Galatians 1

Na Pol. Nata kainata siknga Jesu kawawa ita na take nanitewan kuke nata itane kwiiknga dakngake wamna yanikapmanggat. Na kep dakane nana aminda dua nanitewa kukum. Aho. Nanin Anutu Jesu akumbut katangga tangenakut tapaat gatu Jesu waapaatda na tapat itane kwiiknga dakngake yuat. Unzingge na aposel ngang nanikaing. Siwan nata gatu notna Jesue amina naat gatake yuamangga pas asanu ginu Galesia yot gapmane nana Anutue aminabam dakngake yuaingge matandamukamang.

Ninda tumuk wamu ginde natake inina Nanin Anutuat gatu Buyambam tapaninu Jesu Kraiskatda ginde musip kwikwik natandamusan. Jesu waapata Nanin Anutue banip tawake nin gatanimukut. Gatanimuke ninu nisane waiaknganinde toknga pananga akngane ninu sandekut. Ninu aminu wai aminu tapduu ayuamang komune nana aminde gepbiatang dua yutnimde natake ita epuke kungwanimukut. Unzingge ninda Anutu waapatane umana asinggan asinggan yatangenatnim. Siakan.

Polda kaanga yanikut.

Ngan. Kraisda ginde tangge kungwandaman kake Anututa musip kwikwik natandamuke gin yandawamban ginda ie kuking. Ngana ginda zetgaman tapa tekwamban masa imuke tasikaing. Tasike wamu inata takngatu ginda wamu a takeaknga ngang yakaing kakngae gepbiatang koke yuaing. Mate! Ginda zetzet tasikingge natake nata asiknga asatnakum. Dasing singgak? Asikaya Anututa wamu take inata inata ninde nimukut ba dasing? Wena. Ngana aminu kunduta enake gindane natdetdetza pasiwa maiwa ginu nangaakan natayuaing. Wa aminda wamu takeaknga Kraisda ninde tasinimukut taknga tapa tekwamban gutonga wam daninangge tasikaing. Siwan ninda wamu takeaknga tupa ginde danikumang kaknga teke wamu inata takngatu daninanu Anututa ninde musia toknga asinggan natayuwanu noman siwik. Gatu angela enandang nana tapatuta epuke wamu inata takngatu daniwanu Anututa waapae musia toknga asinggan natangamanu noman siwik. Sike wamu tupa ninda danikumangu nata gatu daniwa natapnong. Aminu tapatuta enake wamu tupa ninda danina natapbing kaknga teke ita wamu inata kundu daniwanu Anututa aminu waapae musia toknga asinggan natayuwik.

10 Siwan ginu dasing nataaing? Asikaya nata natake aminda nae apbaknganingge natake wamu waaknga yanggat ba dasing? Ba Anututa nae apbakngawikge natake yanggat ba dasing? Aminda nae take natapningge nataat gamu nata Kraisdane puya amina dua dakngawam.

Polda Jesue kwiiknga dakngakut.

11 Siakan mate notnabam. Nata ginde daniwa natapnong. Wamu takeaknga nata gin danikumu wa aminda dua tangenakut. 12 Aminu tapatuta dua wamu waaknga nanindamuban natdekum. Aho. Jesu Kraisda ina yeikngaman natdekum.

13 Sike ginu atnataaing. Tupa na sanga ninu Judia nana amindane aknganinu gitna siknga take yukum. Yuke aminu Jesue aminabam dakngake yukingge semna siknga natayamuke nata wai pasiyamuke kumzang siknga pasiwa maiking. 14 Ngan. Nata sanga baminda tasikaking kaknga tawanangge take siknga natake tasikum. Tasike Judia nana aminu dongu nakanu gwendunekanu naat aakumang aminu kundu bamindane kepi tawake tasikingu wa nata kuupbam ayapbikum. 15 Siwan ngana tapduu na dua aakum gwene Anututa nae natake na itane puya amina dakngawitde yakut. Yake ita nae musip kwikwik natangamuke yanawamban ie kukum. 16 Sike Anutu na yanawakuu waapata take natake inane waaknga nata kainata kawitde yeikngamunangge natapbut. Natake nata aminu keu komduine nana Anutue dua natapbing aminde kuke sanga Jesuta tasinimukut takngae yanikapitde natake yeikngaman kake itane waaknga siknga na anggaman kakum. Kake nata aminu tapatue dua kuke inikwaikum. 17 Dua inikwaike nata aminu tupanu Jesue kwiiknga dakngakingu Jerusalem yot gapmane yukingge dua kukum. Aho. Nata Damaskas yot gapmaneta Arebia kep komune ninatakan kukum. Kuke yusika nata Damaskas yot gapmae gatuna kukum.

18 Kuke yusika nakanu gweaat gwenduat kawa sandewana nata Jerusalem yot gapmane koke Sifas kanangge kopbum. Koke nata gunziu 15 ngang iat gatake yukumak. 19 Yuke ngana aminu tupanu Jesue kwiiknga dakngakingu tapatu nata dua kakum. Sike Jems Buyambam tapanindane uyapnakan kakum. 20 Siwan wamu wa nata matandamunggat takngae natake Anututa natapan kem dua singgak ngang natapnong. 21 Sike aminu waapaat kakenga nata keu maa kuke keu komaya Siria gatu Silisia ngang yanikaing komaaune kukum. 22 Kuke yuwawa aminu Judia kep komune nana Kraisdane amina dakngake yukingga natane noma dua nandupbing. 23 Dua nanduke wa aminda wamu takngatu anzing natapbing, “Aminu tupa nin pasiwan maikumangu waapata musia tapan tekwamban sanga ninda Jesue natapna kekekanggak kaknga ita yaitapaakusikuu waakngae apbakngake yanikapmanggak,” ngang natapbing. 24 Natake wa aminda nae natake Anutue umana yatangenaking.

Copyright information for `WNC