Galatians 4

4:1-7 Yisas wonou sarau end in bo munon qo wau unebi me igoun

Ye qob mit big qamam eng bo qemerin: Munon ger wonou wau eng der ur uma wogub wonomi gugum wonou sieriba. Wau qomourt igoriner eng wo ur qas toat qib ne munon barai-barai qei qob qamarari toat ende at qib igoi wo mom munon tari big ur wonou mi gugum imbiga ur munai up ba mi eng gagar wo qoaiba. Eng gas ende, in gor wau qomourt igo aibigau song-song wurit oabig-oabig qomon song-song ebet igunei. Igumune Qenu wonou wau imurimb qen maribigor eng gab imurima dara yamangar ag e bauor eng. In munon qomon inmorima igoun end wo gor dara qomon eng ba moriamorei. Ne wo qomon eng toat qib wogub umor end in wot oabigun eng Qenu init yonou wau ten init qemeriba.

An ete imbigar qamb in wonou wau, ende imbigar qamb wonou wau Igomurur qau eng init imurima derer eng misir uber inimbig igo. Igomurur qau eng in oau erobon et igo, ‘Tain, Qenu yonou tain’ ende qamb ab igo. End ne qoan an wau gogor gas ende igumanei. See bo wonou wau ten. An wonou wau ten buroun qamb Qenu wonomi eng gugum an baiar.

4:8-20 Pol Galesia wurit oau quguraget igoai

Eng apand, qoan an Qenu apand eng an sir me imbig ne aibigau song-song wuri Qenu apand ue eng wurit oabig sarau batar igumanei. End ne ye ete qemerini: See an Qenu imbigoun qamb quraumon eng ue. Wo gigit animbigorei. End ne bo sabar meimet qamb waber-waber mi ar gag eng oboub qamb ibitumut isub igoumon? Ende ebet isub eng bo ai bigau song-song wuri sarau batar wau gogor gas ende igoruboumon. 10 An inaun qen qiyo worom qen qiyo ne togun qen eng qeemben maribig gitab igoumon. 11 An eng abari ye anit sarau bam eng bo uburiner qamb yarimoum.

12 Ye an gas ende burem eng an bo ye gas ende buror qamb misir igoum. Ye aninob igoum eng ger me yesumungasiau. 13 An eng gaiar, Ye meimet qamb se qamart toar nob-nob Qenu qob aninob qamb igumei. 14 Qen end ye me nonoguretarau, eng an ye me ye mogirt wab wagau, ne me ierau, ue. Qenu wonou enger ger gab qiyo Yisas Krais gab ba qubeimau gas ende yesi igumanei. 15 An qoan eng at mismisir igoumon eng eret igo? Yonou gari mi eng aninob qemerini. Qen end aninou magqur eng gumotoabur ende qi eng ye yesamanei qi. 16 End ne see ye qob apand eng at qamb aninob aguniau gas eng at anqarausiaum qiyo?

17 Munon qei yarab anit igub anubersiorub qamb ebet igour ego wuri anmurimar qamb igour. Yet an bubur qereimb qamb ebet igour. Wurinou qenungau eng aninob sorimb qamb ebet igour. Git uber, ego munon wuri aninob sorimb qamb ebet igour eng qob ue, ego anmurimar ende obounor eng boru. End ne ye aninob igimine qiyo mugen et igimine ende ebet oau apand burab aninob qomorunor eng uber. Eng wuri ansi igour eng qamarari igub antoubar igoum. 19 An yonou wau ten gas ende bo ete qemerine igar: ye anit oau boruburoum eng yamangar ger qurag ig qoaib qamb mogis qert arub igo gas ende at igoum. Isi yarab an Yisas Krais mom ba igusiau gas ende abari qob toau igub oau pomaimoibam. 20 See ye me aninob igoum end borusi anitoubar igoum. End ye misir ger aninob qemeribam. Ye aninou qomon eng ebet igamari misir qebebi igub igoum.

4:21-31 Hagar Sara nob wurit big qob eng

21 Ende gab eng see qas your munon qomon qas toat igorib qamb ebet igo eng ye nob qamarari igin. An qomon qob qoan me igau? 22 Ete qura, Abraham wau ombur igoai. Wonou yamangar apand end wau ger ne wonou sarau betet igoar end ger igoai ende. 23 Ne yamangar geret wau bauor eng ininou munon qomon end, ne wonou ubeni segagam eng mom isig burab wau maigas me bainerei igama Qenu wonou musia wau baurei. 24 Ye yamangar ombur eng wurit big qemerine igar. Yamangar ger Abraham wonou sarau betet igoai, unum Hagar. Wo wau bauor eng ininou munon qomon end. 25 Hagar wo ai qaur Sainai ai Arebia end igamau gas ende. Qoan ir Moses ai qaur Sainai end iroa Qenu qomon sirbiga ininob qamb gumaterei. Hagar wo wau gogor gas ende munon sarau betet igoai. Eng gas ende munon qei Yerusalem munon baraitari qamarari igub taut ebet igour eng gor wau gogor gas ende qomon toat pondogub igour. 26 A yamangar ger wo Abraham ubeni apand eng, wo wau bauor eng Qenu wonou qob wot nausier end baurei. Wo ginam Yerusalem apand eng Qenu wonou ginam igo gas ende, sig uber ar. Wo ininou nani. 27 End Qenu qob ete qura:

Ne yamangar wau me baiau, ar igoan eng, oau uberet igoar. Ne wau baib qamb mogis qert me aruab igo eng mom mismisir ne uru wab igoar. Eng yamangar munon baurei igo wau me baiau igo isig burab wau bauor eng wonou wau tumbig irou der isiba. Yamangar munon nob eng wotanamimba.
28 Io, an Qenu wonou qob nausier end dariomanei, Abraham wonou ubeni apand wau Aisak gas ende. 29 Eng wau ger qoan unor munon qomont bauor eng der wau Qenu Igomurur qaut unor bauor eng nob yogub igoai. Eng gas ende qomon eng see igo. 30 End ne see Qenu qob maisi qura? Ete at qura: ‘Sarau yamangar wau nob wuriimurimari qoounor, igo ur mind goten eng bainer eng uber,’ ende at qura. 31 Eng gab in see sarau yamangar eng wau tumbigi ue, in yamangar munon nob eng wonou wau tumbigi.

Copyright information for `WNU