Psalms 125

שִׁיר הַֽמַּעֲלֹות הַבֹּטְחִים בַּיהוָה כְּֽהַר־צִיֹּון לֹא־יִמֹּוט לְעֹולָם יֵשֵֽׁב׃
יְֽרוּשָׁלִַם הָרִים סָבִיב לָהּ וַיהוָה סָבִיב לְעַמֹּו מֵעַתָּה וְעַד־עֹולָֽם׃
כִּי לֹא יָנוּחַ שֵׁבֶט הָרֶשַׁע עַל גֹּורַל הַֽצַּדִּיקִים לְמַעַן לֹא־יִשְׁלְחוּ הַצַּדִּיקִים בְּעַוְלָתָה יְדֵיהֶֽם׃
הֵיטִיבָה יְהוָה לַטֹּובִים וְלִֽישָׁרִים בְּלִבֹּותָֽם׃
וְהַמַּטִּים עַֽקַלְקַלֹּותָם יֹולִיכֵם יְהוָה אֶת־פֹּעֲלֵי הָאָוֶן שָׁלֹום עַל־יִשְׂרָאֵֽל׃
Copyright information for WLC