1 Peter 3

3:1-7 Munon yamangar qibaumir eng wurinou qob

Eng gas ende an yamangar munon nob eng. Aninou munon eng qob qamarari igatar igoarar. Ende abari aninou munon eng an qoregen qib igamari animbag wuri Qenu qob me toat igorunor eng an ende abari animbag wot igubour. Aninou git goan ag eng gari git baab mi goan uber-uber qumani qiyo a tari im ubumimari degen isub qiyo qen big ende me abar. Aninou misir eng git batau gas ende ebet qomon uber eng abari dibent isiner. Isa an yamangar mein igoarar. Ende obounon eng Qenu anqenungariba. Qoan yamangar Qenut oabig ebet igour eng qomon ende ebet igurei. Wuri git baab igour eng umumiagrari qob qamarari igatar qi igour eng wuri git beau gas ende at igurei. Sara wo qomon ende ebet igoai. Umami Abraham qob qamara toat igoar end umamit: “Yonou munon barai,” end wot qamb igoai. An see gor qomon uber ebet ne mi geret me qubig eng an gor Sara tumbigi igoumon.

Yamangar umamimagar, an gor yamangar musub wurinob igoarar. Yamangar wuri git goan sig gagam ue end musub imbig oroar igoarar. Wuri aninob erogori igamari Qenu anseara igomot igoruboumon eng gab wuri im ibag oau mein igo oromar igoarar. Eng an Qenut qebi qamb igoumon eng ar isi isiner qamb.

3:8-22 Qenen qomon uber toat igumune end in quguragsiorunor eng uber

Ye qob eng sindomund aninob qemeribam eng: an mom qibanamsi igo ne misir gari big munon gugum, aninou ima bain wuriqenungar igoumon gas ende at igoarar. Ende at qiqenunget qimusub igoarar. Munon qei der ansumungasiari gab an gor der taui wurisumungasi qiyo a anit mindigar qob meten qamarari igub an gor der wurit mindigar qob qamb ende me abar. Wuri ende ansiarari ibag an bo taui wurimusub ne Qenut qebi qamarari wuriseara misir igubour. Eng Qenu gigit anit ara yarari ne mi uber anit iyeter end an bo tumbigi munon qei wurimusiarar.

10 End Qenu wonou qob ete igo:

Munon wonou qen uber end igomot igorib eng qob boru qamarau end gitab igoriner. Ne qetopur qamarau end gor gitab igoriner.
11 Ne qomon boru eng siningot mogirt wab wogub qomon uber eng ebeib qamb wotrama ebeiner. Ne munon qei wuribanamsiau qomon eng mom tenen igoriner. 12 Eng Munon Aib munon qomon qoregen ende abari eng wuribanamsi igo ne wot qebi qamarari eng igatar igo end. Ne munon ibitiri-ibitiri qomon boru ebet igo eng wo taui sumungasi igo.
13 An qomon uber eng qeretutnob ebet igorunon eng your ger ansumungasieriba? 14 Ne mai qiyo, an qomon qoregen abari munon qarau qei uyes ansumungasiari gab end me yarimar, misir qebebi me igar. Song Munon Aibt igub mismisir igoarar. 15 Munon inubersiau tari eng ininou Munon Barai qamb mom tenen igoarar. Igamari ne munon qei an qomon uber eng gab an qebi qamarari gab eng aninou tug igoumon eng dibes wurinob qamarar. Wurinob dibes qomorub eng oau mein burab mesenau wurinob qamarar. 16 An Munon oau mein inubersiau tari eng mom tenori igo qenen oau mein igamari animbag wuri aninou qomon uber end ar qob isi anit qamb eng wurinou uyes qininingubour. 17 End in qomon uber ubune uyes inquguragsiari gab eng in Qenut mismisirun. Ne qomon soagen ubune in quguragsiorunor eng uber ue.

18 Munon in ubersiau tari eng wonomi dui qen gari qas umb wogub ininou qomon boru birueterei. Wo munon sig qoregen uber eng in munon boru uput qamb umb wogub inqubei bayar Qenut wagerei. Wo munangit warub igama waramari umb wogub Igomurur qau ten bo der bugab igomot igo. 19 Wo Igomurur qau ten isub munon boru Noa qent qob qamara me igetet igamau eng umb isub uyort igour eng qob uber wurinob qamarei. 20 Qoan Noa igoar end munon irou qomon boru ebet igour eng Qenu qand me igaramau, wot igunor qamb se oroar igoai. Isi yarab Noa tabin aib mom barsi ugab ne Noa wonou yurau eng munon 8-ende gari tabin erobon end igurei, ya me wurimuarau. 21 Ya qoan qoan ebeter eng see yat anmaragansia an bo wonou yurau end igorunon eng maribig ebeterei. Yat anmaragansi igour eng aninou git goan unun eng birogoniom qamb ue. Aninou misir eng uber igub Yisas munon inubersiau tari umor eng gab-gab Qenut qabari sarog big qamarar qamb. 22 Wo umb wogub igomot der bugab Qenu ginamt irab ur uberegent bugamorei igo Qenu munon yurau enger eng ne Qenu ginamt mi aib-aib a mi qeretutnob igour eng wo gari wuritanami igo.

Copyright information for `WNU