Matthew 1

Jesuta bamnatane umana

(Luk 3:23-28)

Sike aminu aakwau Jesu Kraisdane bamnatane umana. Jesu Devit tupa siknga kumbut tapatane donga, siwan Devitda Ebraham tupa siknga kumbut tapatane zakngi.

  • Ebrahamu Aisakgane nana.
    • Sike Aisakga Jekopdane nana.
    • Siwan Jekopda Judaat gatu itane uyapna bapatdane nana.
Sike Sudatane waaknga Pereskat Saraat. Sike waapaatdane minga Tema. Siwan Peresda Hesrondane nana. Sike Hesronda Ramdane nana. Siwan Ramda Aminadapdane nana. Siwan Aminadapda Nasondane nana. Siwan Nasonda Salmondane nana. Sike Salmonda Boasdane nana. Sike minga umana Repah. Siwan Boasda Obetdane nana, sike minga Rut. Siwan Obetda Jesitane nana. Siwan Jesita Devitane nana. Siwan Devitda Solomondane nana. Sike itane minga tupa Yuriatane maatna dakngakut. Siwan Solomonda Riaboamdane nana. Siwan Riaboamda Abaisatane nana. Siwan Abaisata Esatane nana. Siwan Esata Jihosafatdane nana. Siwan Jihosafatda Joramdane nana. Siwan Joramda Usaiatane nana. Siwan Usaiata Jotamdane nana. Siwan Jotamda Ehasdane nana. Siwan Ehasda Hesekaiatane nana. 10 Siwan Hesekaiata Manasatane nana. Siwan Manasata Emosdane nana. Siwan Emosda Josaiatane nana. 11 Siwan Josaiata Jekonaiaat uyapna bamdane nana. Sike tapduu waomune iwanata apu Isrel nana zipmake kaipake keu Bebilon komune kaipakuking.

12 Sike wa kaipakukingga aminu Bebilonu kaipakuwana

    • Jekonaiatane engangu tapatu aawan umana Siatiel ngang iniking.
    • Siwan Siatielda Serababeldane nana.
13 Siwan Serababelda Abaiatdane nana. Siwan Abaiatda Elaiakimdane nana. Siwan Elaiakimda Esotane nana. 14 Siwan Esota Sedokgane nana. Siwan Sedokga Ekimdane nana. Siwan Ekimda Elaiatdane nana. 15 Siwan Elaiatda Eliesatane nana. Siwan Eliesata Matandane nana. Siwan Matanda Jekopdane nana. Siwan Jekopda Josepdane nana. 16 Siwan Josepda Mariatane apna. Siwan Mariata Jesu tangaiwan umana Krais ngang inikaing.

17 Unzingge Ebrahamdane dongata waakzak sike sitakunggawan apu apu banakan katangu aminu buyambam siknga dakngawana masan siknga Devitda aakut. Siwan Devitdane dongata waakzak sike sitakunggawan apu apu banakan katangu ina unzakan aminu buyambam siknga dakngawana masan siknga Bebilon kep komune nana aminda apu kaipakuking. Kaipakuwa yuke wa aminda waakzak sitakunggawan apu apu banakan katangu ina unzakan aminu buyambam siknga dakngawana masan siknga aminu tapatu Anututa tapan akgatanimunangaapa dakngake aakut. Anututa waapa takutde natake umana Krais ngang inikamang.

Mariata Jesu tangaikut.

(Luk 2:1-7)

18 Siwan Josepda Maria maatnae tapikge gwa yawan ngana dua takut. Tapduknga atapikge gwenu dapaknga siwan Anututane Waung Kapata tasiwan Mariata musiaapa siwan kaking. 19 Kawa ngana Josepda aminu nomanaapa yuke wepda inikwasiwa kuwik ngang natapbut. Mariata maaknga dua natapikge ngang natake 20 dapun peke mia takngatu kakut. Kawawan Anututane angelata apu anzing inikut. Josep. Devitdane dongune aakuyak kapa. Maatdae tapiyakge nangaakan ma natapim. Take tapso ngang inikut. Inike Anututane Waung Kapata tasiwan musiaapa sikut. 21 Siwan apmea engangu wawiapatu tangaiwik ngang inikut. Tangaiwana umana Jesu ngang iniyo. Dasingge? Ita aminabamu waiakngae gepbiatang dua yutningge gatayamik ngang inikut.

22 Siwan tupa siknga Anututa wamu takngatu ayanikapsa aminu tapatu iniwan natake ita anzing yanikapbut, 23 “Maya mateu tapatu wawi tapatue dua kukut tapata musiaapa siwik. Sike engangu wawi wa tangaiwik kapatane umana Emanyuel. Tana tekwamban, ‘Anutu nikat gatake yuamang,’ ngang inining.” Ngang wa yakapbut taknga buya unin siwikge natake angelata Josep unzing inikut.

24 Iniwan natake Josepda enake angelata wamu wa inikut taknga tasikut. 25 Maria takut ngana iat gatake dua peke yuwawat waaknga tangaiwan Josepda umana Jesu ngang inikut.

Copyright information for `WNC