1 Timothy 3

3:1-7 Sios munon baraitari qomon qoregen qas toat igorunor

Qob eng apand ar: munon ger Sios wurinou munon baraitari igo sarau uber ebeib eng sarau eng uber. Sios munon barai wo qomon boru ger me ebeiner. Wo yamangar gari qas nob igoriner. Ende igama munon yamangar wuri wot me ierimunorei. Wo qoregen igo misir tog-tog gari igoriner. Igo munon gugum wuribanamsi ne qomon wuriimbig igoriner. Ne wo ya uter nub me qangangeteriner. Qand me mirinteriner, ne gor qand me wurinob yogub ebeiner. Wurinob mein igo nomon qur baib qamb qand me oau negeiner. Wo yamangar wau musub oromar igo wau wurimusia qob qamara igetet igorunor. Munon ger wonou yamangar wau oromar musub igoriner eng Sios wurinou baraitari igoriner eng qeemben. Munon ger se qas oau apand burab sios munon baraitari me igoriner. Wo baraitari igo qen big yegaiar qamb qiriner eng Qenu Satan toat ariramor gas ende sieriba. Munon yurau ar munon eng qerei gab wot munon uber ue qamb qomorunor eng wo baraitari me igorinerei. Wo mindigar qob nob igo Satan wonou numuran erobon end isa warama umiba.

3:8-13 Nomon qur qirinau qoat igamau yurau eng

Ne gor, Sios munon baraitari wuri musub igo ne munon yamangar wurit qur ba qirinau big igorunor. Ya uter irou nub me qangangetorunor ne nomon qur qei qi baub qamb misir me igunor. Misir qoregen igama ne qob apand end oabigunor. 10 Ende igo ne se qamart an sios munon yurau wurinou sarau wariges gunon eng sarau qoregen abari ibag eng qei wurimaribigari sios munon baraitari igorunor. 11 Ne wurinou ubeni gor, wurinou qomon ebet eng musub imbigunor. Mindigar qob me qomorunor. Wuri musub igo ne qomon qoregen qas ebet igorunor. 12 Sios nomon qur qirinau qoat igamau munon wuri yamangar gari qas baub nob igo yamangar wau musub oroar igorunor. 13 Munon sios sarau munon igo sarau musub ebet igorunor eng, munon unum wuribererimbour. Ende abari wuri Munon inubersiau tari wonou qob uber dibes qomorunor eng qeretutnob igubour.

3:14-16 Qob qeretutnob qoan qi igoar eng dibentarei

14 Ye namanimun e gumatoum eng ne gab igama ye qen pi yar negeibam. 15 Qand me yarine yegab eng Qenu toat igamau werei eng gugum namanimunt gumaum eng gab toat ende at igama. Qenu wonou munon yurau eng Qenu bebereg igo eng wonou sios. Qoren unotari mon bea gagam igo gas ende wonou qob eng munon wurinou misir end ende nonogursia igour. 16 Qenu wonou qob qeretutnob qi igo eng munangit maigas me bumaimunorei. Qob eng ete:

Wo munangit warub ne dibentara munon diban gamirei. Igomurur qau wonou qomon qoregen eng inimbigorei. Ne Qenu wonou munon yurau enger eng gamirei. Wonou qob eng munon ginam yagsi isorei. Munon ai qent wot oabigumirei. Qenu bo mot wonou ginamt irarei.
Copyright information for `WNU