Mark 9

9:1-13 Yisas git goan igeseramorei

(Matyu 17.1-13; Luk 9.28-36)

Yisas qob eng ende qamb imusi bo qamar: “Apand aninob quraum, an e igoumon eng qei me umunanei igama Qenu wonou bibis bigor eng wonou qiribiten eng end dibenara guboumon,” ende qamarei.

Ne qen 6-ende ubura ne Yisas Pita Yems ne Yon ende wurimar ai qaur aib end irarei. Irab ne munon ombur gari eng der Yisas gamir eng wonou mi goan git goan nob bo igeser oan qenengi nob bura gamirei. Mi goan see ger oannob ende me gab igoun. Ende gab ebetemir eng munon ombur-ombur, Elaiya Moses nob der Yisas nob naget qobub igurei. Ende ibag ne munon ombur gari eng borusi mom yari ne qob ubersi me qamarau. Ende igoi wogub ne Pita der gegir qamar: “Barai, in e diaun eng sig mismisiraun end in mat ombur gari et ubouboun, ger net, ger Mosest ne ger Elaiya wonou.” Ende qamb igo gamir eng waber aib der wuriumiamorei. Ende aba igumir eng Qenu waber erobon end qamar: “Munon eng gaumon eng yonou wau ten sig mom wot igub igoum, wo qob qamara an toat igoarar.” Ende qamara igub Moses Elaiya nob ibogoub qamb asiamir eng munon ger ue, Yisas gari wurinob igoai.

Ne ai qaur eng wogub bo qumo darab munon ombur gari mi eng gamir end qob song-song qomorunor qamb Yisas qoronob wuritaisi qamar: “An mi qite gaumon end se me qamb qirar. Qen geret munangit wau umb der bugama qen end mi eng gaumon end dibesi qamarar.” 10 Ende qamara ne munon ombur gari eng wurinou qob-qob qamamir: “Umb wogub bo der bogomau qurar eng qob qanam eng maigas?”

11 Ende qamb ne Yisas qebi qamamir: “Munon qomon imbig igour eng munon yamangar ete wurinob qamb igour, Elaiya Qenu wonou qob gigit qamb igo eng wo gigit ag e deriba, dara ne Qenu wonou munon aib eng Isrel wurit imurimba ende qamb igour.” 12 Ende qamarari ne Yisas wo Elaiya unum eng igub ne wo Yon ya obotar igoar eng wo gigit der sarau baab igama waramari umor end qamar: “Segagam Qenu wonou qob gigit qamb igoar munon eng Elaiya gas eng wo qo darab sarau baab tap gigit musuorei. Ne see ye musub aninob qemeribam eng: Elaiya qo dererei, darab sarau bea munon wurinou misir boru-boru end ba borusiamirei. Eng qoan Qenu wonou qamara munon qei gigit gumatemir eng gor ende, munangit wau darab sarau bea wurinou qenungau end ba sumungasiorubour.” Ende qamb ne ete wuriqebi qamar: “Maigas gab Qenu qoan qamara wonou munon gigit gumatemir eng ete: Qenu wonou munon ten eng wo mom mogirt wab wogub waramari uminer qob eng qamamir eng maigas gab qanganget igoumon?” Ende qamara wuri qob taui ger me qamarau.

9:14-29 Yisas wau ger aibigau waramor eng musiarei

(Matyu 17.14-21; Luk 9.37-43)

14 Yisas munon ombur gari eng ende wurinob qamb wogub isi wuriimbig qib igoa yurau tau wuriwogub iramir eng is ibagamir eng munon yurau aib diab wurinob agunub igamari is ibagamirei. 15 Ne munon yurau eng Yisas ende isub igama gab borusi qiet ne wot iramirei. 16 Iroari ne Yisas wuriqebi qamar: “An meimet qamb agunub igoumon?” 17 Ende qamara ne munon ger erobon end igo taui qamar: “Barai, yonou wau ger ai waramorei igama qob me qamb igo. 18 Toar qen eng gab umb isub nanabar gagamt ne mu ba di waramb ende at igo. End mot diab nonou imbigau munon wurisirbigour eng wuri maigas me musiorunorei eng gab diab nonob quraum.”

19 Ende qamara Yisas igub ne wurinob qamar: “Ye qen dirigor aninob igoum eng an yet me oabigoumon ne? Ye qenen aninob me igorinei. Ye qen mai-mai anamar igimine an yet oabiguboumon?” Ende qamb ne qamar: “Wau eng mot diara gine,” 20 Ende qamara wau ba derari Yisas gab ne ai waramor eng wau wegib qamb ba ai qent qumo arir aba borusi aruarei, aruab nan mom qingim got mon gagamt mu ba di waramb ende ebeterei.

21 Ende aba ne Yisas der wau eng ur nob qamar: “Wau e mai, qoan qas ende ebet igoai qiyo?” Ne ur qamar: “Io, qoan qomourt igoar eng wonou ende ebet igoai. 22 Qenen ai waramor eng wonou qen eng yara ba mutet arir qiyo ba yag arir ende ebet igoai. End ne nonou qenungau musierib qamb eng wau eng nonogursi.” 23 Ende qamara ne Yisas der qamar: “Ne meimet qamb yet, ne mom gab eng wau e musi quran? Munon ger ye mom yiimbig qemeriner eng wonou ar uberburiba,” ende qamara ne ur der qamar: “Ye net mom oabig quraum qiyo, yonou sir me imbigoum. Eng gab ne ne yenonogursi,” ende qamarei. 25 Yisas ibagar eng munon irou qouimari ibag ne aibigau wau waramor end qamar: “Aibigau, ne wau e waramon end iruges quumet a qob me qamb igo e, wogub der iua. Iua bo wot me is.” 26 Ende qamara ne aibigau eng qoaib qamb wau eng ba ai qenen arir ne wau eng aba eab ab aruab ende at inab igama munon gab qamamir: “Io, uma.” 27 Ende qamb igamari ne Yisas ubent baab bemenima der bugab mom uberetarei.

28 Ende at wogub ne wonou wuriimbigau munon eng wurinob is mon geret igo ne Yisas qebi qamamir: “Wau aibigau waramor eng in musiorun qamb oboun eng me uberburau, eng maigas obouboun?” 29 Ne Yisas qamar: “An ye mom yiimbig ne yesimot ab obounon eng musioruboumon. Tap geret ue,” ende qamarei.

9:30-32 Yisas wonou uminer end bo qen omburt qamarei

(Matyu 17.22-23; Luk 9.43-45)

30 Yisas ende wurinob qamb wogub ne ginam eng wogub munon qei inimbigunor qamb wurinou qi Galili end isumirei. Wurinou wes end is igo Yisas wonou wuriimbigau munon eng qi wuriimbig igorib qamb isumirei. Ende igo ne wonomit wurinob qamar: “Munangit wau wurinou qob ue-ue end at ne dui narau bigari yar ba waramari umiba. Uma ne tumunimunorei igama qen ombur gari end bo igom der bugemba.” 32 Ende qamara ne wuri qanam barsi me imbig ne qebimau end yari wugumirei.

9:33-37 Your baraitari igo?

(Matyu 18.1-5; Luk 9.46-48)

33 Ende wurinob qamb wogub bo Kaperneam end isub munai mor ger isub igurei. End igo ne wonou imbigau munon eng wurinob qamar: “An qataben yar igo meimi qob qamb qomongori yar igomoroumanei?” 34 Ende qamara ne wuri qubig wagomirei. Wuri qob qamb isub igour eng wurinomit mai qiyo your baraitari igoriner qi end qamb-qamb isub igurei. 35 Ne Yisas wonou wuriimbigau munon 12-end wurit qamara qani yarari ne qob qataben qamb isub igour end wurinob qamar: “Munon ger wonou baraitari igorib qamb eng wau gogor gas ende igo munon qei sarau batar igoriner eng qen geret baraitari igoriba.” Ende qamb ne wau qomourt ger ba wubunobun et nagasi ne wurinob qamar: 37 “Munon ger wau e gab mismisir eng wau et gari me mismisirinerei. Yet gor mismisir ne yonou tain yiimurima derem end gor wot mismisiriba.”

9:38-41 Your ger inbanamsieriner eng ininou yurau

(Matyu 10.42; Luk 9.49-50)

38 Ende qamara Yon der qamar: “Barai, munon ger ne unumut toar boru-boru wurimusub igo eng ininob me yarau eng gab in giteturunei.” 39 Ne Yisas nob qamar: “An meimet qamb gitetet wugumanei? Munon ger ye unumut qomon wes ger ebet eng mindigar qob yet me qemerinerei. 40 A your in me inqarausi igo eng ininou munon banam.” Ende qamb bo qamar: “An qib igamari ne munon ger qataben nini animbag Krais munon yurau qamb ya qiyo mi qei andariner eng munon eng ar me igorinerei. Qenu taui ubersieriba.

9:42-50 Qomon boru oau apand bumai igo

(Matyu 18.6-9; Luk 17.1-2)

42 A, see munon ger wau e ye yiimbigar eng bo wonou misir boru end ba songesieriner eng munon eng nomon aib ger ba quman end touri wogub ten uyer yat ariramari misir iginer. End sumungasiorunor eng qen geret Qenu wo bo sig-sig mom tauimba,” ende qamarei. 43 Ne qamar: “Ne uben end qomon boru ebeib qamb misir igub gab eng qand uben ig sopur arirom. Arir igo ne uben igt qas igoriner eng qen geret bebereg igoriban, a mut naat oab igo end isib qamb eng uben ig-ig igoriner. 45 Ne goten eng gor ende qas. Ne qomon boru ebeib qamb isub gab eng misir eng wogub goten ig sopurminenei igo igt qas igoriner eng qen geret bebereg igoriban, a ende me ebeib qamb weginen eng mut naat oab igo end is sig-sig mom boru igoriban,” ende qamarei. 47 Ne mag end gor ende qas qamarei: “Magqurt mi gab misir boru igub gab eng mag ig gumot neri arirom, arir igo ne igt qas igama Qenu wonou bibis end isiban, a ar ig-ig igama eng, 48 ne ginam boru end isa mumundir negininget mut naat oab igo eng ne nonogsi ende abari ne qenen migeri nanab igoriba.”

49 Ende qamb ne mit big qamar: “Munon wai bieriner qamb tomont si bigari qen dirigor uber igo. Eng gas ende Qenu munon uber igoarar qamb wuriquguragsi igo. Wuriquguragsi igo eng mut wuriora uyeriri igab igo gas ende. End ne munon wurinou uber igorub qamb eng wurinomi quguragsiorunor. 50 Tomon eng mi iriga niau eng uber. Tomon qer uburinerei igama ne bo ba warigesi qebist werinen eng qer ue gab bo maigas aba uter buriba? Eng gab ne an munon yamangar gugum wurinou tomon qer uber gas ende igo qibanamsi erogori qomon uber end igoarar,” ende qamarei.

Copyright information for `WNU