Psalms 111

הַלְלוּ יָהּ ׀ אֹודֶה יְהוָה בְּכָל־לֵבָב בְּסֹוד יְשָׁרִים וְעֵדָֽה׃
גְּדֹלִים מַעֲשֵׂי יְהוָה דְּרוּשִׁים לְכָל־חֶפְצֵיהֶֽם׃
הֹוד־וְהָדָר פָּֽעֳלֹו וְצִדְקָתֹו עֹמֶדֶת לָעַֽד׃
זֵכֶר עָשָׂה לְנִפְלְאֹתָיו חַנּוּן וְרַחוּם יְהוָֽה׃
טֶרֶף נָתַן לִֽירֵאָיו יִזְכֹּר לְעֹולָם בְּרִיתֹֽו׃
כֹּחַ מַעֲשָׂיו הִגִּיד לְעַמֹּו לָתֵת לָהֶם נַחֲלַת גֹּויִֽם׃
מַעֲשֵׂי יָדָיו אֱמֶת וּמִשְׁפָּט נֶאֱמָנִים כָּל־פִּקּוּדָֽיו׃
סְמוּכִים לָעַד לְעֹולָם עֲשׂוּיִם בֶּאֱמֶת וְיָשָֽׁר׃
פְּדוּת ׀ שָׁלַח לְעַמֹּו צִוָּֽה־לְעֹולָם בְּרִיתֹו קָדֹושׁ וְנֹורָא שְׁמֹֽו׃
10 רֵאשִׁית חָכְמָה ׀ יִרְאַת יְהוָה שֵׂכֶל טֹוב לְכָל־עֹשֵׂיהֶם תְּהִלָּתֹו עֹמֶדֶת לָעַֽד׃
Copyright information for WLC