Psalms 41

Devitda kau aaknga matakut.

Aminu tapatuta umana wena aminde natake gatayamiu, waapa apbakngayok.
Buyambam tapata meya ie asapan ngana ita akgatangamik.
Buyambam tapata kakuya tasike tapan kekeknga sike kayuk takekan yuwik.
Yuke Buyambam tapata tasiwan kepnane takekan yuwik.
Yuwan Buyambam tapata iwana dua kapewan apu waapa tasiwan maiwik.
Sike aminu waapa mait ba siwanu, Buyambam tapata akayuwik.
Ita maitna sandekngaman maitna wena siwan kekeknga gatu yuwik.
Siwan na nina anzing yakum, “Buyambam tapa, nata waiaknga gae tasikum. Siwan ngana gata nae musip kwikwik natangamuyo.
Natake maitna sandekngamuyo,” ngang yakum.
Sike natane iwanata musip maik natangamuke anzing yakaing,
“Asikaya mait sike akupik gamu take siwan umana sopuwan ninda ie apbotanim,” ngang yakaing.
Iwana waakwakga apu nandukengu kem tanzit wam nanikaing.
Waakwakga nae sapdut wam yakaing.
Siwan waaminda kepman epu kukenga sapdut wamu waaknga kepna kepna yanitakukaing.
Sike iwanambamu nae asiknga bitakaingu natane maitnae kusopuknga wam yakaing.
Waaminda nataaingu sanga wai sikngata tasiwan mainanggenggak ngang nataaing.
Waaminda anzing yakaing, “Sanga wai siknga tasiwan wai waapa gwa tapan maiu buyambam sikut.
Waapa gatu dua enawik. Wena. Waapa akupik,” ngang yakaing.
Sike na notna tapatu kaya. Waapaa natane notna siknga.
Siwan waapa nanamu naat nakamak.
Siwan ngana waapaaya kepina tangenake na nainggamunangge tasinggak.
10 Siwan ngana Buyambam tapa, gata nae musip kwikwik natangamuke maitna sandekngamuyo.
Sandekngamina nata yake waaminda ina tasikaing kaknga tasiwit.
11 Sike natane iwanata dua naitakepu napmakaing.
Dua naitakepuke napmamban kake na gata nae take siknga natangamunggayak ngangu atnataat.
12 Na kepi noman gan sukuwa nanduke gata na kakuya tasinggayak.
Siwan na gae wesim yukgawambitde na katakga asinggan yutzimde takuyak.
Buyambam tapatane umana ninda initangenatnim. Sike waapa Isrel nanatane Anutuna.
Siwan dongu masan aatningu waamin kaya ina unzakan tasining.
13 Siakan. Siakan siknga.

Copyright information for `WNC