1 Corinthians 15

RKristus kueram ale aking barasam

Aga singsang, ani den gilalong yawara ulengkala ninga manem se ikiman, ale taman, ale te sokel ago bagasan, bare aking ningamin te tairukko ninga manorsam. Nina den gilalong yawara ani ninga manem se am ilukuawuwasan, mu den borta te Kaem ninga sangaru taso. Bare me ilukuawusan agi mu, nina nengemang ningi nunguning mena, se den ikiman mu ko nunguning bo ta aratuk se me arigalko.

Den ani ikiem ale ninga manem, mu den gira nunguningkiri. Mu iwita: Kristus anananga memek siwurokko kueram, Kaem ko batoga te giram balam butata. Se mutim tuguman se tom ilagala suwan mu te barasam, Kaem ko batoga te giram balam butata tala.
1 Cor 15:3-4 Den sang giram aniram: Isaiah 53:8-9; Psalm 16:8-11; Acts 2:24-32.
Ale Peter koma te aratam se arigam. Se udagi te olekem 12 mu suen la nomokete aratam se aringiman. Se udagi te tala ko olekem biguwuman bagakasan mu nunga tom 500 kiaram iwitata bagakasan se nomokete aratam se ari gilingiman. Se noko olekem umutang suen biya am marak anisan, bare sang mu kueman. Ale udagi tala ko uria James koma te aratam. Ale udagi tala apostle suen biya mu nomokete aratam. Udagi nunguningkiri, ani kuriang bo udagi biya bilangara wore turan, nu ani amakete aratam se arigem ale ko angamang ningi nunguning aram.
1 Cor 15:8-10 Paul Jesus arigam: Acts 9:3-6; 1 Cor 9:1.


Ani apostle suen la nunga nobowa ningi. Ani kariimet apostle ko aga arumonko me terong. Mu awuk, ani Kaem ko kariimet nunga bita maguwu lagerem. 10 Bare Kaem gomang aisam ale aga gurugam, se aitak ani ko ura kari bagasam. Se Kaem ko gomang ani aisam mu yam me anikaso. Mena. Apostle sang ura sokel ago ilukasan, bare ani agata ura sokel ago nunguningkiri ilukasam. Bare ani agata me bitakasam. Mena. Kaem gomang aisam ale ikia aisam borta te ura bitakasam. 11 Bare nuna agi, ani agi, den balukasan bare ana suen la Kristus nago ko kueram ale aking barasam mu ko dugu duap balsan, se den borta nina ko nengemang ningi nunguning aram.

Kariimet kueman mu tom nukum te nungumik guang karogo lilim barasomonko

12 Ana Kristus kueram bare Kaem patowaram se aking barasam mu ko den balsan. Se awuk se nina sang balsan kariimet kueman mu me barasomonko ma balsan? 13 E kariimet kuesan mu me barasomonko ale mu, Kaem Kristus me maraguwuram se barasam ale wore! 14 Se Kaem Kristus me mumam se barasam ale mu, ana den gilalong yawara apusan mu mel yam, se nenenga nengemang ningi nunguning mu betela mel yam tala.

15 Se mu la mena. Kristus me barasam ale mu, ana apostle alo mu anananga den Kaem ko balsan mu nunguning mena ale. Mu awuk, ana balsan Kristus kueram bare Kaem maraguwuram se aking barasam umutang ana balsan. 17 Se Kaem Kristus me mumam se barasam ale mu, nenenga nengemang ningi nunguning mu me ninga sangarso ale. Mena. Mu nina ninga memek yam ningimik te aniso ale. 18 Se betela, kariimet Kristus ko nongomang ningi nunguning aram se baga kueman, mu nuna karogotala sarenga namaman ale. 19 Ana Kristus nanga giok se ilak tom suen biya baganakko mu ko nangamang ningi nunguning aram. Se nangamang ningi nunguning mu te ana ali imi te sokel ago bagasan. Bare Kristus me barasam ale mu, nangamang ningi nunguning mu ali imi ko bagara ko la nanga sangarso ale. Se ana kariimet suen la nunga ningi, mu ana Kris alo mu memek biya bagasan ale.

20 Bare mu uwuta mena! Kristus kueram bare nunguningta Kaem patowaram se aking barasam. Se mu te ana ikisan ana agotala udagi barasanakkowo. Nu giram se ana udagi. 21 Kari suwanta Adam kumik te, kua namara ko munan mu kariimet lilim la nunga ira muram. Se kari suwanta Kristus te, kuera ale barasa ko munan mu kariimet lilim tala nunga ira muram. 22 Mu awuk, ana suen la Adam ko gue te, se ana suen la kuesan. Se butatala, Kristus te ana suen la aking barasanakko. 23 Bare ana suen la mu nanga tom te diram barasanakko. Kristus mu nu giram. Se udagi te aking peleruk tairukko tom mu te, ana noko kariimet mu barasanakkowo.
1 Cor 15:23 Kris alo barasomon Jesus koma te biguwumonko: 1 Thes 4:15-17. Adam: Rom 5:12, 18.


24 Se umutang te mu tom nukum beteso. Kristus mel suen la bitaru saguruk nama, kariimet nu ilak kagersan mu suen la nunga menawu suwik duap ningi nunga awurokko. Nu supuling bibiya suen la, taiti kuali se aliti, mu nunga sokel, nunga ikia menawu sapurukko. Ale nukum te mu kua namara ko munan mu ago menawurokko. Asele nu mel suen la kuting te aniso mu ko Nuet Kaem kuting te sarumu bitirukko.

27 Aitak Kristus mel suen la bitaruwoso. Mu awuk, Kaem ko batoga te iwita aniso, “Kaem mel suen la noko suwik duap ningi nunga awuram.”
1 Cor 15:27 Kristus mel suen la bitaruwoso: Psalm 8:6; Mat 28:18.
Bare ana ikisan, Kaem ago mel mu bowa ningi me bagoso.
28 Se mel suen la Kristus bowa ningi nama sapuruk, mu Kristus kota numi Nuet bowa ningi bitirukko. Se Kaem motam motam mel suen biya Kristus bowa ningi awuram, mu Kaem nu kota mel suen biya mu ko supuling bagurukkowo.

29 Nina saki balsan, kariimet kuesan mu me aking barasomonko masan. Bare den sumu nunguning mena. E nenenga den mu nunguning ale mu, awuk se kariimet saki nunga sikisaki kueman wore nunga sangarmonko nuguwim te anuwa tasan? 30 Se ana apostle alo betela, kariimet kueman mu me barasomonko ale mu, awuk se ana ura imi me nabiring tuman, am tom suen biya mel memek nanga maguwurokko wore ningi geraga lagasan?
1 Cor 15:30 Kris nunguning alo mu ikup gimonko: Rom 8:36. Apostle alo ikup gikasan: 2 Cor 4:8-11; 11:23-28.


31 Aga singsang, nina ta, ana ta, suen la anananga Biya Jesus Kristus te bagasan, se ani nina nego ko amilmilasam ale den imi balsam: tom suen biya ani memek ningi bagasam! 32 Ephesus sor te kariimet sang ninguru aga bita maguwuman, ani mel daong ago mu arungu kagererem iwitata.
1 Cor 15:32 Paul Ephesus wonong te: Acts 19:1-2, 8-10. Kari ali imi ko la ikia tam: Luke 12:19-21.
Bare ani ali imi ko la iki se me kagererem. E ani ali imi ko la ikikasam ale mu, ani me kagerakasam ale. Kariimet kueman mu me barasomonko ale mu, ana kari sang balsan turan am iwita balnakko:

“Ana am ngual na yu no se, nguala sipa se baganakko.
Mu awuk, ukurukse kuenakko se.”
33 Kawel kari ninga kulurmon bore ko sinar talko! Mu awuk, “Ana kari memek arungu geraganak, mu anananga bagara ningo maguwumonkowo.” 34 Buta se nina ikia ngualara saparal, ale udagi kilek memek me beteralko! Ani den imi balsam mu nina te dolaralko, nenenga saki Kaem me ko ikisan!

Nangimik guang iru ago barasanakko mu duap bo

35 Se kari bo isok, “Kari kueman mu awuk ta barasomonko? Nungumik guang koma awuk bore tamon ale te barasomonko?” 36 Bare isa mu isa ngualara! Tam muguri ni agusam mu ali ningi kapuruk guang iwirok asele gurek iru paguk ale tarigirukko. 37 Ni mel agusam, kon muguri agi, mu ni yam muguri agusam. Ni gurek mel te tarigiso mu me agusam. 38 Se Kaem ko luan, ko gawa, ko nunguning, mu nu kota ko ikia te ikiwoso owore tuso, tam muguri bo noko luan, ko gawa, ko nunguning mu noko kota ko. 39 Nungumik guang suen la mu koma suwanta mena, mu kirker. Se kariimet, buruk-kausik, inanganang, wal, mu nungumik guang ko ariga kirker. 40 Se taiti kuali ko mel ago, se ali ko mel ago. Taiti kuali ko mel nunga nungumik guang ariga kigilik, se ali imi ko mel nunga nungumik guang ariga kigilik tala. 41 Worem ko nikitang ko ariga kigilik, sige ko nikitang ariga ago kigilik, baras nikitang ariga ago kigilik. Se baras ningi nikitang ariga ago kirker.

42 Se koma suwanta tala, ana nangimik guang ago kuesan ale iwisan mu duap bo, se karogo barasanakko mu duap bo tala, mu me iwirokko. 43 Se ana nangimik guang kueso se mutim tugusan mu duap bo, yawarakala mena, se sokel mena. Bare udagi te nangimik guang karogo barasanakko mu yawarakala nunguningkiri, se sokel ago. 44 Nangimik guang mutim tugusan mu ali ewere ko. Se nangimik guang karogo barasanakko mu duruk wonong ko.

Nangimik guang ali imi ko mu ko ariga mu kigilik, se duruk wonong ko mu kigilik tala.
45 Kaem ko batoga iwita balso, “Kari motam motam Adam, mu Kaem kari marak ago ko beteram.” Bare Adam udagi mu nu duruk wonong ko kari, nu kariimet marak nunguning nungarso. 46 Duruk wonong ko mu me giram. Ali imi ko mu giram, asele duruk wonong ko mu kowom kaoram. 47 Se Adam motam motam mu ali gege te beteram. Bare Adam udagi mu duruk wonong ko. 48 Ana ali imi ko kariimet mu suen biya ali kari Adam mu turan. Se ana awiriya duruk wonong ko kariimet ko arataman bagasan, mu ana kari Kristus, duruk wonong te tairam, mu turan baganakko. 49 Aitak ana nangimik guang ali imi ko kari Adam ko kumik guang turan mu ana karogo bagasan. Bare udagi ana nangimik guang Kari duruk wonong te tairam wore ko kumik guang iwita mu karogo baganakkowo.

50 Aga saki alo, ani ninga manorsam, ali imi ko nangimik guang ago Kaem ko kingdom ningi me kasu nagunakko. Mu awuk, Kaem ko kingdom mu tom suen biya anirukko. Se nangimik guang iwirokko imi mu ago Kaem ko kingdom mu ningi me kasu nagunakko. 51 Iwita ikialko. Ani den bo yumura la aniram wore ninga manikko, mu iwita: ana suen la me kuenak, sang am baganak, se tom nukum te biugel niaruk mu tairatela, uripitik ma kam, ana suen la nangimik guang iru to sapanakko. Biugel niaruk se, kariimet kueman mu nungumik guang udagi me kueruk iwirokko mu ago barasomonkowo. Se ana am bagasan mu ago nangimik guang iru mu tanakkowo.
1 Cor 15:51-53 Nangimik guang iru tanakko: Mat 24:31; 2 Cor 5:1-4; Phil 3:20-21; 1 Thes 4:15-17.
53 Mu iwita: nangimik guang iwiso imi mu tagi taukko, se nangimik guang me iwirokko mu tanakko. Nangimik guang kueso imi mu tagi taukko, se nangimik guang me kueruk, tom suen biya bagurukko mu tanakko. Tom mu te ana Kaem ko batoga bo aniso mu ko nunguning aringinakko, mu iwita balso: “Kaem kuera iwiwara ko sokelel menawuram, ale am menawu saparam!”

55 “Se Kuera, nika sokel apoko ya?
Kuera, nika gatu apoko ya? Aitak mena.”
1 Cor 15:54-55 Isaiah 25:8; Hosea 13:14.

56 Kuera ko gatu mu ana kilek memek betesan umutang noko gatu, mu ana te kuesan. Se Law Den borta kilek memek sokel tuso.
1 Cor 15:56 Law Den borta kilek memek sokel tuso: Rom 7:7-11.
57 Bare ana Kaem amilmil tunakko! Nanga Biya Jesus Kristus te sail nangarso, se ana kager menawusan ale sokel ago sanamasan.
1 Cor 15:56-57 Law Den se kilek memek: Rom 5:13; 6:23; 7:13. Kristus nunga sokel menawuram: Rom 7:24-25.


Buta se, aga singsang yawara, nina sokel ago sanamaralko, me ira peleralko. Tom suen biya Kari Biya ko ura ninguru iluwalko. Mu awuk, nina ikisan, nina Kari Biya ko ura kowar towasan mu yam ipi me namurukkowo.

58 

Copyright information for `WSK