Matthew 14

Herot Kuwul Yon Baptaismba Helvakomandhana.

Mak 6:14-29, Luk 3:19-20 eva 9:7-9

Herotva kuwul mendekli wulluhunvna Galili provinsnindna, Galiliva Yesusna provins. Himba hellena moakolm, ona, Yesusva mindnam mendekliandra vev, wo doa hev unna hevna andranindm, memba hona Yesusva, Yon Baptais tanamolnam. Kava helvakomandhana hemba nemetva, wo himba henga doa phona pokamariniva beswonam, wo noinda himba hona mendekliandrava vev nonapopol.

Herotva doa doara nemet helvakomandhana Yon Baptaismba, hona moamba os. Yonmba mendah ishomnavna Herotmba, doa yimba sahokla vindana, yimba ungevliriniva pelvrana, ye pevna etepevna Pilipna ongalm pelvrana, hena nihilva Herotias. Memba yimba Sesoana lohohmom pilpikohav, wo noinda Herotmba mindnam wuspronamba, hevna valgonindm wohtna, wena ningu Yonm, wo buimera desvhueu. Herotva Yonmba helvakomandhalm vevna, heva os owai, himba henga pem vinvna indhananapenam, noinda indhanamba os ningvna, Yonmba Sesoana moashulnindrini, ata homeis kam hilvivm Yonnilm.

Dawonam Herotva inne wonnevna, osm ona, honanam avamba kamba lengna nemetva nonam. Indhanamba mindnam kusona, Herotna innemba hlalmba Herotmongova, wo Herotiasna molva pronamba, di indhanahovra deisil vewol vevna, osm indkumbiva hemba os nunglutithueivra. Herotva hemba indk vethamnavna, wo omnana, kava yemba mana vemava wohvraohangas vevra, yimba kamba osahmanavrava. Herotva tanam nihnamolnam wohishomnavna.

No ungevliriniva omnana Herotm, hevna nengavnangnamba owai, avalna nengavnangna Herotiasna. Omnana Herotm, yeoa wohtrava pevna valgonindm, angarava, Yon Baptaisna kuwul kuvhueira, wo pirinda kuvulambra, kava nonglalm vev.

Wo heva os Herotva duus vevna, wo mindnam nengavnang vevna, wo heva os henga hev nengna, kava doa mongawamolm ishomni hona ungevlirinimba indkumbina novra hona kana innerava, wo kava wohvevav hona kavna moamba. Ata kava os wohvevav, ten he kam wohosahmanim.

10 Herotva hevna valgonindm ishunvna, yeoa ango buiduvram, dom Yon ten avm, wo kuwul kuvhueimnirava, wo ungevlirinim pirinda kuvulambmano, kovoreihu, wo os wohvina, wo himba venamba, hevna avalm kovoraohna. 12 Wo sism no Yontindiva ambanamba, os vindliangana ehallam, singvelmba. Yonmba singvepieinamba, hev anganamba, Yesusm ishumnina, 13 wo Yesusva hellenamba, wo os wongana botra hevho indhanahuiram, hevhom wonalm.

Yesusva Innepetava Englavovlara Popowol Vinna, Wo Heva Os Ongana Tendonamba Esvema, Innemba Lehra Vethana Hemba.

Mak 6:31-44, Luk 9:10-17, Yon 6:1-13

14 Yesusva os wohgana botra, wo heva os doa deuvnindva hilli, wo noinda himba engvawulangavna pethamonam sis. Himba indakonda kotanind annind, annind, di mongawulm kusovna popethalla hesna, ata Yesusva os phovav huiva. Nonamba Yesusva botriniva holopevpa engallamba, himba indkumbim nongalvna. Himba und vewol vevna hemba, wo nomba ovna, men uvavulmungilva, nomba himba sishona vewol vevna.

15 Simba doa kilvrapiavna, wo hevna aonghal mahalnind ambanamba, umnina, Yesus, simba doa okilvrapiav, ata mani hlavav, pivva huiva memba innehui kembella aevulv. Yeoa hona indhanamoa monglamoa wolanga vungu veo no kembellam, no kembellam, innem sovawolalm hevm.

16 Yesus unna hevna aonghal mahalnindm, owai, aevulvra hona indhanamba hui, ye deiswilu inneoa hemoa. Hevna aonghal mahalnind umnina Yesusm, pivva huiva innemba mindnamba ieivvmoa, ambo vei 5pelara rotiva, tambkokongla sambla. Yesus unna, kam dembrehu, wo os hev dembrehuna Yesusm.

19 Wo doa Yesus unna no indhanam, yeoa hui avhoapro ilsra, wo os wohvina. Yesusva no innepetava dombnamba, wo novvevongo ve, wo Sesoam omnana, lehra yimba besal, kam kolvrowol veo. Doa hev no roti popowol ve, wo hevna aonghal mahalnindm moang vinvna, unna, yeoa hona indhanamoa moang viwul vinvm.

20 Wo doa hevna aonghal mahalnindva osangas no indhanamba wohvinna, wo no indhanamba indkumbimba no innemba hlavnamba, venamba, wohpilivhoawol vevna. Wo no inne eunumbulva hevna aonghal mahalnind dumbvnamba, henga sungowol vivna, venamba, sumbva os lohna 12pelara, no inne eunumbulva songoihalohna. 21 Wo tendomba no innerava os mara lohnama 5000pelara, wo owai, ungevlitundismba es eva ata seivilta.

Yesusva Monglana Plombhovmonam Sena Gavna.

Mak 6:45-52, Yon 6:16-21

22 Henga Yesusva yinavana vewol ovovna hevna aonghal mahalnindm, lelnam yeoa saivo botra, wo henga ango dom mongnahalm plombpethallam, kava ata hui avav, hona indhanam wolanga velm hevna deuvram.

23 Wo Yesusva os wohwolanga vungu vena no indhanamba deuvramba, wo hevpa os vongana oloramba hevho, Sesoamba sembayang venalmba. Doa himba di hevho sembayang vawovna, wo doa simba wohkilvravna. Nonamba hevna aonghal mahalnindva botva di plombhovmonam wulangavna, plombva wulainduwuvna botmba, noinda vuviva sahoklal provna nonamba.

25 Doa simba hovrahovrava endvnamba, Yesusva hevna aonghal mahalnindindamba prunvna, wo himba plombsra sena provna monglana, wo hevna aonghal mahalnindva nunglivnamba hemba, himba mindnam pem vivna, uvna, sumbho, wo hemba eiswol vevna mindnam, kingesanga ovna.

27 Nungi lelnam Yesusva hevmba ambara ovithinna os, memba ka, manam yimba pemba vivav. Pita omnana Yesusm, yimba tanamba Yesusva, yeoa kam omno, dom prolm yeindam, plombmonam prolm monglanam senam, os ye ten provm, kava ata os provav, mendekli.

29 Yesus omnana, wouta pro, doa Pitava os botriniva pihanamba pora, wo sena gavna posra dom Yesusindam, wo himba nonglana, pai vuviva sahoklal vevna, wo doa himba pem vevna, wo plombmera os nokovhoana. Pitava Yesusm winevna, kam kolvro.

31 Wo nungi lelnam Yesusva holvorana hemba hevna englana, ata homeis yem nepola vevm, hev omnana, yimba kamba keknamba pevna undnahonamba lohmanavnamoa, manara? Manara yimba osva memba pemba vevna?

32 Wo doa Pitai Yesusiva os henga esihohona botrava, wo doa no vuvikoklava wuleihavnamba, no indkumbiva hevna aonghal mahalnindva mulumbdandna Yesusmba eilungung venavna, tanamolnam yimba Sesoanangas ombol lohv.

Yesusva Sishona Vewol Vena Uvavulmungilm Genesaretra.

Mak 6:53-56

34 Mendah wongavna no botmera, doa di wonpho mongnahalm, wo botrini wonholope engallam Genesaret kembella. No Genesaret kembelnindva Yesusmba wohliheivna os, memba Yesus, doa himba moamba wulaindawul vevna osva indakonda kembellava diva, wo doa indkumbiva indhanamba wulprovna uvavulnindmba Yesusindava. 36 Doa Yesusva sishona vewol vevna uvavulnindmba, wo hev umnina Yesusm, ambo kava monglava ata kayenmulm yenam kekevra vrivra, os kamba wohkanandhawol vevra. Yesus unna, wouta viu, os ten pev uvm. Wo himba nomba kayenmulmba kevravnamba, wo henomba wohkanandhavna.

Copyright information for `WRS