Psalms 40

Devitda kau aaknga matakut.

Nata Buyambam tapata gatangamikge natayukum.
Siwan ita musip kwikwik natangamuke tumuk wamae natapbut.
Na unzing aminu tapatu gapma mamaya siknga dakaatang pukuke akumnanga yuak binga yukum.
Siwan ngana Buyambam tapata kaiwan akopbum.
Na ngwayuk kanzang gwekatang asiknga tanggaganuwan yukum.
Siwan ngana ita kaiwan akopa keu supna kaya komune napmamban kekeknga gatu kukum.
Siwan gatu ita kau kayuu takngatu taiwitde nanikut.
Kau waaknga Anutu ninda banip sikamang kapae umana yatangenatnanga.
Siwan nata kau waaknga taiwa
aminbamda na nanduke akgwauke Anutue banip sining.
Aminu Anutue banip singgak kapa apbakngayok.
Aminu unzing kapa yamandet aminkat dua gatake sukukaing.
Siwan ita Buyambamtapa dua teke anutu pupukngae munu dua pukgak.
Wena siknga.
Anutu, Buyambam tapana, gata puya nomanu kwaapzang nin gatanimunangge tasikuyak.
Aminu ga binga tapatu wena. Gata asiknga yapbikuyak.
Sike nata gae wamu amin yanike puya gata tasinggayakge gatu natdetdet takngakaatde yaniwiu mateknga dua.
Mate! Sanga wa kwaapzang siknga. Gata sangabamu nin gatanimunangge pekuyau kendetnanga dua.
Siwan gata kaau kuupbam atzipmake katap sawa yasisopuwa
waiaknganin sandewiyakge tasikaking kakngae ga apbitakuyak.
Siwan ngana gata nae banip tangenawi
maak gwaknga kwapan gae wam tawake tasinggat.
Tasike anzing yakum, “Ayok. Anutu, na gae gwa aput.”
Dasingge, tupa nata apitde wamu buk gomune matakut takngae natake yakum.
Anutuna, na gatane mama wamba banipmaatang natapa kekekawan
gae banip tawanangge take siknga nataat.
Buyambam tapa, nata gatane wamu takeaknga aminbamde ayanikapmanggat.
Yanikapmake, Buyambam tapata ninu gatuna apanggak ngang yaninggat.
Sike Buyambam tapana, gata wamu wa yanikapmanggatde atnataayak. Nata wamu waaknga asinggan yakapitde nata gena dua umuke yuwit.
10 Nata sanga gata noman nomana tasinggayak kaknga musipmaatangu dua takusopunggat.
Aho. Gata wamu yawi kekekakut saak tawake na gatu takuyakge ayanikapmanggat.
Siwan gata aminbamde musip gwaang natake gata kepi noman taknga siknga tawake tawanggayakge
nata wamu waaknga aminu mitie unekan yuaingune dua takusopunggat. Wena. Nata ayaninggat.
11 Buyambam tapa, na atnataat. Musip kwikwiu gatane aknga nae natangamunangge ma kotnawim. Wena!
Gata nae butaya asinggan nataayak. Gata nae take natangamuke gata wam noman takngaka tawanggayak. Waaknga tawake gata na kakuya asinggan tasinggayak.
12 Meya kwaapzang siknga nae apan nata natdetnanga dua singgak.
Gutonga aknga nata tasinggat takngata na atnutapan pimake kawa sananga dua singgak.
Gutonga aknga kwaapzang sikngata natane gwapak danggama ayapbikgak.
Siwan natane musipma tuyuknga siwan na kekekananga dua singgak.
13 Buyambam tapa, gata na gatuka tapso.
Gata zet apu gatangamuyo.
14 Aminu kunduta na nuwan kupitde tasikaing. Ge gata aminu wa na nutnangge tasikaingu yaipapaakusike pasiwi datdaptake asiknga maakaning.
Siwan waaminu na tasiwa maiwitde apbakngakaingu yanikwasiwi kuwa umana kopsa yuaingu gata asandepakepso.
15 Sandepakepuke waaminu masa wamu nae yakaingu
gata pasiwi kepi gutonga tasikaingge apmaakake asiknga satnanong.
16 Siwan aminu gae apukaingga musip gwaang natake gae apbakngake yutnong.
Sike aminbamu gata pakuyakge asiknga bakngake yutnong.
Bakngake yuke waaminda anzing yaning,
“Buyambamtapa tupan sikngaapa,” ngang yaning.
17 Siwan ngana na kekekngana wena.
Ge nata nina gatangamunanga dua.
Siwan ngana ga Buyambam tapa, gata nae atnatapso.
Anutuna, gika siknga gatangamuke tanawawi yuwit. Yuwawa na zet gatangamuke mooka ma nandutewim.
Copyright information for `WNC