Philippians 2

Notninde musip gwaang natayamunim.

Siwan ginda Kraisdat gatake yuwawa asikaya ita gindane musipza dua papan kekekakaing ba dasing? Asikaya ita ginde butaya natandamunggak kakngata gindane musipza dua pangenakgak ba dasing? Asikaya Waung Kapata nindane musipmikatang dua pasiwan musipminu takngatukanu dua nataamang ba dasing? Asikaya ginda notzae musipzaatangu butaya dua natayamukaing ba dasing? Sike unzing kakengu ginda musipza takngatukan natapnong. Natake ginda musip gwaangu notzae natayamuke tasinong. Ginda unzing tasiwanu nata ginde asiknga bakngawit. Siwan ginu gisaekan ma natanggamatawam. Aminda gisane umanza yapangenatningge ma natanggamatake sukuwam. Wena. Ginda gisane umanza akngae natake ginda nindane umanin yapangenatnong ngangu ma yawam. Aho. Ginda notzatane umana yapangenatnangge tasinong. Ginu gisane sangaekan dua natanggamatawam. Aho. Ginda aminu kundue kuut natanggamatake wa amindane umana dua pimapikge tasinong.

Jesutane umana yatangenakut.

Sike ginu natdetdeu Jesu Kraisda natake tasikut takngakan gindane musipzaatang natapnong:

Ita Anutu siknga yuke itane umana buyambam ngana
sanga waakngae dua natanggamatake
ita kepdakane epan maya tapatuta i tangaiwan nisa gup dakngake aakut.
Aake ita Anutue gepbiatang koke itane puya amina dakngakut.
Ita nisa gup dakngake inane umana yatangenatnangge dua natake Anutue gen gwaamukut.
Gwaamuke tasisika kumbut.
Ngan. Amin saamdakane aminu wai amin zipa kungwakaing binga tanguwa kumbut.
Unzingge Anututa itane umana yatangenake tasiwan
umana buyambam siknga sike kundutane umana kuupbam ayapbike yuak.
10 Ngan. Aminu kuupbam enandang nana gatu kepdakane nana gatu akupsa aminu gatuna enatningu kuutda
Jesutane umana yatangenake ie muna puke anzing yaning.
11 Nindane Buyambam tapaninu Jesu Krais unin ngang yawawa
umana Nanin Anututane akngata buyambam siknga siwik.

Anututa musipmikatang pasinggak.

12 Siwan mate notnabam. Nata ginde musip gwaang siknga natandamuke daninggat. Tupa ginda natane wamna asinggan tawakaking. Ina unzakan apman kaya ginda tasinong. Nata wamu wa yanggau tapduknga na gikat yutnim gwenekan tasiningge dua yanggat. Aho. Apmanu nata maa yuwawa ginda gisae tagwauke tasinong. Ngan. Anututa gin gatandamuke waiakngane ginu sandekut taknga buya aawan ginda pimanang ngang natake sanga Anututane akngane asinggan sukunong. 13 Dasingge? Anututa gindane musipzaatang pasiwan ginu itane banip tawanangge natapningge pasinggak. Sike ginu sanga ita ina nataak kaknga tawake tasiningge natake gindane musipza pangenakgak.

14 Sanga kuupbam ginda tasiningu wa ginda kwatan wam dua yake dua yanganuyuk puyasa pasiwam. 15 Ginda unzing tasikengu ginu nomana yuwa waiakngasa wena siwik. Siwan ginda aminu kepi nomana akngane dua sukuke sanga waiaknga asinggan pasikaing aminde banakan yuke ginda nomana yuke Anututane waaknga aminu waiakngasa wena amin dakngake yutnong. Dakngake yuke ginda wamu ginde sanga kayuk yutnanga aknga atdamunggak kaknga gitna take yanikapnong. Unzing aakatap gatapan kakaa aknganata isikakaanggak binga ginda wamu waaknga yanikapa natapnong. Unzingge tapduknga Kraisda gatuna apik gwene nata anzing natapit. Na puya moo siknga dua tasike wamu takeaknga nata yumdekan tapa kekekakut. Aho. Puya atasikum taknga buya asaakut ngang natake apbakngawit. 17 Sike nata gin pasiwa ginu Jesue natapa kekekanggau wa Anututa ie natapan sanga take singgak. Siwan nata Anututane puyana tasike gin gatandamuwawa ngana iwanata enake na apba nuwa kupit. Nata ie undanga ngang nataat. Puya pasiwa buya aawan ginda Anututane amina dakngake yuaing ngang natake apbaknganggat. Unzingge aminda na nuwa kupitde meya dua nataat. 18 Siwan ina unzakan gikaya nata apbaknganggat takngae natake ginda apbaknganong.

Polda notna Timotie natake yakut.

19 Siwan nata nina banipda siwan anzing nataat. Buyambam tapaninu Jesuta na nandutewanu tapduknga mateknga siknga yuke nata Timoti initewa ginde kuwik. Kuke ita gatuna apuke ginde wamu na naniwik kakngata natane musipma tapan kekekawit. 20 Na aminu waapa binga tapatu wena. Ita naat musipmiu takngatukan natake yuamak. Ge ita musia takngatukan dua natake gin gatandamunangge take siknga nataak. 21 Sike aminu kuupbamda inane sangae natanggamatake Jesu Kraisdane sangae dua natanggamatake tasikaing. 22 Siwan ngana ginu Timotie atnataaing. Aminu nomanaapa unin. Ita naat gatake yuke wamu takeaknga yanikapmakamak. Unzing waakngata nana gatayamukaing binga tasinggak. 23 Sike nata kaautde yuwawa nae wam usanzike yawa natakenga nata initewa ginde kuwik. 24 Sike na Buyambam tapaninu Jesuta kepi apme tasingaman nakaya ginde apitde apbakngake natayuat.

Polda Epafrodaitasde natake yakut.

25 Sike nata Epafrodaitas initewa ginde kuwikge nataat. Waapa Jesuat nana tapatu dakngake natane notna dakngake yuak. Ita Jesue puya amin notna dakngake naat gatake puya pasikamaunin. Tupa ginda initewa nae apuke sanga nata dapbumunin gatangamuke ginde tangge tasikut. 26 Sike ita ginu gatuna dandupnangge musiaatangu toknga siknga nataak. Ngan. Ita mait sike yuwawan aminu tapatuta ie natake gin daniwan natapbingge meya natake ita gin dandupnangge natayuak. 27 Siakan. Tupa ita apmaike paa siknga kumbut ngana Anututa waapae butaya natangamuke maitna sandekngamukut. Sike ita awia waapaekan dua butaya natangamukut. Aho. Anututa nae natake meya buyambam sikngata usikwatapsak ngang natake waapatane maitna sandekngamukut. 28 Unzingge nata initewa ginde kundopan kake ginda apbaknganingge natake initewa kuwikge take siknga nataat. Ginda waapa kake apbakngawawa meya wa nae apbut takngata kundusimu asisapmambik. 29 Unzingge aminu waapata ginde kundopanu ginda ie natake notninu Jesuat nana tapatu ngang natake asiknga bakngake i tanong. Sike ginda aminu wa bingatane umana yapangenatnong. 30 Dasingge? Tapduu dapaknga siknga ita Kraisdane puya aknga pasike paa kumbut. Ginda na gatangamunanga kepi wena siwan ita ginde tangge apuke gatangamuke akupikge dua gwauke tasikut.

Copyright information for `WNC