Psalms 59

Natane Anutuna, gata na iwanae kataune sandeke gatuka tapso.
Gata na kakuya tasiwi waaminda na dua tasiwan maiwit.
Gata na waiaknga tasikaing amindane katakngane sandeyo.
Sandeke tapi nutnangge nataaing aminda dua nuwan kupit.
Buyambam tapa, kayo. Waakwakga na nuwan kupitde kusopukaing.
Nata sanga takngatu waaminde dua siknga tasikum.
Siwan ngana wai aminu kitatoknga waakwau amak tasike nutnangge unekan yuaing.
Buyambam tapa, na gutonga takngatu dua tasiyamukum.
Siwan ngana waaminu zeetgaman kuke na nutnangge tandakngakaing. Nutnangge tandakngawa kake gata enake gatangamuyo.
Buyambam tapa, ga Anutu kekekngaka bamban. Ga Isrel amindane Anutuna.
Gata aminu gae masa gamukaingu zeetgaman apuke meya aminu dongu wa kuupbamde yake yamuyo.
Yamuke waaminde butaya ma natayamim.
Sike zikaane waaminda yotbam gapmane apuke
daman gwen kumbasiyuuk,
kamunda binga ainggamatakaing.
Natapso. Waamindane wamna wai siknga siwan genaneta suyapbikaing.
Unzing bainat taknga gena toknga aknga suyapbikaing binga.
Siwan ngana anzing yakaing, “Maminda ninda yanimu natapning?”
Siwan ngana Buyambam tapa, gata waaminde asiknga ayanimikgayak.
Gata sapdut wamu aminu wa kuupbam kepna kepna yuaingunin yaninggaak.
Gatakan na tapi kekekaawan kakuya gatu tasinggaak kapanin.
Anutu, nata iwanae gwauke gae apuke gatane gepbiatang koke yukgamuke kusopuwit.
10 Sike gata nae take siknga nataayak kapanin. Anututa nae tupan kuwawan nata apmea kuwawa ita gatangamik.
Gatangaman na aminu nanisapdukaingu ayapbimbit.
11 Buyambam tapa, ga nin ninduyuayak kapanin. Gata waamin ma zipi kumnong.
Dasingge? Zipi kupanu natane aminabamda sanga waakngae botaning.
Gikane kekeknga aknganetakan iwaninu
yanikwasiwi unda undang kuwa pasiwi mainong.
12 Asingganu genata wamu wai yake
waiaknga tasinangge yakaingunin.
Undanga, kapewi yamandeu sike gatane umandaenu
asapduke kemu asinggan yakaingge meya panong.
13 Unzingge gata musiptok natake atzipso.
Gata wai aminu waakwau pasiwi wena siknga sinong.
Gata unzing tasiwi Anutu Jekopdane donga
kayuak kapanin ngang aminu kepna kepna yuaingga natapning.
14 Sike zikaanen, waaminda yotbam gapmane asaapuke
kamunda binga aiyuuk kumbasikaing.
15 Sike wa kungapuke tasikaingu nanamde yawakaing.
Yawake musipna dua gitnawanu kumzang siknga ainggamatakaing.
16 Siwan ngana natanu gatane kekeknga akngakae kau taiwit.
Ngan, tembana tapduu kuupbam nata kau kapzang taike nae asinggan natanggamatanggayakge natake taiwit.
Dasingge, tupa meya takngatu takngatu nae apbing.
Siwan ngana gata kakuya katak siknga tasike gata nae damangwen binga dakngawi yuat.
17 Anutu, gakan, ga natane kekekngaapana. Nata kap takngatu taike umanda yatangenawitde nataat. Anutu, gata nae take siknga nataayak.
Sike ga natane damanu kekeknga gwenu unin.
Copyright information for `WNC