲלִֽילֹתָיו הַזְכִּירוּ כִּי נִשְׂגָּב שְׁמֹֽו׃
זַמְּרוּ יְהוָה כִּי גֵאוּת עָשָׂה [מְיֻדַּעַת כ] (מוּדַעַת ק) זֹאת בְּכָל־הָאָֽרֶץ׃
צַהֲלִי וָרֹנִּי יֹושֶׁבֶת צִיֹּון כִּֽי־גָדֹול בְּקִרְבֵּךְ קְדֹושׁ יִשְׂרָאֵֽל׃ פ

Copyright information for WLC