aAisaia 53:12

Luke 22

Yutanindna Kuwul Yesusm Muembnavho Vrivna.

Matiu 26:1-5 eva 26:14-16, Mak 14:1-2 eva 14:10-11, Yon 11:45-53

Murapetava vinvnamba Yutanindna mendekli innemba, os sevriv Pasova inne. Nonamba hlavna rotiva yishui, tevwol vevnamoa. Doa sembayang andranindna kuwulmendekli, katekis hevm unna, es pimba helvakomandhivav Yesusmba? Heva os no kuwulva pem vivna, kembelnindnapenam vinvna, si homeis pimba helvowol vivm.

Wo Yutas Iskariot himba mongo Yesusna aonghal mahalnindrini lohvna, doa Setan hena nihmera sihana wuhholm. Yutasva ganamba, wonishovna no kuwulm eva polisim kekalvhonindm, unna, ka si Yesusmba yena englara holvonethinvav.

No kuwulva indk vithivna, umnina, yemba ata kava soveivav. Yutasva unna, lehra, wo hev nengna, henanam si kava Yesusmba hena englarava holvonethinvav? Kava indkumbina novra vinvavmoa.

Yesusva Hevtindim Wonnelm Vevna, Pasova Tih Innem.

Matiu 26:17-25, Mak 14:12-21, Yon 13:21-30

Doa Yutanind una, ata pivva deti hlavav hona mendekli innemba, pivnamba Pasova tih innemba. Hona inneram sipsip otolva walka vena, Sesoam nonam sembayang venalm. Rotiva yishui hlavna. Doa Yesus hevna aonghal mahalnindrini samblam Pitai Yonim unna, yeoa engo mi yesna, Pasova innem pivm meilna velm. Ata kava sis ambvav, ata os pimba mongawulm hlavav. Hev ohomnana, ata hi kava kokolma evevav?

10 Hev unna, kotaram esihohoo, wo ata yimba di enonglavav, tendoriniva po wulprovra emberna. Wo no indhanarinim yeoa ehengpethamno dom deuvram. Wo no deuvna aralmoa os ohomno, pivna guruva os oi, hi nomba kamarva lohv, ata diva kava Pasova innemba wonnevavpa? 12 Wo deuvna aralva yemba ata indthueinvav yitnihilmba mendeklimba, doa doara kokolma velohv, di yeoa inneoa kokolma evevm.

13 Doa Pitai Yoniva enganamba, kamarm enongla, os ten hev Yesus doara naengho vewol ovonam. Doa os meilna evena.

Yesusva Hevtindim Wonnevna Pasovatihram.

Matiu 26:26-30, Mak 14:22-26, 1 Korin 11:23-25

14 Nonamba Pasovatihva phonamba, Yesusva wonavhoana hevtindim, unna, kava yemba wonnelmangas vev, doa sism ata kamba indkokla vrivav. Pasovatihna innemba si kava hengava nevavmoa, verava, Sesoatindi nemel si muserava avrava. Nonam si kava nevav Pasovanonoa tihna innemba.

17 Yesus wain kapnahonam vranamba, Sesoam omnana, yimba lehra Sesoa. Hevtindim unna, yeoa honaoa kap wainoa vreirava, hlao. Kava nevavmoa hona wainmba, verava, Sesoatindi nemelva muserava avrava, os si kava nevav.

19 Doa Yesusva henga roti vranamba, omnana, Sesoa yimba lehra, doa hev popowol venamba, hevtindim moang vungu ovunvna, unna, memba kana nihil, yem kava dembhinv, yem kolvrowolalm. Henga yeoa kamoa nengvhueimnivrava, os hlavm. 20 Doa hlapianamba, Yesus wain kapnahonam vranamba, osangas vena, unna, memba kana tovol, kava ata sovhopieinvav, yem kolvrowolalm. Honindava Sesoava yemba moamba nemel ishunv.

21 Heva os mongova indhanariniva memba pivva waihlavpa, himba ata kamba ungundna englarava holvonethinvav. 22 Kava arana ombol lohv, kava wohengvav, nom ara ten kam omnanam. Heva os kava wavra vrev no indhanarinimba, temba kamba holvonethinvpa ungundmba. Sesoa si hemba kin plothomnavav. 23 Doa hevtindi hevm ishuwul vevna, an osva vei?

Yesusva Unna, Himba Nomba Yena Nengavnangva Engvpa, Himba Yena Mendekli.

24 Yesustindiva hevm eishovna, an piriniva kuwulva wulluhunv? Wo Yesus unna, puehalnindna kuwulva mendekli lovahinv, hev ningv, heoa kana nengavnangmangas engivm, wo heoa kamoa nungeilvra, os himba mendeklinonoa. Heva os yimba kana aonghal mahalnindva, manam yimba sna wevsamba engivav, owai. Himba nomba yeriniva kuwulalmba lohvrava, heoa hevmoa wohwulpihara, maim ora, otollini. Himba nomba yeriniva miva galmba vevrava, heoa yena nengavnangmangas eva enginvrata.

27 Yesus olhmona unna, es yimba ningv, an kuwulva lohv? Duang, ora hevna innesowanindrini? Duangta ten kursira avm. Heva os kava snamba owai, kava yena andranindrini luhunv. 28 Indhanamba kamba moakoklanamba osihivnamba, yimba kamba waiaevulvna, kamba dasvholaha anganamoa. Kavna ara kamba doara pusvundthoana mendekli kuwulalm, wo doa kava men daipota yem pusvund vev, yimba kana nemeltindi avav, wo pimba si innemba pomba mongawulm hlavav, wo yimba si kuwulva ilvahinvav 12pelara Israeltindina.

Yesusva Pitam Omnana, Ata Yimba Os Ovav, Kava Tit Venav Yesusmba.

Matiu 26:31-35, Mak 14:27-31, Yon 13:36-38

31 Yesus ona, Simon hello, Setanmba os oi, kava wiki vewolalm vev Yesustindim. Heva os doa kava Sesoamba osahmani osmba, Pitava kanaminiva wohgavavmoa. Setanmba ata yemba wiki vrepiarava, wo yimba hengava kamba keknamba lohvhoamnavrava, doa yeoa pevna mongawatindina undmoa keknamangas woseinu.

33 Pitava Yesusm omnana, mendekli, kava pemba vevmoa, yemba engpralmba buiramba eva dahalmba. 34 Yesus ona, ata mendah ayamba ophovramoa, ata yimba samblamongolm osva owovav, kava tit venav Yesusmba.

Yesusva Unna, Yeoa Pevna Indnahonam Lovahthamno, Kana Moam Ungundm Ishunilm.

35 Yesus unna, nemetva kava yemba wolanga vungu vevna kavna andramba, yemba kava os unna, manam pevna diwonda, luwunda, spato ianga vevra. Wo nonamba yimba manam asahvna? Hev umnina, owai, kava mana vemamba asahnamoa.

36 Hev unna, daipotava yimba kana andrava vivrava, yimba himba nomba diwondava iaevulvrava, yeoa pevna diwonda luwunda ianga vevm. Eva yimba ovlakashuiva, yeoa pevna bayu sovanam mongnindm dembrahunu, dim dombolm nonam. Wo no dina yimba sism sovavav ovlakasva pevmba. 37 Yesusva osva olhmona unna ovlakasm, wo henga unna, noinda viu, moamba doaramini novol velohv os,

Indhanamba nunglivra no indhanarinimba, himba uvra, indhanarinikokla. a 
Indhanamba sna nengavnangva si kamba vinivra. Manara, doaraminimomba novol velohv, wo indhanamba kamba osangas velvohmanav, os ten novol velohvm.
38 Hev umnina, mendekli, nonglo, ovlakas sambla men. Hev unna, doa.

Yesusva Aralm Omnana, Yeoa Kana Kinwondaoa Nengasvo Ambo Pevna Undna.

Matiu 26:36-46, Mak 14:32-42

39 Os wongana nominiva oliv denwit oloram, dom ten hev elsus tonglalohvnam, sembayang velm. Di wonphonamba, hev unna, yeoa Sesoamoa osihminu, yena undmoa keknam woseinda, ata homeis Setan yem wiki vewol vevm.

41 Himba hevho nominiva venamba indanampetam, mulumbdandna lohvhoana, Sesoam aralm osahmanavna. Ona, ara, kana kinwondaoa yeoa nengas pipaho, ambo yepevna undna yimba osva nengtava. 43 Doa mongo Sesoana ovsongolnindrini pihanamba senamini, hena undm keknam lothomnana.

44 Heva os Yesusmba kin venavna mindnam, wo noinda himba keknamangas Sesoam osahmanavna, ehlava pihangu venavna pethara, os ovna, tovol toparal vev. Doa himba ishopianamba, henga hevtindi inam dem geine, nongalna, nin shav. Kinsomb vinvnamba, noinda shavna. 46 Doa hev unna, manam yimba shavav, pulvorava, Sesoam osihminu, homeis Setan yem wiki vewol vevm.

Yutas Mundilm Wonprona, Kevralm Yesusm.

Matiu 26:47-56, Mak 14:43-50, Yon 18:3-11

47 Yesusva mendah ishunvna, wo henanam hevtindirini mongo Yutas, himba nom sembayangnindna kuwulmendeklim, polisim, mundilm wonprovna. Yutasva murapetam Yesusindam ganamba, englana selthoanamba, mapotho ovrungu vevna. 48 Doa heva os Yesusva omnana, yimba kamba mapotho ovravma novtotholm, wo eva yimba kamba ungundm indthueinvma?

49 Yesusna aonghal mahalnindva hemba nungeilvnamba, ata kevrivav Yesusmba, doa hev Yesusm umnina, ata kava hemba helvowol vivav ovlana. 50 Mongo no hevtindirini Yesusna, ovla mendekli wulluhvna, doa hev no mongo indhanarinina aong kovhoamna nihanasisrini. Nomba indhanariniva sembayang andranindna mendekli kuwulna andranindrini.

51 Yesus hevtindim unna, aembu, doa Yesusva os no indhanarinina aongva tuhmanana, henga beswonam lohmanana. 52 Yesus unna nom indhanam, ten Yutas wonproim, yimba kamba os ningminivma daosnindrini, wo noinda yimba iambvna tengava ovlava?

53 Kava elsus tempelduvra ishomana vevna, yimba kamba nangola vrivna, heva os yimba kamba diva kevrivnamoa. Men detiva yenamba luhunv, Setanmba hevna mendekliandra vev, yemba wohtalmba kamba kevrilmba.

Pitava Dasalmba Samblamongolm Osva Ona, Yesusmba Kava Tit Venav.

Matiu 26:57-58 eva 26:69-75, Mak 14:53-54 eva 14:66-72, Yon 18:12-18 eva 18:25-27

54 Doa no indhanamba Yesusmba kevrinamba, os waiwohangana sembayang mendekli kuwulna deuvram. Doa Pitava sisnonoa ambo oiwonam engalgavna. 55 Indhanamba suwemba di sengewuvna no kuwulinda deuvpethalla, hevpa di suwera kuksa vevna, wo Pitava pronamba sis, di patha avhueinvna murapeta suwera. 56 Mongo ongamalongorini pra, kuwulna andranindrini. Himba suwemdakambara Pitam nonglanamba, olhanam. Hev mindkombaiwonam unna, honi indhanariniva himba Yesustindirini.

57 Doa Pita omnana, owai, kava tit venav Yesusmba. Ona henanam, wo henga mongo tendorini nonglanamba Pitam, hev omnana, yimba Yesusi lohmana evevna. Doa Pitava omnana, kava owai. 59 Wo venamba, mongo tendorini woholhana indnahonam, hona indhanariniva himba Galili provinsrini, os men Yesus hev, himba Yesustindirinita.

60 Doa Pita omnana, owai, kava tit vev, nomba yimba temba ovpa. Nonamba Pitava ishovna, ayamba os ophona. Yesus mendekliva haravhoanamba, Pitam nonglanga ve novnangas, wo Pitava no moam Yesusnam doaraminim nengna, ona, ata ayamba mendah ophovramoa, yimba ata samblamongolm osva owol vevav, kava tit venav Yesusmba. 62 Pitava no deuvriniva wohpholahangana, wenoppa mindnam dalmanavna.

Yesusmba Wevdakana Hilvivna.

Matiu 26:67-68, Mak 14:65

63 Kuwulva mendah di Yesusmba waiolvohvnamba, wo polisiva Yesusm loumona umnivna, wevdakana hilvivna, novm hehlathawulminina lensona, umnina, yimba moashulnindriniva lohtava, kam ishunu, anmund yemba hilvi? Wo mindnam loumona ishumnivna.

Yutanindna Kuwulva Yesusmba Wetatmora Waiishuvna.

Matiu 26:59-66, Mak 14:55-64, Yon 18:19-24

66 Lingil lihanamba, noi kuwul kusovna, hevm ishuvna. Sembayang andranindna kuwulmendekli, katekis noi kusonamba, hev polisim unna, hom Yesusm waiembo, ka hui waiishui. 67 Hev umnina, yimba Kristus lohvma, temba Sesoava pusvundthoanam?, kam ishunu. Hev unna, yemba kava ishuntava, ata yimba ningvavmoa. Wo eva yemba kava sah owol vetava, ata yimba kamba opla vrimnivavmoa. Doa heva os si kava avhoavav Sesoana nihanasis yunalm, ten keknamangas avm, manara, kava arana ombol lohv.

70 Doa hev indkumbi umnina, yimba os nengvma, yimba Sesoana ombol? Doa hev opla vrinna, yimba os uvta, ka. 71 Doa hev hevm una, doa pivva hilli Yesusna moamba. Noinda pimba ata indhanarinimba mongova osihminivavmoa wetatmomba Yesusnamba.

Copyright information for `WRS