Psalms 24

Devitda kau aaknga matakut.

Keu andakaat gatu sangabamu ane yuaingu wa kuupbam Buyambam tapatanekan.
Kepna kepna gatu aminu yotna yotna yuaingu wa kuut itanekan.
Ita keu andaka tasikuu yangga amaakatang yuwawan engatangan tasike tekut.
Ngan, keu andaka tasikutdane yapii gwenu yanggabam gwende banakan tasikut.
Mamin amin tapata tawanu Anututa yuak dakane take kopik? Wena.
Sike mamin amin tapata Anututane you takwan buyambam gwenu yuaune take koke yuwik? Wena siknga.
Aminu tapatuta waiaknga dua tasike musiaatangu gutongana wena,
gatu anutu pupukngae munu dua puwik,
siwan kem wamde enandang ngangu notnaapa dua yaninggak.
Aminu waapae Buyambam tapata take tasingamik. Ngan, Anututa aminu waapa meyana sandekgak.
Siwan ita anzing iniwik, “Ga amin noman,” ngang iniwan iwanata wamu yananga dua.
Aminu unzing kapatanu Anutue musiane natanggamatakaing.
Unzing aminda Anutu Jekopda banip sikut tapae wesimu akukaing.
Ginu gwambok gwakgwau ginu zitnong.
Ginu gwambou tupa siknga nana, ginu gatukande zitnong.
Kingu tupan tapa undang kopikge zikngamunong.
Sike Kingu tupan tapa mamin? Tupan tapa Anutu awiapa unin.
Waapa kekekngana buyambam siknga.
Siwan amak tasikengu ita iwana ayapbikgak.
Ginu gwambok gwakgwau ginu zitnong.
Ginu gwambou tupa siknga nana, ginu gatukande zitnong.
Kingu tupan tapa undang kopikge zikngamunong.
10 Sike Kingu tupan tapa mamin?
Tupan tapa Anutu kekeknga siknga apa unin.
Wa awiapa Kingu tupan tapa unin.
Copyright information for `WNC