1 Corinthians 16

Corinth Kris alo Judea Kris nunga sangarmonko manga bolala awukasan

Se aitak Kris alo Judea sor te anisan mu nunga munan beteralko mu ko den ninga manikko. Ani Galatia Kris alo iwita betemonko nunga manem, se aking nina turan te beteralko. Ubou suen la te, nina suwan suwan ura tom ningi manga tasan mu ninga sang ilu se, sang munan mu ko kigilik bolala awu se bagaralko. Se tom ani tairik, mu manga bolala awura bo mena. Ani tairik ale kari nina nunga balman mu tam gawa bataguru nungarik, ale nunga awurek se nina munan bolala awuman mu ago gimon ale ago Jerusalem namomonko. Se ani ago Jerusalem namirikko ikiek terong agi, mu asele arungak namirikko.
1 Cor 16:1-4 Nuguting munan bolala awukasan: Rom 15:25-27; 2 Cor 8:1-15; Gal 2:10.


Paul namuruk ale Corinth Kris alo nungarkukko kuamin tugukaso

Ani Macedonia sor te namirik ale sang geragikko ikiwasam. Nama Macedonia, asele nama nengete aratikko. Ale ani tom saki nengerak bagirikko agila, daula yar ko tom mu ani am nengerak bagirikko agila. Asele udagi te aking sor aguwaya te namirikko umutang aga saongal se te namirikko. Aninga angamang aolak ilu se amatam la ningarkikko me kaesam. Aninga angamang kam maiya nuam nengerak bagirikko, bare Kari Biya baluk mu asele. Bare ani imi te Ephesus am bagirik nama Pentecost tom tai aratukko. Mu awuk, ani kariimet te nunga sangikko lage kuring biyala kaigam, se kager kari ningo mena tala anisan.
1 Cor 16:8-9 Paul Ephesus sor te: Acts 19:1-2, 8-10.


10 Bare Timothy nengete tairuk mu ninguru ko sinar tal se gomang amilmil ago ninga ningi bagurukko. Mu nu aninga iwitatala Kari Biya ko ura iluso. 11 Bo me ari meralko. Bare nengemang tual ale lila te beteral se agate tairukko. Ani nu ko singsang arungu nunga kimi bitawasam.
1 Cor 16:10-11 Paul Timothy nongote beteram: 1 Cor 4:17. Timothy kulak nuam: 1 Tim 4:12.


12 Se nanga bo Apollos, mu ani ninguru manem, nu nanga singsang arungu nengete namurukko. Bare noko gomang nu aitakta imi namurukko mu me aniso. Bare udagi te tom bo nu te namurukko terong arigok, mu nengete namurukko.

Den nukum

13 Sinar ago bagaralko. Nengemang ningi nunguning gek am bagaralko. Ale kari aora tala sokel ago bagaralko. 14 Mel suen biya betesan mu ninimi nengemang tui se la beteralko.

15 Nina ikisan, Achaia sor te Stephanas ko kuriang imet arungu giriman ale Kris kariimet ko arataman. Ale nuna nongota nunga ikia nongomang te Kaem ko kariimet nunga sangarmonko ura ninguru bitakasan. Aga singsang, ani ninga manorsam, 16 nina kariimet uwutata mu se, arikaya arungu ura ilusan ale nunga sangorsan, mu nunga nobowa ningi baga se nunga saongalko. 17 Ani Stephanas, se Fortunatus, se Achaicus buta agate taiman mu ko ani amilmilasam. Nina me taiman ko, mu nuna aking taiman. 18 Ale nuna aninga angamang motam ereman, ale nenenga ago ereman. Buta se kari uwutata mu amilmil nungaral ale nunup patowaralko.

19 Kris alo Asia sor te anisan, wore nunga amilmil den ningarsan. Aquila se Priscilla se Kris alo nunga kawam te arungu biguwusan, mu Kari Biya nup te amilmil den yawara nengete betesan. 20 Kris kariimet imi te suen la den amilmil ningarsan. Amilmil yawara ninimi tui se nigiting iluwalko.

21 Ani Paul, agata aga agiting te den amilmil imi bataguru ningarsam.
1 Cor 16:21 Paul 1 Corinthians ko den baluwaram se kari bo tam gawa te batogam, bare nukum te nu kota ko kuting molak awete beteram.


22 Awiriya Kari Biya ko me kueso, mu am memek taukko.

Kari Biya, ni tairko!
1 Cor 16:22 Paul den tukunang imi Aramaic den to batogam: Marana tha.


23 Kari Biya Jesus ko gomang lila nengerak bagurukko. Ani Jesus Kristus nup te angamang ningarsam. Nunguning.

24 

Copyright information for `WSK