Luke 6

Yesusva Unna, Saptumomba Vah Iaevulmomba Kava Kav Wulluhv.

Matiu 12:1-8, Mak 2:23-28

Wo sapturamba indhanamba vah iaevluwul vevna, wo Yesustindiva himba monam angavnamba, doa osohovmonam angavna os. Wo hev witmov englana pueitvinamba, wo englana sanbas vewol vivna, os kelva tongovoral vevna, doa nihilva hlavna. Ponmba vinvnamba, noinda himba hlavna.

Wo Varisinindva monglava di lovahvna, wo hev hemba nungeilnamba, unna, es hevpa yimba osva viv sapturamba? Doaraminimomba os novol velohv, manam yimba nonamba vivav osva.

Doa Yesus unna, owai, katindiva lehra viv. Tanam doaraminimomba novol velohv, heva os owai, yimba pevpa plalmomba beswonamba velokusa vivmoa. Yimba nonora, Devitna simbehumunillinina moamba os novol velohv, Devitmba ponmba venavnamba, hev sembayangduvrava sihanamba, doa roti nena, nomba temba Sesoana novrava dihelmanavnamba. Rotiva nomba os novol velohv, ombandhanamba manam hlavav, sembayang andranindangas hlavra. Doa heva os Devitva hevnam wonnena. Yimba tit vivma plalmba? Kava arana ombol lohv, kava eva indhanamba wohtlohv, sapturamba vah iaevul okombanamba manam manam velmba nonamba.

Yesusva Englamungilmba Sishona Vrena Sapturamba.

Matiu 12:9-14, Mak 3:1-6

Wo mongona sapturamba Yesusva mongo sembayangduvra sihanamba, avhoa, os hev indhanamba moam ishomana vinvna, Sesoana nemelmom besalm. Doa mongova tendoriniva di avna, hena nihananglava doara englabong venana.

Wo Varisinindva eva katekisva himba di mongawulm sembayangduvmera sembayang vivna, wo himba Yesusmba naengho vruwul vevna, ata englabong mungilmba sishona vrevavmi, owaimi? Himba osva vetava, ata pimba hemba ishumnivav os, yimba indkokla vindai, yimba memba osva veiva sapturamba.

Yesusva lihawol vinna hena nengavnangmba, doa heva os hev englabong mungilmba omnana, proo, hui hovra lohvhoao, doa himba os lohvhoana Yesusna novra. Yesusva os unna Varisinindmba, es yimba ningv, Sesoana moamba es novol velohv? Sapturamba kava sishona vrevavma hona indhanarinimba? Kava lehrava beswonam vevravmi, osm heoa beswonam ara, ora kava nombolvhoara, hemba dahavav? Wou ishutuk.

10 Yesusva hemba nongaluku vevna novnangas, doa hev englabong mungilmba os omnana, yeoa pevna englaoa shuavm. Doa os himba shuanamba, wo englava hevnamba beswonam lohmanana. 11 Doa Varisinindva nomba os musk vivna mindnam, una, es hevpa Yesusva osva vei detiva, doa hevm ishuvna, es pimba Yesusmba si vinivav?

Yesusva Tendomba 12Pelara Kikih Vewol Vena, Hevna Moalamangnindalm Lovahalm.

Matiu 10:1-4, Mak 3:13-19

12 Wo henga Yesusva gana, sembayang venalm Sesoam aralm. Hev indhanahuiram gana oloram, doa os sembayang venamba, okombava vohavnamba, venamba, lingil lihana, hev sembayangangas vawovna. Doa sismba himba hevna aonghal mahalnindmba nembaomana venamba, doa monglamba nominiva hev kikih vewol vena, ona, yimba si kana moalamangnindalmba lovahvav. Wo 12pelarangas hev kikih vewol vena os.

14 Seilva hev Simonm pusvundthoana, weihaloh vrenamba, Pitam awo, ona, yimba Pita lohv. Doa Endrum pusvundthoana, nom Simonna boasalal. Doa Yemsim Yonim pusvundthoawol vena. Doa honam pusvund vena, Pilipm, Bartolomium, Matium, Tomasm, Yemsm, nomba Alviusna ombol lohvna.

Doa henga mongom Simonm pusvundthoana, nomba Simonmba indhanamba os umnivna Selot, himba duangm Romnindm engalpingalm vevna Yutanindna petharinim. Doa hev Yutasm pusvundthoana, nomba mongo Yemsna ombol, doa hev henga mongom Yutasm pusvundthoana nomba Iskariotrini, temba sismba Yesusmba ungundna englisrava desvhoanamba.

Yesusva Uvavulmungilmba Mindnam Sishona Vewol Vena.

17 Wo Yesusva hevnamba aonghal mahalnindmba nominiva wonpronamba oloriniva pundram vavallam, di lohvhoa. Doa indhanamba esvema hemba di wonkusovna, vei Yesustindi mongla eva kembelnind. Nomba indhanamba doara kusovna, osm Yesusna moam hellelm. Una, himba ata pina owalmba sishona vewol vevav, memba uvavulmungilva aevulvpa. Nomba oklanindva himba doara ambwol vena Yutia provinsrini, Yerusalemrini, eva ungundna kotarini, Tair kota eva Saiton kota.

Doa Yesusva osangas venamba, uvavulmungilmba nomba sishona vewol vena, wo eva hev sishona vewol venata, indhanamba nomba temba doarava tihsongova nihmerava sihangu vinnamba hemba. Hev sishona vewol venamba, doa tihsongova nomba gapiana.

19 Yesusva eusmongal lohvna, os sishona vewol vevna, doa indakonda hemba kanandhowol vena, wo noinda indhanamba Yesusm kulthoamnana, osm ora hena nihmba tuhvra, kamoa eva osta lesvhoawol verata.

Yesusva Hevna Aonghal Mahalnindm Unna, Yimba Sesoatindilm Lovahv, Himba Yemba Ind Lothunvav.

Matiu 5:1-12

20 Yesusva hevna aonghal mahalnindm nongalnamba, hev unna, yimba ambo sena posra ahalohv owousra, doa heva os yeoa indk vithivm, manara, yimba Sesoatindilm lovahv.

21 Henga unna, yemba ponmba vinv, doa heva os si yemba pilivhoawol vevra. Yimba daipotava wena uwuv, doa heva os si yimba los uvav.

22 Si indhanamba yemba musk vinvra, Yesustindi, doa hev si os yemba wonishuvavmoa, owai, hev ambo yemba moakoklava ishunvav. Hev yenamba nihilva si os pingipuv ovunvav, sahoklal, doa heva os manam yimba duus vivav noindava, owai, indk vithu.

23 Yeoa os plasra avm nonamoa undwonam, manara, Sesoava yemba mana vemamba mendekliva doa kokolma vinna hevindava. Wo indhanamba nomba temba yemba musk vinvnamba, himba osangas vivna, temba hevnamba simbehumunmba musk vinvnamba Sesoana doaramini moashulnindmba.

24 Yeoa indk vithu, doa heva os dinindva nomba si hemba kinsomb pelhola vinvav, wo henamba wenoppa si pihangu vinvav. Manara, hevna wohmba memba himba daipotava huhul velvohvpa, si hengava himba dumbvavmoa owai. Manimani notongorava hemba daipotava indva lothoprinv, owai, si hengava himba dumbvavmoa wohva.

25 Nomba indhanamba temba daipotava wohva mindnamba iaevluwul vevpa, hemba osva indva lothoprinv, kamba pilivhoawol vev, doa heva os si sismba himba ponda uwuvav. Wo nomba indhanamba, temba daipotava osva ishuvpa, kava lehra, doa heva os si sismba henamba wenoppa pihangu vinvav wenahonam.

26 Yemba indhanamba wi vewol ovitava, yeoa pepeh vivm, manara noinda pina simbehumunmba hona wevsana vinvna moashulnind daspolmba.

Yesusva Hevna Aonghal Mahalnindm Os Ishunna, Yeoa Pevna Ungundmoa Nesmos Vrowol Vivm.

Matiu 5:38-48

27 Doa yeoa hillivm, kek vithivm, wo ungundva yemba mana vemamba vinitava, yeoa hemoa und vewol vivm, heva os manam yimba esesmba vinivav. Wo indhanamba yemba moakoklava ishuntava, yeoa hemoa moamba besal esesmba ishunvra os, Sesoava yemba nesmos vrowol vera. Wo indhanamba yemba pulnamba wehla vevrava, yeoa hemoa beswonam vewol vivm, wo Sesoam osihminu os, yeoa hemoa nesmos vewol vera.

29 Wo indhanariniva yemba sangvalva helvetava, doa heva os manam yimba hevmba hengava helvevav, owai, ambo nethamno mongnahalm. Wo indhanariniva yena bayupanasva ora moan vrara, wo hemba osoa moan vrahora, manam hemba ovomnavav, owai, ambo hemba dembrahora talananahonam.

30 Wo indhanariniva yemba mana vemamba osahmanavrava, wo hemba os vrahora, wo indhanariniva yena wohmba hevna englana vrarava, wo manam yimba hemba okusv vevav, kanaoa kavm vraho, owai. 31 Yeoa ningvm besalmonam, wo indhanaoa kamoa osangas vinivrata eva, wo hona wevsangas yeoa vinvmta hemoa. 32 Wo indhanamba yemba und vewol vivrava, wo yimba hemba hengava undva vewol vivrava esesmba, wo an si osva yemba wivewol ovovav. Manara, puehalnindva himba osangas viv, himba undva vewol viv indhanamba, nomba temba hemba undva vewol vivpa.

33 Wo indhanamba yemba nesmos vewol vivrava, wo yimba hemba hengava nesmos vewol vivrava esesmba, wo an si osva yemba wivewol ovovav. Manara, puehalnindva himba osangas viv, himba nesmos vewol viv indhanamba, nomba temba hemba undva vewol vivpa.

34 Wo yimba owapevmba pevnamba os ninginvra hevmba, ata kamba mana vemamba esesmba dembrahunvav, wo osva yimba hemba mana vemamba dembrahunvra. Wo an si osva yemba wivewol ovovav. Manara, puehalnindva himba osangas viv, himba mana vemamba dembrahunv owalmba, temba hemba mana vemamba esesmba dembrahunvpa.

35 Manam yimba osva vivav, owai, yeoa pevna ungundmoa und vewol vivm, wo nesmos vewol vivm, wo mana vemamba dembrahunvra. Wo manam yimba osva ninginvav, heoa kamoa henga dembrahunda, owai. Sesoava sena av, wo hev yemba si os mana vemamba mindnamba huhul vewol vinvav. Hev si os yemba beswonam nongalvav, kana ombol, kana wevsam engiv. Manara, Sesoana wevsava os prov, hev nesmosal av, wo hev wavrava vovhoawol veluhunv indhanakoklamba, nomba temba himba Sesoamba okolamba owai vivpa.

36 Wo yeoa indhanamoa wavra vovhueinvm, wo indkoklamoa henamoa maivithivm, noinda osva viu, Sesoa pina aral osangas vinv pimba.

Yesusva Hevtindim Unna, Yimba Manam Indhanamba Ositvav.

Matiu 7:1-5

37 Wo manam yimba indhanana doaramini pokokva vileivrivav, wo Sesoava si eva osva yenamba velavravavmoa pokokva. Wo manam yimba indhanamba osva ishunvav, yemba doa wohplel vei pevna indkoklarava. Wo eva Sesoava si yemba ishunvavmoa, osva yemba doa wohplel vei. Owai, yeoa indhananaoa indkoklamoa maivithivm, wo Sesoava si eva os yenamba maivethinvavta.

38 Wo yeoa indhanamoa moang vinvm mana vemaoa, nomba indhanamba temba mana vemahuiva aevulvpa, doa Sesoava si os yemba henga esesmba dembrahunvav. Wo mani espetama, owai, yemba si wondanahonam dembrahunvav esvema, oi tendorini nahov valawora peindindva vrev, osm mindnam pilivhoara. Wo yena valawova ora mendekli ora eusil, temba yimba indhanamba songowol vinvpa, doa Sesoava si os yena wevsam engvav.

39 Yesusva mendah hevna aonghal mahalnindm isholuhunvna, hev olhmona ona, indhanariniva novtitmungilva avrava, wo mongova provrava, temba eva novtitmungilta, ishomnavra os, ata yemba kava beswonam waingavav. Heva os owai, ata hemba mongawulm yunam epelepewolvav potandara.

40 Wo indhanariniva avrava, hevna guruna moamba hellellohvrava, wo manam himba osva nengmanavav, kava kavna gurum kuvhoav. Owai, heoa hevna guruna keusingi lohra, osm moam kek vethavra. Wo sism si nengavnangva pilivhoamnavav, doa si os hevpa gurualm lohvav. Wo indhanamba monglamba si os hena moamba hillimnivav, kek vithi, yimba doa nonora lohv.

41 Wo manam yimba osva vivav, oi indhanarini hevna owalmba ishomni os, singpongpetava yena novrava doa pathalohv, doa heva os hevpa tit vev hevnamba, osva tipopov kavindava eva pathalohvta.

42 Manam yimba pevna owalmba osva ishomnavav, mana ema eusil ka ata vramnavav yena novrinisna. Yimba gekala ov, boasna yeoa vrao tipopovoa pevna novrinioa. Doa osva ata yimba henga beswonamba nonglavav, mana ema eusil vramnavav owapevna novriniva.

Yesusva Unna, Indhanarinina Undva Lohmanav Hevm, Doa Hev Hevna Andrava Nonapopol Vaomana Vev.

Matiu 7:16-20 eva 12:33-35

43 Yesusva mendah olhmonamba isholuhunvna hevna aonghal mahalnindm. Timba besalva lohvrava, doa movolva sahoklalva endvavmoa, owai, besalangas endvra. Wo eva mongova timba merava lelao vethatava, osva movolva besalva endvramoa owai.

44 Indhanana wevsava os prov, himba timuvm naengho vriv, doa os sevriv, memba timba besal, pueuvpa, memba timba sahoklal, umba. Pueuvpa endwol vevmoa umrava, wo auva endwol vevmoa psaorava.

45 Doa indhanariniva besalva lohv, hena nengavnangva besal lohmanav, doa osva himba beswonam velohv andrava. Wo heva os mongo indhanarini sahoklalva lohv, hena nengavnangva sahoklal lohmanav, doa osva himba sahonam velohv andrava. Manara, mindemba yenamba kolmal dombv undna.

Yesus Unna, Samblamona Yimba Indhanamba Av.

Matiu 7:24-27

46 Yimba indhanamba kamba elsus alv, mendekli maimba, doa heva os owai, yimba kana moamba kek vithivmoa, wo engivmoa. Himba nomba kana moamba kek vithivrava, wo engivrava, himba nomba besal aevulvav. Himba snal lovahv, oi indhanarini temba nengna, kava deuvm velm vev. Doa os himba petha tovawol vevna mindnam, doa milukulva besal di dembhapiha vungavna. Doa sismba pueumbva mendekli pronamba, ona deuvmba viluwulkohana, doa heva os owai, deuvpa keknam wohlohna, wo dalohnamoa, doa pueumbva gapiana.

49 Wo himba nomba kana moamba hillivrava, wo kek vithivmoa, himba nomba os lovahv, oi indhanarini temba nengna, kava deuvm velm vev. Doa heva os himba beswonamba vevnamoa, himba seposam ambo sena pelkleihana. Doa sismba pueumbva pronamba, deuvmba os tupulis wulkohamnana.

Copyright information for `WRS