Luke 24

Yesusva Phona Beswonam Pokamarini Hevna Nihna.

Matiu 28:1-10, Mak 16:1-8, Yon 20:1-10

Doa minguram simekumbranonoa no ungevliva hevna deuvrini vinamba, Yesusm nonglalm angavna pokamaram. Himba wel sanda noi iangavna, om ten hev doara meilna vinam. Doa himba pokamam nunglul lovahvna, pai, honmba ahnam vileilv, nomba nivpa temba ehlithinamba pokamamba.

Doa hev saivnamba no honmera, wo heva os Yesusmindva vindilvnamoa diva. Himba hevm ishuvna mindnam, hi dihi vindilv? Doa mongo noi indhanarini sambla no ungevlim wonelohvna, hena kayenmba mindnam ambo painov kesaka viku vinvna. Doa no ungevliva pem viwul vevna, ambo himba pethanovangas vivna, hemba nungeilvnamoa. Doa no indhanarini sambla ohunna, yimba aslalvma Yesusmindm? Owai, indhanamindhovrava manam yimba aslalvav, himba doa beswonam phoi hevna nihna. Ningu no moam, yem ten hev ishunnam, nonam hev avnam Galili provinsra. Himba os ona, kava arana ombol lohv, heva os kamba si ungundna englisra bumbrisvav, wo si os kamba kruserava lepetheivav. Wo kava si samblamongonin vevav, wo si os kava phovav henga kavna nihna.

Doa no ungevliva ningna Yesusna moam, os wuleihalaha angana no pokamava, ishunilm Yesusna moalamangnindm 11pelaram eva aonghal mahalnindm indkumbim. 10 No ungevliva mongova Maria Maktala, mongova Yoana, mongova Maria Yemsna aval. Hona ungevli eva mongla ungevli, Yesusna pholmomba he wulanginna moalamangnindmba. 11 Heva os no moalamangnindva no moamba hillinamba, una, yimba dai uv, kava ningvmoa, osva oi, lehra uv.

12 Doa Pitava lelnam ganamba, doa hev vithanamba, nov vesiha ve pokamara, nonglana, kayenangas moan vilv, noi ten Yesusmindm nona ningithinam, mongova mana vemamba owai. Doa henga os deuvram gana, himba mindnam nengavnang vevna os i.

Yesusna Aonghal Mahalnindrini Sambla Enonglana Yesusm Monara.

Mak 16:12-13

13 Nonamangas Yesusna aonghal mahalnindrini samblava Yerusalemrini evenamba, Emeus kembellam engavna, mani oklama. Nonamba himba engavnamba, himba Yesusna dahalmom ihishuwul engavna hevm monam. 15 Himba mindnam ihishovna, doa Yesus hev yumna vewolnamba, os wongavna no monam. Enonglavna, heva os novmba mana vema ehlathinvna, himba beswonamba elihavnamoa.

17 Yesus unna, manamom hevpa yimba mindnamba eukw evevrav momnanamba? Doa hev elohvhoanamba, novlomosnahonam duus evevhowole. 18 Mongova nomba heriniva nihilva Kliopas, hev omnana Yesusm, es eva yimba tit vevma, memba honamba mana vemamba mendekliva phonamba Yerusalem kotarava hona mingu eunumbulnamba? Dihi yimba mongona kotanindrini, noinda yimba tit ovov?

19 Yesus unna, manamoa? Hev ohomnana, Yesusmom nom Nasaret kembellinim. Himba moashulnindrini lohvna Sesoana, mendekliandra vewol vevna. Himba Sesoana moam indhanamba ishomana vinvna, wo Sesoava eva indhanamba hemba liheivna, Yesusva keknamangas lohv.

20 Heva os pina sembayang andranindna kuwul, mundil, himba Pailat duangna englisra desvhueina hemba, kruseram lepethalm. Wo nemetva kava os ningvna, hona indhanarinim Sesoava wolaihaprana, ona pimba Israelnindmba buirinim wolapho velm. Heva os owai, doa dahana, doa hemba lepetheinamba, wo samblamongonin hemba vindilna pokamarava.

22 Heva os doa ungevliva kanamba monglava kamba ishuni, wo kava luklukul vithi. Manara, himba daipota simekumbra angai, nonglalmba Yesusmindmba, doa heva os owai, vindilvnamoa. Himba henga ambaiva, kam ishuni os, kava doa Sesoana ovsongolnindrini samblamba nungeili, wo himba kamba ihishuni os, Yesusva doa henga beswonam phoi. 24 Wo monglava kariniva Yesusna pokamaram angai nonglalm, wo os nungli himba, ten ungevli ishunim, heva os Yesusmba himba nunglimoa.

25 Doa Yesusva no moam hellenamba, unna nom sambla indhanam, yimba ind hui elohvma? Doaraminimomba moashulnindnamba yimba ekek vethawol evinvnamoa. 26 Os novol velohv, kin mendekli si vevav, nonamba Kristusmba kevrivrava. Wo boasna himba si hona kinmba pungavav, wo os si hev vuhe besallava Sesoaiva wohahavav.

27 Doa Yesusva mendah ishunvna no sambla indhanam, moam nom velokusa vinvna, ten doara moashulnind novol vinam, Moses eva owal moashulnind. Hev unna, hona moamba Kristusm wohlehv. 28 Mendah momnanam ishulangavna, murapeta doa pulvovna Emeus kembella. Yesusva os vevna, ona, wohkohangalm vev, hev ohomnana, owai, okombava doa vohav, yem ka hui waiahai. Doa os waiahana, mendah hemba elihavnamoa.

30 Doa innem aevulthanamba, hlalm vevna, Yesus roti vranamba, Sesoam omnana, lehra, doa powalwolnamba, moang vethawolinna. Doa hena novpa pevhoawolinna, elihana, Yesus hev memba. Wo nungi lelnam Yesusva hoai vena nominiva os.

32 Himba hevm ihishovna, pina indva suwemsna tawulinvna, nonamba pimba monarava doaraminimomba doa wohvelokusethini Yesusva.

33 Wo himba indwonamba anahanamoa, indslaposla os wohengana Yerusalemram henga, hevna owalm 11pelaram, eva indhana monglam nongalephona. 34 Doa heva os noi 11pelara di aevulvnam, hesna nungi ishunna no sambla indhanam, ona, doa mendekliva henga beswonam phoi. Himba proiva, Simonm nonglapho. Wo eva osta, no sambla indhanamba Emeusriniva os ihishunnata, kava monara enonglai, eva di roti powalwolim, di kav vei elihai.

Yesusva Nongalphona Hevtindim Musera.

Matiu 28:16-20, Mak 16:14-18, Yon 20:19-23

36 Mendah ishuvna Yesustindiva, wo henanam nungi Yesus hovrahovra lohvhueinna, unna, indwonam aevulu, Sesoa yemba wonav. Heva os no indhanamba himba evekingil vithina penahonam, uvna, sumbho.

38 Yesus unna, owai, manara yimba pemba viv. Es hevpa yimba osva uv, sumbho, hui nunglu kana englana monglanam. Memba ka, kam kevru, nunglu, sumbhova sna nihnamba, owai. 40 Doa osva onamba, hevna englamongla nihinna. Doa himba wohindk vithivna, 41 heva os himba monglava mendah sambla und verumbvna, tanammi owaimi. Noinda hev unna, inne kam vreuhtuk, 42 doa tambkoshind vetreihuna, 43 doa hev os ninna hevna novra.

44 Hev unna, nemetva doarava kava yemba wonavnamba, kava yemba os ishunna, moamba nomba Mosesna eva moashulnindna eva Devitna sangalmoa novol velohv, no moamba kam lehvrav, wo kava yunam wohengvav no moam. 45 Wo doa Yesusva hena nengavnangmba otuhowol ovinna, wo noinda no Sesoamomba doaraminimomba himba beswonamba levrapivolna.

46 Hev unna, moamba os novol velohv, si Kristusmba kin vreiuhvav, os hemba dahavav. Heva os samblamongonin himba verava pokamarava, hengava himba si os beswonam phovav hevna nihna.

47 Yimba kamba naengho vruwuvmona vevnam, wo yeoa kana moamoa wulvaho indakonda pethara, vei hui Yerusalem kotara, verava, puehalnindna pethara. Os ishunvm, indkoklamoa wuleihivra, wo Sesoa yena indkoklamba osva si maikumi vinvra.

49 Kava yemba mana vema besal vraholm vinv, ara doara nemet ten wohonam. Yeoa hui kotara aevvm, wo si Sesoava wolaihaprinvav no mana vemamba yemba, yemba poauothowol verava, yena kelva keknam woseinvav.

Yesusva Hevna Aonghal Mahalnindmba Sandhalaha Vongana Sesoaindam.

Mak 16:19-20, Aposel 1:9-12

50 Doa Yesusva ishopieinnamba hevna aonghal mahalnindmba, os wongana dom murapetam Betani kembellamba, wo hev engla liowolnamba, unna, Sesoa yemba awothowol vev. 51 Wo honamba mendah vevna, os sandhalaha vongana Sesoaindamba. 52 Hevtindiva sembayang vinivna, os indk vethapravna mindnam, wo os Yerusalem kotaramba ambna henga. 53 Wo elsus himba tempelduvra Sesoam okololvohvna. Doata Lukna Yesusmomba.

Copyright information for `WRS