Psalms 7

Devida tumuk kaknga Buyambam tapae taingamukut.

Anutu, Buyambam tapana, nata gae apuke iwanata nandupnang ngang natake kusopunggat.
Kusopuwa gata gatangami aminu atnawaningga dua nutapan kupit. Ngan, gata na tapi nata meya dua papit.
Gata na dua tapinu iwanata kaap zongu laion ngang yanikaing binga dakngake amin gup yatdakngakaing binga na tasiwa maiwit.
Ngan, waaminda kaitake keu komdune takuuwan aminu tapatuta na dua nanduke tapik.
Anutu, Buyambam tapana, sike na sanga wai takngatu apba tasikum, ba dasing?
Ie na dua nataat.
Ba nata notna tapatue tanzit ba tasikum. Tasike kem wamu unin ba inikum.
Siwan gatu nata iwana moo siknga ba tasiwa maikut.
Ayok, gata iwana kapewi na nawake tanggaganutnong.
Na take nainggamuke natane gupma yainggamutake tasiwan kepdakane moo peke maiwik.
Anutu, natane iwanata musiptou amau nae tasinangge yakaing.
Siwan gata waaminde musiptou natayamuke na gatangami meya dua kawit. Anutuna, ga nomana akngaekan nataayak.
Unzingge gata enake waamindane amak wamna katak usanziyo. Usanzike kepi noman takngakan tawake na gatangamuyo.
Aminu apu unekan yuaingu gae wesim apuke takumbasinong.
Siwan gata enane siknga yuke waaminu kayuyo.
Buyambam tapa, gata aminu dongu kuupbam usanzikgayak.
Buyambam tapa, ga umanda kopsa siknga apanin.
Gata na usanzike nandupi nata kepi noman takngaat gatu take siknga akngaat nganggan tasinggat taknga kake na usanzike take ngang naniyo.
Anutu, ga nomana sikngaapa.
Gata aminbamda natdetdetnane gatu musiane nataaing kaknga usanzikgayak.
Unzingge gata wai amindane musiptok natake wai tasikaing taknganane apasiwi wena sinong.
Siwan gata noman aminu gatayami waaminu kekeknga yutnong.
10 Siwan natane tuyunggu Anutu unin. Ita nae kuyana tasinggak kapanin.
Ita aminu ie wam natake tawakaingu papan takekan yutnong.
11 Anututa wamu noman gan usanzike wamu noman gan yanggak kapanin.
Siwan gunzit bam asinggan ita waiaknga tasiya aminde musia toknga siknga natake yaipakepunggak.
12 Sike wai aminda musia dua tapan tekwambanu
Anututa bainatna yasiwan tokngaaning.
Siwan gatu kweemna mitake amak tasinangge tandakngawik.
13 Ita sanga amak tasike amin yapan kumningge gwa pandakngakut. Itane sakuu katapna kaya kaikgauni.
Ita sakuu waapa apa wai amin yapan kumningge gwa pandakngakut.
14 Dasingge, wai aminda waiakngakan tasinangge natake natdetdetna gwa natapan yuaing.
Ita sanga wai takngatu takngatu tasinangge tandakngake tasiwawa buyana asaawik. Buyana asaawan waaminda wai siknga meya buyak yutning.
15 Siakan. Aminu gapma buyambamu dakatu kwaiwa aminu
kundu undang pukuwa papikge kwaikuu gapma wandakaatangu ina pimake pukuwik.
16 Ngan, gutonga ina tasinggak kakngata ina usukwatapik.
Siwan amak wamu aminu kundue tasinangge yawik kakngata tapan tekwamban ina tasiwan maiwik.
17 Ngan, natapnong! Anutu waapa nomana sikngaapa. Unzingge nata ie gaak wamu ininggat.
Nata Anutu enane siknga yuak kapae kau taike umana yatangenawit.
Copyright information for `WNC